Khiavdim 23:1-9
Nqe cim:
“Yeej tsis tau hlo li, tus TSWV twb qhia yam zoo rau peb lawm. Tej uas nws xav kom peb ua yog li no: ua lub siab ncaj, cog kev sib hlub kom ruaj khov, thiab ua lub neej txo hwjchim nrog peb tus Vajtswv sib raug zoo” (Mikhas 6:8)
Lus nug rau sawvdaws xav:
– Tej kevcai hauv ntu Vajluskub no qhia tawm Vajtswv tej tus yam ntxwv zoo twg?
– Tej kevcai no ntuas peb ua neej li cas?
Hauv ntu Vajluskub no, Vajtswv nqua hu meej thiab khov kho txog kev ncajncees thiab lub siab hlub tshua. Nov yog tej kevcai uas hais meej txog Vajtswv txoj kev ncajncees thiab Nws txoj kev hlub. Txoj kevcai no qhia tawm meej heev txog Vajtswv muaj lub siab dawb paug, ncajncees thiab puv npo kev hlub tshua.
Vajtswv samhwm kom Nws haivneeg yuav tsum hais tej lus tseeb, ncajncees rau tej lus txiav txim thiab coj zoo rau lwm tus, tshwjxeeb yog cov neeg pluag thiab cov uas yoojyim muaj kev tu siab. “Tsis txhob nrog pab neeg coob mus ua txhaum” (nqe 2), thiab “Tsis txhob txiav txim tsis ncaj rau tus neeg pluag thaum nws tuaj rau hauv tsev tu plaub” (nqe 6). Ntawm no tsis tsuas yog tej kevcai rau lub tebcahws xwb tiamsis tseem yog qhov uas zoo kawg nkaus qhia tawm Vajtswv tej tus yam ntxwv zoo. Nws yog Vajtswv ntawm qhov tseeb, hais tsis tau dag, yog Tus txiav txim tsis xaiv ntsej muag thiab yog tus Vajntxwv tswj los ntawm kev ncajncees zoo kawg nkaus.
Hauv tej kevcai ncajncees no, peb kuj pom Vajtswv lub siab ntev, lub siab hlub. Nws hmov tshua cov neeg pluag, cov neeg txawv tebchaws, thiab kiag cov ua yeebncuab rau Nws. Vajtswv cov menyuam yuav tsum coj ncajncees rau txhua tus, tsis hais hom neeg twg los xij. Vajtswv samhwm rau Nws haivneeg tsis yog khiav yeebncuab xwb tiamsis tseem yuav tsum ua zoo pab lawv thiab. Nov tsis yog tes haujlwm uas cimciv muaj, tiamsis yog tes haujlwm qhia tawm Vajtswv txoj kev hlub peb, kiag thaum peb tseem ua yeebncuab rau Nws (Loos 5:8).
Vajtswv txwv nruj tsis pub yuav nyiaj xiab, “Tsis txhob yuav luag tej nyiaj xiab, rau qhov tej nyiaj ntawd ua rau cov nomtswv qhovmuag fam, txiav txim tsis ncaj thiab ua rau cov neeg ncaj ncees swb cai” (nqe 8). Yog li ntawd, raws li tus Tswv qhia tsis yuav luag tej nyiaj xiab ces yog ua ncajncees. Thaum kawg, Vajtswv nqua hu Nws haivneeg nco txog lawv tej kev txomnyem kom lawv totaub lwm tus kev txomnyem (nqe 9). Ntawd yog lub siab ntev ua haujlwm, lub siab nco ntsoov ua Vajtswv tsaug.
Tej kevcai no ntuas peb niaj hnub nim no nyob hauv lub ntiajteb uas puv npo txoj kev dag, tsis ncajncees thiab faib ua pab pawg. Peb yoojyim poob rau txoj kev dag ntxias nyob twbywm thaum pab neeg coob ua txhaum, xaiv ntsej muag tuaj tus muaj hwjchim tog heev dua tus neeg pluag, tsis quav ntsej lwm tus txoj kev mob. Tiamsis Vajtswv nqu hu peb rhais ruam rau qhov siab dua: Ua neej raws Vajtswv txoj kev ncajncees los ntawm sawv rau qhov tseeb thiab qhia tshwm Vajtswv kev ua siab ntev los ntawm lub siab hlub tshua ua haujlwm, txawm qhov ntawd yuav nyuaj los xij (Mikhas 6:8).
Thov Vajtswv,
Vajtswv yog Tus uas txiav txim ncajncees thiab yog Leej Txiv muaj kev hlub. Thov qhia nyuam yaus hais tej lus tseeb, ua haujlwm ncajncees thiab muaj kev hlub. Thov pab nyuam yaus qhia tawm Vajtswv lub siab los ntawm tej lo lus hais thiab tes haujlwm ua. Nyuam yaus tuav Tswv Yexus Khetos lub npe thov, Amees.
Peb puas ua ncajncees, muaj lub siab ntev, txo hwjchim tabmeeg Vajtswv thiab tibneeg sawvdaws?
Nyeem Vajluskub hauv peb lub xyoos: Tes Haujlwm 24
Kênh Youtube BHKTHN:
