Klei Aê Diê Blŭ: Y-Êsra 7:25-26
Êlan kliăng: “Kyuadah êlan Yêhôwa jing kpă, leh anăn phung kpă êbat tinăn, ƀiădah phung gao klei bhiăn srăng lĕ buh tinăn.” (Y-Ôsê 14:9b)
Klei êmuh ksiêm mĭn: Ya klei Khua Yang yua mtao čar Persơ mtă kơ Y-Êsra brei ngă? Si mta klei anei bi êdah klei kpă ênô Khua Yang? Si klei khăng ktang kơ klei kpă ênô Khua Yang bi êdah hruê anei?
Hlăm thŭn tal 7, ênuk mtao Y-Artasersês čar Persơ kiă kriê, mtao čih sa klei mtă brei klei dưi kơ Y-Êsra wĭt kơ ƀuôn Yêrusalem mbĭt hŏng đa đa phung Israel nao mbĭt. Diñu mâo klei dưi mkŏ mjing hdră bhiăn kiă kriê phung ƀuôn sang Israel tui si klei bhiăn Aê Diê. Y-Êsra 7:25-26 bi êdah klei kpă ênô Aê Diê tơdah Ñu yua mtao čar Persơ brei klei mtă kơ Y-Êsra: Brei mdưm phung thâo klei bhiăn Aê Diê jing khua kiă kriê, mtô klei bhiăn Aê Diê kơ phung ka thâo ôh, leh anăn brei mâo hdră bhiăn phat kđi leh anăn pah mưn bi kmhal klă mngač tui si klei bhiăn. Kyua jing sa čô khua ngă yang mơ̆ng găp djuê Y-Arôn leh anăn “Y-Êsra pioh leh hlăm ai tiê ñu čiăng hriăm klei bhiăn Yêhôwa, gưt gơ̆, mtô klei Ñu mtă leh anăn klei Ñu mtrŭn hlăm čar Israel” (Y-Êsra 7:10) snăn Y-Êsra djŏ năng kluôm dhuôm hŏng bruă jao anei.
Klei Bhiăn, lŏ pia jing Klei Bhiăn Y-Môis, ƀiădah djŏ sĭt hĭn jing Klei Bhiăn AÊ DIÊ, mâo jih jang Pluh Mta Klei Mtă, klei čuăn kơ hdră bhiăn myơr mnơ̆ng ngă yang leh anăn klei bhiăn kơ phung ƀuôn sang. Hlăm anăn, Pluh Mta Klei Mtă yơh jing yuôm hĭn kyuadah kluôm ênŭm jih jang klei bhiăn; êjai anăn dua mta klei bhiăn myơr mnơ̆ng ngă yang leh anăn klei bhiăn kơ phung ƀuôn sang knŏng mă yua tui si djŏ gưl hƀuê ênuk. Dua êlan Klei Aê Diê Blŭ hruê anei brei ƀuh, Klei Bhiăn brei mtô bi hriăm, djă pioh leh anăn… bi kmhal. Ya ngă? Kyuadah klei bhiăn mâo bruă yuôm snăk, ñu ba klei hdĭp kơ phung Israel (Bruă Lêwi 18:5) msĕ si klei bhiăn yơh đru krơ̆ng kjăp lăn čar. Klei Bhiăn ăt jing hdră êlan yua čiăng kơ jih jang mnuih thâo kral knuih kpă ênô Aê Diê: “Ih mtă leh klei Ih hưn hŏng klei kpă ênô leh anăn năng knang sĭt.” (Klei Mmuñ Hđăp 119:138). Klei kpă ênô Aê Diê amâo brei mnơ̆ng Ñu hrih mjing dưi bi rai klei bhiăn Ñu ôh. Diñu srăng mâo klei hơêč hmưi tơdah djă pioh klei bhiăn, ƀiădah srăng tŭ klei jhat truh tơdah amâo djă pioh ôh klei bhiăn (Klei Mtô Mñă Klei Bhiăn 28:1-2, 15). Khua Yang Pô yơh srăng phat kđi leh anăn čuăn klei pah mưn amâodah bi kmhal. Ñu phat kđi hŏng klei sĭt nik leh anăn amâo dlăng kơ mnuih mdê mdê ôh: “Ơ Yêhôwa, kâo thâo klei Ih phat kđi jing kpă, leh anăn hŏng klei sĭt suôr Ih bi knap kâo leh.” (Klei Mmuñ Hđăp 119:75). Klei kpă ênô Khua Yang bi êdah hŏng klei bhiăn Ñu khăng ktang čiăng đru kơ drei thâo huĭ mpŭ kơ Khua Yang.
Ară anei, kyua klei jăk Ñu, Khua Yang dôk guôn drei kmhal kơ klei soh êlâo kơ Ñu phat kđi: “Khua Yang amâo bi tai ôh bi sĭt klei Ñu ƀuăn tui si đa đa mĭn, ƀiădah Ñu gĭr hŏng diih, amâo čiăng ôh sa čô srăng rai luč, ƀiădah čiăng kơ jih jang srăng truh kơ klei kmhal kơ klei soh.” (II Y-Pêtrôs 3:9). Ƀiădah Klei Bhiăn Khua Yang ăt khăng ktang, pah mưn bi kmhal klă mngač, kyuanăn brei drei dôk hdĭp kpă ênô leh anăn hiu hưn klei Khua Yang bi mtlaih kơ lu mnuih.
Ya klei drei ngă tơdah thâo, drei srăng dôk ti anăp klei kpă ênô leh anăn klei Khua Yang phat kđi msĕ mơh?
Wah lač: Ơ Ama Pô Kpă ênô! Brei kâo hdơr nanao kơ Klei Bhiăn Khua Yang jing khăng ktang snăk, čiăng kơ kâo dôk hdĭp huĭ mpŭ kơ Khua Yang, jih ai tiê hiu hưn Anăn Khua Yang kơ lu mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 22
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
