Chivkeeb 2:18-25
Nqe cim:
“Twb yog vim li no tus txivneej thiaj tso nws niam thiab nws txiv tseg mus nrog nws tus pojniam nyob ua txij ua nkawm, thiab nkawd thiaj los koom ua ib lub cev.” (Chivkeeb 2:24)
Lus nug rau sawvdaws xav:
– Ua li cas Vajtswv yuav tsim tus pojniam tawm ntawm tus txiv neej los?
– Piav tej cim ntawm txoj kev ua txijnkawm xubthawj?
– Peb kawm tau dabtsi txog kev txijnkawm hauv Vajtswv kev npaj tseg?
Vajtswv tsis xav cia tibneeg nyob ib leeg, txawm yog qhov chaw nyob ntawd zoo nkauj thiab thiab ntxim nyob kawg nkaus ib yam lub vaj Edees los xij. Vim li ntawd Vajtswv thiaj ua Adas tsaug zog thiab rho nws ib tug txha tav los tsim ib tug pojniam uas yog Evas (nqe 21-22). Qhov uas Vajtswv tsim tus pojniam ntawm tus txiv neej lub cev los qhia pom ob tug sib koom ua ke thiab sib cais sib faib tsis tau.
Txoj kev txij nkawm ntawm Adas thiab Evas yog nyob hauv Vajtswv kev npaj teem tseg lawm. Vajluskub qhia paub yog kiag Vajtswv coj Evas los rau Adas, qhov ntawd qhia pom hais tias kev coglus hauv kev txij nkawm tsis yog kev txiav txim siab ntawm nkawd xwb, tiamsis ntawd yog txoj kev teeb tseg zoo kawg nkaus ntawm Vajtswv. Hauv kev ua txij nkawm “tus txivneej thiaj tso nws niam thiab nws txiv tseg mus nrog nws tus pojniam nyob ua txij ua nkawm, thiab nkawd thiaj los koom ua ib lub cev.” (nqe 24). Ntawd yog txoj kev txiav txim siab ntawm ob tug neeg loj hlob txaus lawm, muaj peevxwm npaj tau yus lub neej thiab cim civ txiav txim siab. Qhov “tso…niam…txiv” qhia pom kev hloov pauv tsis tos niam txiv thiab txawj cim civ npaj yus lub neej kom fuam vam mus ntxiv. Thaum sib yuav ua niam txiv, nkawd dhau mus ua ib tsev neeg, koj yog kuv tug kuv yog koj tug thiab ib tug pab ib tug heev dua li pab lwm tus sab nraud. Txij nkawm “tsheejxeeb” (HMOWSV) lub ntsiab yog sib lo ua ke, nplaum ua ke thiab sib ncaj ncees. Sib yuav ua rau ob tug dhau los ua ib tug, ntawd yog txoj kev sib koom zoo kawg nkaus ntawm lub cev, kev hlub thiab sab ntsujplig huv tibsi. Nyob ntawd tsis muaj kev sib quas, kev zais dabtsi li “nyob liab qab tsis txaj muag” (nqe 25) vim thaum ntawd nkawd tsis yog ob leeg lawm tiamsis yog ib xwb.
Dhau txoj kev txij nkawm xub thawj, peb pom Vajtswv lub homphiaj kev txij nkawm pub rau tibneeg. Ntawd tsis yog tibneeg txoj kev xav tiamsis yog Vajtswv kev npaj tseg thiab Nws teem rhawv tsim. Tsis muaj ib tug neeg twg muaj cai hloov pauv thiab yeej tsis muaj leejtwg muaj peevxwm teem rhawv tsim kev txij nkawm raws li tibneeg kev nyiam kev ntshaw. Txij nkawm yog kev sib koom ntawm ib tug txiv neej thiab ib tug pojniam. Rhawv tsim ib lub tsev neeg tshiab thiab nkawd yuav tsum sib raug zoo dua lwm txoj kev sib raug zoo sab nraud. “Ib lub cev” yog kev sib koom ua ke mus tas sim neej, sib lo ua ke, sib nplaum ua ke thiab sib ncaj ncees. Thiab txoj kev txij nkawm tau koob hmoov, tsis yog coj koob hmoov los rau tibneeg xwb tiamsis ntawd tseem yog tus duab ciaj sia sib raug zoo ntawm Tswv Yexus thiab Pawg Ntseeg (Efexus 5:25-27).
Thov Vajtswv,
Vajtswv, nyuam yaus ua Koj tsaug rau Koj txoj kev npaj tseg rau txoj kev txij nkawm pub rau nyuam yaus. Thov pab nyuam yaus saib kev txij nkawm muaj nqi, sib hwm, sib hlub thiab ib leeg pab ib leeg raws li Koj lub siab nyiam. Thov pab nyuam yaus txoj kev txij nkawm qhia tshwm txoj kev sib raug zoo ntawm Tswv Yexus thiab Pawg Ntseeg. Nyuam yaus tuav Tswv Yexus Khetos lub npe thov, Amees.
Peb txoj kev txij nkawm tamsim no thiab yav tom ntej puas raws li Vajtswv txoj kev npaj tseg?
Nyeem Vajluskub hauv peb lub xyoos: Ntawv Nkauj 68
Kênh Youtube BHKTHN:
