Klei Aê Diê Blŭ: Y-Luk 1:46-50
Êlan kliăng: “Kyuadah Pô Myang snăk ngă leh klei yuôm bhăn kơ kâo, anăn Ñu jing doh jăk. Klei Ñu pap truh kơ phung huĭ mpŭ kơ Ñu hlăm jih jang ênuk” (Y-Luk 1:49-50)
Klei êmuh ksiêm mĭn: Si H’Mari mmuñ bi mni, mpŭ mni kơ Aê Diê? Si ñu thâo kral kơ ñu pô jing hlăm kngan Aê Diê Pô Myang? Si drei bi mĭn kơ Aê Diê Pô Myang hlăm yan Noel thŭn anei?
Klei H’Mari jing mniê hrông ba tian kơ Khua Yang Yêsu jing klei dleh snăk anak mnuih thâo săng, kyua anăn dĭng buăl jăk hưn sa klei bi knăl čiăng bi mklă “amâo mâo sa mta mnơ̆ng Aê Diê amâo dưi ngă ôh”, anăn jing H’Êlisabet, sa čô mduôn plao anak ăt ba tian năm mlan leh (Y-Luk 1:36-37).
Leh anăn, H’Mari nao čuă H’Êlisabet, leh anăn tinăn ñu mpŭ mni Aê Diê hŏng sa klei mmuñ, mphŭn pŏk jing ai tiê kkuh mpŭ kơ Aê Diê hŏng jih mngăt leh anăn ai tiê. Ai tiê H’Mari bŏ hŏng klei mơak leh anăn klei hdơr knga kơ klei pap Aê Diê kyua anăn mmuñ bi mni kơ Aê Diê jing “Pô Bi Mtlaih kâo”. Ñu thâo pô jing sa čô mnuih soh čiăng mâo klei bi mtlaih kyua klei pap Aê Diê (êlan 46-47), leh anăn ñu knŏng jing sa čô dĭng buăl điêt dhiêt kơ Khua Yang ƀiădah mâo Pô Myang Hĭn pap brei, yua ñu ngă bruă prŏng kơ Aê Diê, anăn jing ba tian Khua Yang Yêsu. Anei jing sa klei jăk mơak prŏng snăk leh anăn yuôm bhăn tơl ka mâo sa čô mniê mkăn mâo ôh, leh anăn jing bruă yuôm bhăn tơl grăp čô mnuih hlăm lu gưl ênuk bi mni kơ ñu jing mnuih mâo klei pap (êlan 48-50).
Klei H’Mari mmuñ bi êdah klei mơak jih hnơ̆ng kyua thâo pô jing sa čô mnuih soh, sa čô dĭng buăl điêt dhiêt ƀiădah mâo Aê Diê ruah brei klei hơêč hmưi prŏng snăk. Pô myang hĭn ngă leh bruă yuôm bhăn tơdah Ñu ngă klei bi mtlaih anak mnuih, hlăm anăn Khua Yang yua leh ñu čiăng ba tian kơ Khua Yang Yêsu. Hlăm klei bi mni Aê Diê, H’Mari amâo lač ôh ya klei ñu mguôp hlăm bruă ba Khua Yang Yêsu hriê ti lăn ala, ñu thâo sĭt pô knŏng jing lăn lŭ hlăm kngan pô mmai gŏ leh anăn kui kŏ đup gưt kơ Aê Diê Pô Myang. Klei bi mtlaih mơ̆ng Pô Myang jing yuôm bhăn snăk, klei bi tui kluôm ênŭm leh hlăm Khua Yang Yêsu Krist, amâo mâo ôh hlei pô dưi thiăm amâodah lŏ mguôp ya mta klei (Rôm 3:24).
Klei ksiêm mĭn kơ klei kkiêng kơ Khua Yang Yêsu, drei mgei ai tiê bi mni kơ Khua Yang kyua Pô drei kkuh mpŭ jing Aê Diê Pô Myang. Bi mni kơ Khua Yang kyua klei pap Ñu, kyua anăn H’Mari ăt msĕ mơh drei hruê anei mâo klei bi mtlaih. Akâo kơ phung drei amâo mĭn ôh ya klei drei mâo, ƀiădah brei kui kŏ luă gŭ tŭ mă klei pap Aê Diê brei, leh anăn hưn hŏng Aê Diê Pô Myang msĕ si H’Mari hlăk êlâo: “Mngăt kâo mpŭ mni kơ Khua Yang, ai mĭn kâo mâo klei mơak hlăm Aê Diê Pô Bi Mtlaih kâo”. Brei drei ksiêm mĭn kơ Aê Diê Pô Myang hlăm yan bi hdơr Hruê Khua Yang hriê thŭn anei leh anăn jih ai tiê bi mni kơ Ñu.
Drei tŭ ư jao jih pô hlăm kngan Aê Diê Pô Myang mơ̆?
Wah lač: Ơ Khua Yang, bi mni kơ Ih jing Aê Diê Pô Myang khăp leh leh anăn bi mtlaih kâo hlăm klei Ih hriê ti lăn ala leh anăn klei Khua Yang Yêsu tŭ klei djiê. Akâo kơ Ih đru kâo jih ai tiê khăp kơ Ih leh anăn hdĭp kơ Ih hlăm jih klei hdĭp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
