Klei Aê Diê Blŭ: Klei Kbiă 23:1-9
Êlan kliăng: “Ñu bi êdah leh kơ ih, Ơ mnuih, ya jing jăk, leh anăn ya klei Yêhôwa mtă brei ih ngă. Jing klei ngă klei kpă leh anăn khăp klei pap, leh anăn êbat mbĭt hŏng Aê Diê ih hŏng klei luă gŭ.” (Y-Mika 6:8)
Klei êmuh ksiêm mĭn: Ya klei jăk siam Khua Yang bi êdah hlăm jih jang klei bhiăn hlăm trăn Klei Aê Diê Blŭ anei? Si klei bhiăn anei lông dlăng klei drei dôk hdĭp?
Hlăm trăn Klei Aê Diê Blŭ anei, Aê Diê bi êdah klei Ñu iêô mthưr klă mngač leh anăn ktang kơ klei kpă ênô leh anăn kơ ai tiê thâo pap. Anei jing êlan hdră kñăm kơ klei kpă ênô leh anăn kơ klei khăp Khua Yang. Klei bhiăn anei bi êdah klă nik ai tiê Aê Diê doh jăk, mtăp mđơr leh anăn bŏ hŏng klei khăp klei pap.
Khua Yang mtă kơ phung ƀuôn sang Ñu brei ênuah ênô hlăm klei blŭ, mtăp mđơr hlăm klei ksiêm dlăng leh anăn êngeh êngiê hlăm klei dôk dơ̆ng ƀơ̆ng huă hŏng mnuih mkăn, boh nik nak hŏng mnuih ƀun ƀin leh anăn hŏng mnuih djăl tŭ klei ruă êka ai tiê. “Đăm tui hlue phung lu čiăng ngă klei jhat ôh;” (êlan 2), leh anăn “Đăm bi mtah ôh klei năng hlăm kđi mnuih ƀun.” (êlan 6). Klei anei amâo djŏ knŏng jing klei bhiăn hlăm ƀuôn sang ôh ƀiădah wăt jing hnơ̆ng čuăn myang bi êdah klei jăk siam Aê Diê msĕ mơh. Ñu jing Aê Diê kơ klei sĭt nik, amâo dưi blŭ luar, ñu jing Pô Phat Kđi prŏng amâo dlăng kơ mnuih mdê mdê ôh, leh anăn ñu jing Mtao kiă kriê hŏng klei kpă ênô tloh ênoh.
Hlăm jih jang klei bhiăn kpă ênô anei, drei ƀuh mơh klei jăk, klei khăp Aê Diê. Ñu uêñ kơ phung mnuih ƀun ƀin, kơ phung tue, leh anăn tơl wăt kơ phung roh mơh. Phung anak ƀuôn sang Aê Diê brei dôk dơ̆ng ƀơ̆ng huă kpă ênô hŏng jih jang mnuih, amâo tĭng yap ôh ya anôk bruă diñu jing hlăm klei hdĭp. Ñu mtă kơ phung ƀuôn sang Ñu amâo knŏng đăm ngă jhat kơ phung roh ôh, ƀiădah wăt lŏ hur har đru diñu mơh. Klei anei amâo jing bruă ngă yang đar ôh ƀiădah bi êdah ai tiê jăk Khua Yang hŏng drei, wăt êjai drei adôk jing roh bi kdơ̆ng hŏng Ñu (Rôm 5:8).
Aê Diê kăm ghă ktang tĭt đăm mă ôh mnơ̆ng sun ngăn, “kyuadah mnơ̆ng sun ngăn bi bum ală phung khua, leh anăn bi mtah klei kđi phung kpă.” (êlan 8). Snăn, tui si klei Khua Yang mtô, klei hngah kơ mnơ̆ng sun ngăn jing ngă klei kpă ênô. Knhal tuč, Aê Diê iêô mthưr phung ƀuôn sang Ñu lŏ hdơr wĭt klei knap mñai diñu pô tuôm găn leh, čiăng kơ diñu dưi thâo săng brei kơ mnuih mkăn (êlan 9). Klei anăn jing ai tiê jăk hlăm bruă ngă, ai tiê thâo pap kbiă hriê mơ̆ng klei lŏ bi hdơr hŏng ai tiê thâo hdơr knga.
Jih jang klei bhiăn anei lông dlăng drei hruê anei hlăm lăn ala bŏ hŏng klei mplư luar, amâo mtăp mđơr leh anăn bi kah. Drei ênưih lĕ hlăm klei mplư dôk kriêp ñăt tơdah phung lu soh wê, yap yuôm phung mâo klei dưi hĭn kơ phung ƀun ƀin, dlăng hơăi mang klei knap mñai mnuih mkăn. Ƀiădah Khua Yang iêô mthưr brei drei čhuang dlông hĭn: dôk hdĭp tui si klei kpă ênô Ñu hŏng klei kgŭ dơ̆ng kyua klei sĭt nik, leh anăn bi êdah ai tiê jăk siam Khua Yang hŏng bruă ngă mơ̆ng ai tiê thâo uêñ pap, wăt tơdah bruă ngă anăn jing dleh dlan dưn mơh (Y-Mika 6:8).
Si ngă drei ngă klei kpă ênô, khăp kơ klei jăk leh anăn êbat hŏng klei luă gŭ ti anăp Khua Yang ti krah ƀuôn sang anei mơ̆?
Wah lač: Ơ Khua Yang jing Khua Phat kđi prŏng kpă ênô leh anăn jing Ama klei khăp. Akâo Khua Yang bi hriăm kâo thâo blŭ klei sĭt nik, ngă bruă kpă ênô leh anăn klei khăp. Brei kâo bi êdah ai tiê Khua Yang hlăm grăp klei blŭ leh anăn bruă ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
