Tơdrong jang 1:4-14
“Apinh iĕm krao khan kơ ‘Bok Kei-Dei tơgŭm nhôn ‘biơ̆ hŏ wă kơ Sư ăn kơ nhôn gơh bơtho nơ̆r Sư kơ lơ bơngai, tơdrong Kon Sư Yêsu Krist mă tam mă tơbăt kơ đe đơ̆ng sơ̆. Yua kơ inh bơtho tơdrong ‘noh na đe oei phak inh dang ei. Thoi noh na inh apinh iĕm krao khan kơ ‘Bok Kei-Dei tơgŭm inh hơgei kơ bơtho tơdrong Sư wă kơ đe hlôh nhên. Sư wă kơ inh bơtho thoi noh.” (Kôlôssê 4:3-4)
Nơ̆r jet tơchĕng pơwao:
- Yua kơ kiơ Kră Yang pơkă kơ lu jơ̆ng ‘bang Sư athei chang gô oei tơlăm pơlei Jêrusalem?
- Tơdrong jang Kră Yang pơjao kơ lu sư noh kiơ, păng lu sư pơtơm thoi yơ?
- Bơ̆n oei pơm jang tơdrong jang noh thoi yơ?
Đơ̆ng rŏng kơ iung arih đơ̆ng lôch, Kră Yang Yêsu đei tơ’bôh, bơtho kơ lu jơ̆ng ‘bang sư 40 năr, păng athei lu sư oei lăm pơlei ding truh Yang Bơhngol ‘Lơ̆ng jur oei păng iĕm wă kơ iĕm đei jơhngơ̆m pran năm bơtho Tơdrong ‘Nao ‘Lơ̆ng Sư. ‘Bok bơtho A.B. Simpson tơbang “Dôm năr chang gô âu kăl dêh wă kơ lu jơ̆ng ‘bang băt kơ tơdrong kăl wă, tơdrong hiong răm, tơdrong thuơ păng tơdrong mơ̆ng kơ Thây lu sư. Đơ̆ng ưh kơ đei kiơ lu sư pơm jing tuh ‘bĕnh blai”. Pơih să păng pơjing Khul Lui Kră Yang kăl dêh kơ lơ bơngai tơgŭm hăm tơdrong krao khan, hơmet, bơtho nơ̆r Kră Yang… Lăm noh, krao khan wă kơ đei tơdrong mơsêh Yang Bơhngol ‘Lơ̆ng ‘noh tơdrong hơmet blŭng a kăl kơ đei. ‘Bok bơtho Billy Graham khan: “tơdrong wă kơgơh jei lăm tơdrong bơtho Tơdrong ‘Nao ‘Lơ̆ng noh krao khan, krao khan păng…krao khan”
Tơdrong jang Kră Yang pơjao kơ lu jơ̆ng ‘bang ‘noh năm jơ̆p jang kơ teh đak. Kră Yang pơkă kơ lu sư pơtơm tơdrong jang hăm trong chang gô tơdrong mơsêh Yang Bơhngol ‘Lơ̆ng ăn. Adrol sơ̆, lu sư đei Kră Yang oei hơdai mă lei dang ei Kră Yang tŏk tơplĕnh bơih, kơ lih kơ thoi noh wă kơ lu sư tơ’bưh hăm Kră Yang noh krao khan “Đơ̆ng kông Ôliwơ, lu sư wih brŏk tơ Jêrusalem, pôm jơhngơ̆m đon tơ kơpal hnam kơjung hơdai krao khan: “Hơtai ei lu sư oei akŭm dih băl, Yêsu khă lu sư: “Iĕm ‘nĕ tam jăk đơ̆ng Pơlei Jêrusalem, iĕm athei chang gô Yang Bơhngol ‘Lơ̆ng mă đêl ‘Bă Inh pơkă gô ăn kơ iĕm kư̆m thoi Inh roi kơ iĕm ki.” (trong 4) krao khan noh pơih pơtơm blŭng a lăm tơdrong jang bơtho Tơdrong ‘Nao ‘Lơ̆ng. Truh năr phĕt Pa Tơkôt, Yang Bơhngol ‘Lơ̆ng jur thoi nơ̆r Kră Yang khan tơbăt adrol, lu jơ̆ng ‘bang đei tơdrong mơsêh păng lu sư pơm kơdranh gah Kră Yang Yêsu pơ̆n nuih dêh.
Bơtho Tơdrong ‘Nao ‘Lơ̆ng noh nơ̆r tơtă athei păng kư̆m tơdrong jang gĭt kăl Kră Yang pơjao kơ kon pơlei sư kơnhăm wă ba tơdrong dŏng pơklaih kơ lơ bơngai. Bơ̆n pơm kiơ̆ nơ̆r tơtă athei ‘nâu lăm tơdrong mơsêh Yang Bơhngol ‘Lơ̆ng, păng krao khan noh bơih khoă wă Yang Bơhngol ‘Lơ̆ng mơ̆t oei. Kơdih ‘Bok Pôl kŭm băt kơ năl tơdrong ‘nâu kơplah sư athei lu khul bơngai lui krao khan tơgŭm sư: “Apinh iĕm krao khan kơ ‘Bok Kei-Dei tơgŭm nhôn ‘biơ̆ hŏ wă kơ Sư ăn kơ nhôn gơh bơtho nơ̆r Sư kơ lơ bơngai, tơdrong Kon Sư Yêsu Krist mă tam mă tơbăt kơ đe đơ̆ng sơ̆. Yua kơ inh bơtho tơdrong ‘noh na đe oei phak inh dang ei.” (Kôlôsê 4:3). Dang ei, tơdrong jang bơtho đei pơm jang hăm lơ tơdrong, rim ‘nu kơ bơ̆n kăl kơ đei wang jang tơdrong jang noh păng đĭ jơhngơ̆m krao khan wă kơ rim năr đei thim bơngai gơh klaih.
Kơkuh kơ Ih Kră Yang, apinh tơdrong mơsêh Yang Bơhngol ‘Lơ̆ng Ih tuh ‘bĕnh blai kơ inh, pơchŭt inh maih krao khan păng wang tơgŭm hơdai lăm tơdrong jang bơtho Tơdrong ‘Nao ‘Lơ̆ng. Apinh Kră Yang mơnat kơ kon pơlei adrĕch adrŭng nhôn păng pơm kơ lơ bơngai đei jơhngơ̆m song iŏk Tơdrong ‘Nao ‘Lơ̆ng tơdrong dŏng pơklaih. Yua anăn Kră Yang Yêsu Krist. Amen
Lu bơ̆n wang tơgŭm kiơ kơ tơdrong jang bơtho Tơdrong ‘Nao ‘Lơ̆ng đơ̆ng lăm khul bơngai lui păng lăm teh đak bơ̆n?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Nhơ̆m Hmoi 2
Kênh Youtube BHKTHN:
