Bơtho Khôi Juăt 32:1-20
“Kră Yang thoi tơmo tih wei war; lu tơdrong Sư jang keh dang ‘lơ̆ng tôm, trong Kră Yang tơpăt hơnơ̆ng. Sư boih Kră Yang ‘Bok Kei-Dei sĭt, ‘lơ̆ng tơpăt ưh kơ đei hơlĕnh. Sư tơpăt ling lang ‘lơ̆ng hơnơ̆ng.” (Bơtho Khôi Juăt 32:4)
Nơ̆r jet tơchĕng pơwao:
– Tơdrong hơri ‘bok Môis bơngai pơtruh nơ̆r ‘Bok Kei-Dei noh kăl thoi yơ?
– ‘Bok Kei-Dei Tơ’ngla tơpăt hơnơ̆ng. Hăm tơdrong tơpăt hơnơ̆ng Sư noh, Sư pơm kiơ lăm tơdrong Sư pơgơ̆p pơkă hăm kon pơlei Isơrael?
– Bơ̆n arih thoi yơ kơplah bơ̆n pơhrăm băt bơih Kră Yang ‘Bok Kei-Dei Tơ’ngla tơpăt hơnơ̆ng?
Hla bơar Bơtho Khôi Juăt chăl 32 noh tơdrong hơri ‘bok Môis bơngai pơtruh nơ̆r ‘Bok Kei-Dei, sư đei chih wă bơtho kơ lu bơngai Isơrael. Yua kơ tơdrong ‘nâu kăl dêh na sư krao đĭ-đăng bơngai athei mơ̆ng mă nhen păng chih răk tơ lăm jơhngơ̆m (trong 1). Đĭ tơdrong hơri ‘Bok Môis noh, lăm noh đei pơma kơ tơdrong lui ngeh, kư̆m đei lu nơ̆r khan lê̆ hơdrol ‘bơm kơ tơdrong wă kơ lu bơngai Isơrael kăl kơ đak ‘mi. Bơtho gah tơdrong lui ngeh ‘noh pơtơm blŭng a sư bơtho gah Kră Yang Yêhôwa Tơ’ngla mă ‘bok Môis krao Sư ‘Bok Kei-Dei lu bơ̆n.’Bok Môis krao thoi noh yua kơ ‘Bok Kei-Dei hăm lu bơngai Isơrael đei tơdrong tơ’bưh kăl dêh noh lăm tơdrong Sư pơgơ̆p pơkă hăm lu bơngai Isơrael. Kiơ̆ kơ tơdrong pơgơ̆p pơkă noh bơngai Isơrael ‘nâu adrĕch adrung Kră Yang ‘Bok Kei-Dei. (Lĕch đơ̆ng Êgiptơ 19:5-6) na ‘Bok Kei-Dei noh “Sư Kră Yang‘Bok Kei-Dei lu bơngai Isơrael, oei hơdai lu bơngai Isơrael.” (Lĕch đơ̆ng Êgiptơ 29:45).
Hăm lu bơngai Isơrael, Anăn Kră Yang noh Yêhôwa. Tơdrong jang lu sư lăm tơdrong pơgơ̆p pơkă noh “ ư-ang kơ Anăn Yêhôwa”păng pôk pơ-ư kơ ‘Bok Kei-Dei tih krưp” (trong 3). Kră Yang ‘Bok Kei-Dei ‘nâu trŏ kơ ư-ang yua kơ Sư ‘lơ̆ng tôm tơdrong, yua kơ dôm lu trong gơlong Sư noh tơpăt hơnơ̆ng. Sư ‘Bok Kei-Dei wei dôm nơ̆r Sư pơkă păng Sư ưh kơ đei yoch kiơ. Sư ‘lơ̆ng trŏ, tơpăt hơnơ̆ng.”
