I Kauleethaus 2:6-16
Nqe cim:
“Tiamsis Vajtswv txib Vaj Ntsujplig los qhia zaj no rau peb paub; rau qhov Vaj Ntsujplig yeej paub txhua yam uas Vajtswv xav huv tibsi.” (I Kauleethaus 2:10)
Lus nug xav:
– Ob yam kev txawj ntse twg tau hais txog ntawm no?
– Vajtswv txoj kev txawj ntse yog pub rau leejtwg? Thiab yog vim li cas?
– Zaj kawm no qhia kom peb paub txog dabtsi thaum peb los kawm Vajtswv Txojlus thiab thaum peb ua Nws tes haujlwm?
Txuas ntxiv zaj qhia txog kev sib faib hauv Pawg Ntseeg Kauleethaus yog los ntawm kev ua raws neeg ntiajteb kev txawj ntse thiab kev txawj hais lus zoo mloog, Timthawj Paulus qhia tob mus ntxiv, zoo li nws tabtom tev cov plhaub tawm kom cov ntseeg saib pom qhov tseeb ntawm tej teebmeem. Nyob hauv ntu Vajluskub hnub no, nws kuj siv txojkev txawj ntse hauv ntiajteb los sib piv nrog Vajtswv txojkev txawj ntse (nqe 6). Timthawj Paulus qhia meej hais tias leejtwg thiaj yog cov uas tau txojkev txawj ntse ntawd. Hais txog Vajtswv txojkev txawj ntse, ces “cov nomtswv uas kav lub ntiajteb no” (nqe 8) thiab “tus uas tsis muaj Vaj Ntsujplig” (nqe 14) yeej tsis muaj peev xwm paub txog tej ntawd. Vajtswv txojkev txawj ntse tsuas yog pub rau “cov neeg uas hlub Vajtswv” (nqe 9), “npaj tseg rau peb” (nqe 7, 10), thiab hais meej ntxiv ces yog rau cov uas “cia siab rau Vaj Ntsujplig tus uas Vajtswv txib los” (nqe 12). Hais tau hais tias, Vajtswv txojkev txawj ntse tsis yog pub rau cov neeg uas vam khom tibneeg txojkev paub, rau qhov “tus uas tsis muaj Vaj Ntsujplig, tus ntawd yeej tsis tau txais tej uas Vajtswv tus Ntsujplig pub, rau qhov lawv pom hais tias tej ntawd tsis muaj qabhau dabtsi, thiab lawv tsis totaub txog tej ntawd” (nqe 14). Tsuas yog tus uas muaj Vaj Ntsujplig nyob hauv nws xwb thiaj txais tau tej uas yog sab ntsujplig.
Tswv Yexus cov thwjtim kuj nug tias vim li cas Nws thiaj siv tej lus pivtxwv los qhia, Tswv Yexus teb hais tias txojkev to taub ntawd tsuas yog pub rau lawv xwb, lwm tus tsis tau txais tej ntawd (Mathais 13:10–11), vim tsuas yog Tus Qhia Qhov Tseeb thiaj coj tau cov uas muaj Vaj Ntsujplig mus rau qhov tseeb (Yauhas 16:13). Yog li ntawd, tus uas muaj Vaj Ntsujplig xwb thiaj li nkag siab thiab pom txhua yam raws li qhov tseeb ntawm sab ntsujplig.
Ntu Vajluskub no xaus nrog lo lus hais tias: “Leejtwg thiaj paub tus Tswv lub siab? Leejtwg thiaj qhia tau nws? Tiamsis peb twb muaj lub siab ib yam li Yexus Khetos lub lawm thiab” (nqe 16). Tej yam uas tob kawg nkaus ntawm Vajtswv lub tswv yim, txawm yog cov neeg txawj ntse tshajplaws hauv ntiajteb los yeej tsis totaub, tiamsis peb totaub, rau qhov peb muaj Vaj Ntsujplig qhia peb. Timthawj Petus yog ib tug neeg ntaus ntses uas tsis tau kawm ntawv siab, tiamsis nws muaj kev txawj ntse los sau tej tsab ntawv tseemceeb hauv Phau Vajluskub Tshiab, nws tseem qhia tau ntau txhiab leej hnov Txojmoo Zoo thiab txais yuav Tswv Yexus. Qhov ntawd yog los ntawm Vajtswv txojkev txawj ntse, Vajtswv yog Tus uas pub Vaj Ntsujplig nyob hauv cov uas ntseeg Tswv Yexus lawm lub siab. Peb yuav tsis muaj peev xwm nkag siab txog Vajtswv thiab ua lub neej ncaj ncees nrog lwm tus, yog hais tias peb tsis tau txais Vaj Ntsujplig ua tus pab. Thiab tsis los ntawm Vaj Ntsujplig pab ces peb yuav tsis kam txiav txim siab txais yuav Tswv Yexus ua peb tus Tswv Cawmseej.
Thov Vajtswv,
Tswv Yexus, ua Koj tsaug uas Koj tau pub Vaj Ntsujplig rau nyuam yaus, kom nyuam yaus totaub tej uas yog sab ntsujplig. Thov pab nyuam yaus zeem paub Vaj Ntsujplig kev qhuab ntuas kom ua tau lub neej haum Koj siab. Nyuam yaus tuav Yexus Khetos lub npe thov. Amees.
Peb tabtom ua neej thiab ua haujlwm hauv Pawg Ntseeg los ntawm hom kev txawj ntse twg?
Vajluskub hauv peb lub xyoos: Tes Haujlwm 18
Kênh Youtube BHKTHN:
