Klei Aê Diê Blŭ: Klei Mphŭn Dơ̆ng 2:18-25
Êlan kliăng: “Kyuanăn yơh êkei srăng lui amĭ ama ñu, leh anăn srăng dôk mbĭt hŏng mô̆ ñu, leh anăn diñu srăng jing sa kđeh.” (Klei Mphŭn Dơ̆ng 2:24)
Klei êmuh ksiêm mĭn: Si ngă Aê Diê hrih mjing mniê mơ̆ng êkei? Hưn mdah klei bi knăl kơ klei mjing ung mô̆ tal êlâo hĭn? Ya klei hriăm kơ drei mơ̆ng klei mjing ung mô̆ hlăm hdră Aê Diê mkra?
Aê Diê amâo čiăng ôh anak mnuih dôk hjăn păn, wăt tơdah hlăm anôk jăk siam êdimima leh anăn tloh ênoh msĕ si hlăm war djam Êđen. Kyuanăn Khua Yang brei Y-Ađam pĭt prŏng leh anăn hrih mjing sa čô mniê jing H-Êwơ mơ̆ng klang grưh êkei pô yơh (êlan 21-22). Bruă Khua Yang hrih mjing sa čô mniê mă mơ̆ng sa kdrêč asei mlei êkei, brei ƀuh digơ̆ jing dŏ hdơ̆ng digơ̆ pô kluôm dhuôm, leh anăn anei jing sa klei bi mguôp amâo dưi ktlah ôh.
Klei mjing ung mô̆ Y-Ađam leh anăn H-Êwơ jing hdră bruă Aê Diê mkra. Klei Aê Diê Blŭ brei thâo, Khua Yang pô yơh atăt ba H’Êwơ kơ Y-Ađam, klei anăn brei ƀuh klei bi mguôp mjing ung mô̆ amâo knŏng jing klei čuăn hjăn hdơ̆ng hlâo anăn ôh, ƀiădah jing hdră myang mơ̆ng Aê Diê. Hlăm klei mjing ung mô̆, “Kyuanăn yơh êkei srăng lui amĭ ama ñu, leh anăn srăng dôk mbĭt hŏng mô̆ ñu, leh anăn diñu srăng jing sa kđeh.” (êlan 24). Klei anăn jing klei čuăn čiăng mơ̆ng dua čô mnuih đĭ hriê kơ prŏng khue leh, dưi mkŏ mjing klei hdĭp pô leh anăn bi êdah klei čuăn čiăng pô. Bruă “lui amĭ ama” brei ƀuh klei bi mlih hlăm klei kna dưh leh anăn dăp pruê̆ êlâo êdei hlăm klei hdĭp. Tơdah mjing ung mô̆, ung mô̆ jing sa gŏ sang mdê hjăn leh, leh anăn ung mô̆ jing dŏ hdơ̆ng pô, leh anăn dưm klei bi mguôp hdơ̆ng ung mô̆ êlâo hĭn kơ jih klei bi mguôp hŏng mnuih mkăn. Ung mô̆ “dôk mbĭt”, jing klei bi mguôp jing sa kjăp rơ̆ng, sĭt suôr, amâo bi ktlah ôh. Klei mjing ung mô̆ bi mguôp dua čô mnuih jing sa, anăn jing klei bi mguôp jing sa kluôm dhuôm hlăm kđeh asei mlei, klei khăp, leh anăn wăt hlăm mngăt ai tiê. Hlăm anăn amâo mâo ôh ya mta klei kbưi, amâodah klei hgăm, snăn yơh wăt tơdah “dôk lưng mlŭn amâo mâo klei hêñ ôh” (êlan 25) kyuadah ară anei digơ̆ amâo lŏ jing dua ôh ƀiădah jing sa.
Mơ̆ng klei mjing ung mô̆ tal êlâo hĭn, drei ƀuh hdră kñăm Aê Diê kơ klei mjing ung mô̆ kơ phung mnuih. Amâo djŏ mơ̆ng klei mĭn mnuih ôh, ƀiădah jing hdră Aê Diê mkra amâodah klei Aê Diê pô yơh čuăn mkŏ mjing leh. Amâo mâo sa čô mnuih mâo klei dưi bi mlih ôh, leh anăn kăn mâo pô dưi lŏ mjing klei čuăn mkăn tui si klei phung mnuih čiăng rei. Klei mjing ung mô̆ jing klei bi mguôp ti krah sa čô êkei leh anăn sa čô mniê. Sa boh gŏ sang mrâo mkŏ mjing, ung mô̆ brei uêñ mĭn kơ klei bi mguôp hdơ̆ng diñu êlâo hĭn kơ klei bi mguôp mkăn. “Sa kđeh” jing sa klei ƀuăn rơ̆ng kluôm jih klei hdĭp, sĭt suôr, amâo dưi bi ktlah ôh. Leh anăn klei mjing ung mô̆ jăk mơak amâo knŏng ba klei jăk mơak kơ anak mnuih, ƀiădah wăt jing rup bi hmô hdĭp kơ klei bi mguôp ti krah Yang Krist hŏng Phung Sang Aê Diê mơh (Êphêsô 5:25-27).
Si ngă klei mjing ung mô̆ drei ară anei amâodah hlăm hruê êdei djŏ hlue si hdră Khua Yang mkra mơ̆?
Wah lač: Ơ Khua Yang, bi mni kơ Khua Yang kyua hdră jăk siam Khua Yang pioh brei kơ anak mnuih hlăm klei bi mguôp klei mjing ung mô̆. Akâo Khua Yang đru kâo thâo mpŭ kơ klei mjing ung mô̆, thâo bi mpŭ, bi khăp, mă bruă kơ hdơ̆ng pô tui si klei Aê Diê čiăng. Brei klei mjing ung mô̆ hmei bi êdah klei khăp myang Yang Krist leh anăn Phung Sang Aê Diê Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 68
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
