Luka 1:46-50
“’Noh yua kơ dôm tơdrong mơsêh mơyang đơ̆ng ‘Bok Kei-Dei ăn kơ inh tơpă. ‘Bok Kei-Dei pơm tơdrong ‘lơ̆ng tơpăt ngăl. Sư mơnat kơ đĭ đăng bơngai mă lui yom kơ Sư, mă đơ̆ng sơ̆ khơ̆ ning-mônh.”
(Luka 1:49-50)
Nơ̆r jet tơchĕng pơwao:
– Mari hơri bơnê, ưang kơ Kră Yang thoi yơ?
– Sư băt kơdih akâu sư thoi yơ lăm tơpang ti mơsêh Kră Yang?
– Lu bơ̆n tơchĕng kiơ ‘Bok Kei-Dei mơsêh lăm phĕt đe tơpŭ kơ Kră Yang sơnăm ‘nâu?
Tơdrong Mari oei adruh ưh kơhioh kơ Kră Yang Yêsu anat tơpă kiơ̆ kơ kon bơngai wă hlôh, thoi noh Linh jang ‘lơ̆ng khan tơbăt wă tơdra khan tơpăt thoi âu “’Bok Kei-Dei gơh pơm tôm tơdrong” yă Êlisabet sư kră tơpă, đe khan sư bơngai hơwŏng, mălei dang ei sư akâu kơhioh đei tơdrâu khei (Luka 1:36-37).
Đơ̆ng noh, Mari năm hơpong kơ Êlisabet, truh tơ noh na sư ưang kơ Kră Yang hăm minh ‘bai hơri, pơih blŭng a, sư kơkuh kơ ‘Bok Kei-Dei hăm đĭ jơhngơ̆m sư. Jơhngơ̆m sư hiôk chơt tơpă păng bơnê kơ tơdrong ‘mêm Kră Yang ‘măn kơ sư, thoi noh na sư hơri bơnê, ưang kơ Kră Yang jơ̆ Tơ’ngla pơklaih sư, sư băt mơn kơdih sư minh ‘nu đĭch đam Kră Yang ưh kơ rơa kiơ mălei sư mơnat kơ inh, wă yua sư lăm tơdrong jang gĭt kăl, noh sư anăp hĭ kơ Yêsu. ‘Nâu bơih minh tơdrong pŭn hiôk tih păng gĭt kăl tam mă đei minh ‘nu adruh đei pŭn hiôk (trong 48-50).
Mari ưang kơ Kră Yang đei tơ’bôh jơhngơ̆m sư chơt hiôk tơpă yua sư băt kơdih akâu sư minh ‘nu bơngai yoch, minh ‘nu đĭch đam ưh kơ rơa kiơ, mălei Kră Yang ăn pŭn hiôk tih dang noh. Yang mơsêh pơm tôm tơdrong hlĭch chrơp, kơplah sư jang keh tơdrong dŏng pơklaih kon bơngai, lăm noh Kră Yan rơih iŏk Mari anăp kơ Yêsu. Lăm ‘bai hơri ưang kơ Kră Yang Mari ưh kơ đei khan đơ̆ng sư lăm tơdrong anăp rơneh kơ Yêsu, sư băt kơdih akâu sư minh ‘nu bơngai đơ̆ng ‘Bok Kei-Dei man pơjing sư hăm teh lơ̆n đĕch lei bơ̆n hiơt bơih ‘Bok Kei-Dei mơsêh gơh pơm tôm tơdrong. Tơdrong Dŏng pơklaih đơ̆ng Yang mơsêh ‘lơ̆ng tơpă, tơdrong dŏng pơklaih Kră Yang Yêsu pơm keh bơih, ưh kơ đei bu wă pơthim dah hŭt tŭk dah wă pơgop thim lam noh dơ̆ng (Rôm 3:34).
‘Blŏk hơdơ̆r gah tơdrong đe tơpŭ kơ Kră Yang Yêsu, lu bơ̆n đĭ jơhngơ̆m bơnê kơ Kră Yang yua kơ Yang mă bơ̆n kơkuh noh ‘Bok Kei-Dei mơsêh, bơnê kơ Kră Yang yua kơ tơdrong ‘mêm Sư na Mari kư̆m thoi bơ̆n dang ei gơh klaih bơih. Apinh bơ̆n ‘nĕ kơ pơang tơchĕng khan đơ̆ng tơdrong jang bơ̆n, mălei athei drap kơkuh iŏk đon ala sơng iŏk tơdrong dŏng pơklaih đơ̆ng Kră Yang ăn, păng pơma hăm Yang mơsêh thoi Mari sơ̆: “Jơhngơ̆m inh bơnê ưang kơ Kră Yang dêh. Jơhngơ̆m inh hiôk yua kơ ‘Bok Kei-Dei oei pơklaih inh”. Athei tơchĕng gah ‘Bok Kei-Dei mơsêh lăm phĕt ‘blŏk kơ Kră Yang jur thoi kon bơngai lăm sơnăm ‘nâu păng đĭ jơhngơ̆m bơnê kơ Sư
Kơkuh kơ Ih Kră Yang, inh bơnê kơ Ih, Ih bơih Yang mơsêh ‘mêm mơnat păng dŏng pơklaih inh hăm tơdrong đe tơpŭ kơ Ih păng đơ̆ng tơdrong Ih lôch. Apinh Ih tơgŭm inh đĭ jơhngơ̆m ‘mêm kơ Kră Yang păng adrin arih đĭ chăl arih yua kơ Kră Yang. Yua anăn Kră Yang Yêsu Krist, Amen.
Lu bơ̆n hăm lăp đon pơjao bơ̆n lăm tơpang ti Yang mơsêh ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong jang 10
Kênh Youtube BHKTHN:
