Klei Aê Diê Blŭ: Klei Mmuñ Hđăp 103:1-5
Êlan kliăng: “Ơ mngăt kâo, hơêč hmưi bĕ kơ Yêhôwa, leh anăn đăm wơr bĭt ôh jih klei jăk Ñu ngă” (Klei Mmuñ Hđăp 103:2)
Klei êmuh ksiêm mĭn: Mtao Đawit mñă kơ si ngă tơdah bi mni kơ Aê Diê? Ya ngă? Êlâo hĭn, ñu bi mni kơ Aê Diê kơ ya klei? Ya klei brei drei bi mni kơ Aê Diê?
Mtao Đawit čih leh Klei Mmuñ Hđăp 103 čiăng bi mni kơ klei pap Aê Diê. Ñu mñă kơ ñu pô: “Ơ mngăt kâo, hơêč hmưi bĕ kơ Yêhôwa, leh anăn đăm wơr bĭt ôh jih klei jăk Ñu ngă” (êlan 1). Ñu amâo djŏ knŏng bi êdah ai tiê hdơr knga kơ Aê Diê hlăm bruă ngă ti êngao ôh, ƀiădah lŏ bi mni kơ Aê Diê hŏng jih mngăt. Klei hdơr knga anei kluôm mơ̆ng asei mlei truh kơ mngăt ai tiê ñu, “jih jang mnơ̆ng hlăm kâo” brei bi mni kơ Anăn Doh Jăk Aê Diê. Klei bi mni msĕ si klei hưn klă mngač kơ ya klei Aê Diê ngă leh hlăm klei ñu thâo kral Aê Diê. Ai tiê hdơr knga, klei bi mni, jing klei mâo hlăm ai tiê tơdah ñu ksiêm mĭn kơ klei doh jăk, klei pap Aê Diê, klei anei jing klei mđĭ ai ktang snăk kjăp snăk čiăng kơ ñu bi mni nanao kơ Aê Diê.
Mtao Đawit bi mni kơ Aê Diê hlăm djăp boh klei mơ̆ng klei tlaih klei hdĭp, klei Aê Diê brei jing mtao, mơak hŏng klei jăk siam, leh anăn wăt hlăm klei suaih pral dưi bi mrâo. Klei pap Aê Diê kơ ñu amâo dưi yap jih ôh. Klei hơêč hmưi lač kơ klei hdĭp hdơr nanao kơ klei pap Aê Diê. Tơdah wơr hĕ klei pap Aê Diê srăng atăt kơ klei bi hrŏ hĕ ai tiê thâo hdơr knga leh anăn klei bi mni. Amâo hdơr knga kơ Aê Diê jing knhuang tal êlâo truh kơ klei kbưi hŏng Aê Diê, truh klei jhat kjham snăk hlăm klei hdĭp kđeh leh anăn mngăt.
Klei hdĭp grăp čô drei tơdah dôk hlăm boh klei găl jăk ƀiădah ăt mâo mơh tăp năng tuôm hŏng klei dleh dlan, lông dlăng. Dŭm klei amâo jăk anăn lu blư̆ ngă kơ drei êdu ai, leh anăn kjham hĭn jing wơr hĕ ai tiê hdơr knga kơ Aê Diê. Grăp čô drei brei mñă ai tiê pô hdơr knga leh anăn bi mni kơ Aê Diê: “đăm wơr bĭt ôh jih klei jăk Ñu ngă” (êlan 2). Drei khăng hdơr sui kơ klei amâo jăk, leh anăn khăng wơr pral snăk kơ klei găl jăk, leh anăn wơr hĕ klei jăk mơak Aê Diê brei. Brei pioh mnĭt mmông lŏ hdơr mnĭt mmông mơak mñai, klei jăk mơak hlăm hruê mmông leh êgao, leh anăn bi mni kơ Aê Diê kơ klei anăn. Bi mni kơ Aê Diê kyua jih jang klei ung, mô̆, amĭ ama, phung hlăm gŏ sang brei leh kơ drei hlăm thŭn mlan leh êgao. Êngao anăn, brei mni kơ Aê Diê kyua jih jang mnơ̆ng jăk Ñu brei leh kơ drei hlăm thŭn êgao. Êlâo hĭn, brei bi mni kơ Aê Diê kyua mnơ̆ng yuôm bhăn jing Anak Ñu, Khua Yang Yêsu Krist, Pô săn leh asei, tuh êrah čiăng kơ drei dưi hdĭp mâo Ñu kiă kriê nanao. Brei Khua Yang Yêsu Krist jing phŭn kơ klei hdĭp drei leh anăn grăp hruê drei dưi sĭt suôr hưn hŏng Khua Yang msĕ si Khua ƀĭng kna Y-Pôl snei: “Bi mni kơ Aê Diê kyua mnơ̆ng Ñu brei arăng amâo dưi mblang ôh” (II Kôrantô 9:15).
Drei jih ai tiê bi mni leh anăn hơêč hmưi kơ Aê Diê kyua klei jăk Ñu brei leh mơ̆ ka?
Wah lač: Ơ Aê Diê, kâo bi mni kơ Ih tuh leh êrah čiăng bi mtlaih kâo, leh anăn brei klei hơêč hmưi kơ kâo hlăm djăp mta bruă hlăm thŭn êgao. Akâo kơ Ama mñă kơ kâo hdĭp nanao hŏng ai tiê hdơr knga kơ Aê Diê leh anăn ăt thâo kah mbha kơ klei jăk mơak Aê Diê brei kơ pô mkăn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yêrêmi 47
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