Tơdrong tơpăt hơnơ̆ng noh kăl dêh, noh bơih tơm tơdrong mă ‘Bok Kei-Dei pơgơ̆p pơkă hăm kon pơlei Sư. Đei ‘bar tơdrong lăm jơhngơ̆m ‘Bok Kei-Dei: Tơdrong tơpăt hơnơ̆ng păng tơdrong ‘mêm mơnat. (Hơriso 89:14). ’Bok Kei-Dei tơpăt hơnơ̆ng, tơdrong jang tơpăt hơnơ̆ng Sư noh thoi tơmo wă pĕng bơwei, Sư kư̆m ‘Bok sek tơlang tơpăt;’noh kư̆m nơ̆r pơkă wă dŏng tơgŭm, ‘noh kư̆m nơ̆r tơbăt wă sek phak lu bơngai pơm yoch. Tơdah kon pơlei ‘Bok Kei-Dei chu pơm kiơ̆ tơdrong Sư pơgơ̆p pơkă lei “Sư pĕng gom lu sư, wei lăng lu sư, bơwei lu sư thoi kon ngai lăm măt” (trong 10). Tơplơ̆ kơ ‘noh, mưh lu sư achăng tŭk ‘Bok Kei-Dei păng pơdê kơ Tơmo tih dŏng pơklaih lu sư,.. lu sư soi kơkuh kơ yang nai, tơblĕk Kră Yang… (trong 15-16), lei lăm tơdrong Sư hil mĭl, Sư achăng lê̆ bơih lu kon drŏ-nglo, kon drŏ-kăn Sư” (trong 19).
‘Bok Kei-Dei Tơ’ngla ‘mêm mơnat, Sư rơih iŏk lu bơngai Isơrael jing kon pơlei Sư, mă-lei Sư kư̆m Tơ’ngla tơpăt hơnơ̆ng ‘lơ̆ng tôm. Yua kơ thoi noh na ‘bok Môis chih tơdrong hơri ‘nâu wă bơtho khan kơ kon pơlei Isơrael băt ‘bar tơdrong; lăm ‘bar tơdrong noh Sư athei rơih iŏk minh: Rơih iŏk chu pơm kiơ̆ tơdrong Kră Yang pơgơ̆p pơkă lei đei pŭn hiôk tih đơ̆ng Kră Yang ăn. Rơih iŏk tơdrong kuă kơ chu nơ̆r Kră Yang pơgơ̆p pơkă lei gô pŭ iŏk tơdrong răm tih.
Kră Yang Yêsu bơtho kơpal kông sơ̆ khan bơngai hơgei noh bơngai “mơ̆ng nơ̆r Kră Yang na pơm kiơ̆ hloi” wă kơ hnam gah bơhngol bơngai noh ling-lang dơ̆ng kơjăp mă khan đei tơdrong pơhlŭ pơlong truh thoi ‘mi kial hơbŭt hơbang ră. Mă-lei dah bơngai kơhlôh mơ̆ng nơ̆r Kră Yang mă ưh kơ pơm kiơ̆ lei hnam gah bơhngol bơngai noh dah đei tơdrong pơhlŭ pơlong truh gô “păk pơchah răm” (Mathiơ 7:24-7). Kră Yang ‘Bok Kei-Dei tơpăt hơnơ̆ng ‘lơ̆ng tôm, Sư areh dêh kơ tơdrong yoch kơnê̆ păng Sư kư̆m ưh drơ̆ng ôh tơdrong arih ‘bơ̆r đak klak ŭnh, chă pơm gah ‘nguaih đĕch noh.
Ơ ‘Bă mă tơpăt hơnơ̆ng ‘lơ̆ng tôm tơdrong! Apinh Ih tơ’blŏk kơ inh, tơgŭm inh huay kơ arih ‘bơ̆r đak klak ŭnh, huay kơ chă pơm gah ‘nguaih, mă-lei ling-lang arih chu pơm kiơ̆ Nơ̆r Ih na Ih gô bơwei inh, tuh pŭn hiôk kơ inh. Inh krao khan yua anăn Kră Yang Yêsu Krist, Amen!
Bơ̆n mơ̆ng Nơ̆r Kră Yang rim giĕng, mă-lei bơ̆n tam ‘blŏk hiơ̆k wă pơm kiơ̆ ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 21
Kênh Youtube BHKTHN:
