Phau Ntawv Nkauj 116:12-14
Nqe cim:
“Tus TSWV ua txhua yam zoo rau kuv, kuv yuav muab dabtsi pauj nws txiajntsig?” (Phau Ntawv Nkauj 116:12)
Lus nug rau sawvdaws xav:
– Zeem paub tej koobhmoov uas tus Tswv pub rau yus, tus sau Phau Ntawv Nkauj muaj tus cwjpwm li cas?
– Nws tau hais tawm ob yam meej meej twg txog kev nco tus Tswv txiajntsig?
– Peb siv qhov no rau lubneej licas?
Zeem paub Vajtswv tej koob hmoov, tus sau Phau Ntawv Nkauj pom tias “Tus TSWV ua txhua yam zoo rau kuv, kuv yuav muab dabtsi pauj nws txiaj ntsig?”. Txawm li ntawd los tus sau Phau Ntawv Nkauj lossis txhua tus tibneeg puavleej yeej tsis txaus peevxwm “pauj … tej yam zoo uas tus Tswv pub rau yus”, tiamsis qhov kev zeem paub no qhia pom tus sau Phau Ntawv Nkauj nplooj siab paub nco tus Tswv txiajntsig, leejtwg hauv peb los kuj yuav muaj lo lus nug ib yam nkaus li ntawd. Tus sau qhia paub tej yam uas peb muaj peevxwm ua los qhia tshwm kev nco Vajtswv txiajntsig.
Tim ib, qhia tshwm kev nco tus Tswv txiajntsig los ntawm qhov uas qhia txog Nws yog tus Cawmseej. Tus duab “lub tais, lossis lub khob” nyob hauv nqe 13 (HMOWSV) yog ib tug duab hauv Vajluskub Qub piv txog kev puv phwjyaws, nplua mias, xws li Phau Ntawv Nkauj 23:5, “kuv lub khob puv nplua mias”. “Lub khob” uas tus sau Phau Ntawv Nkauj tuav yog “lub khob cawmdim”, hauv phau Vajluskub lus Henplais yog siv lolus lej tsoom (lus txhooj), “cov kev cawmdim”, totaub kom yog mas hais tias “cov kev pab cawm”. Vim li ntawd, hauv nqe 13 kuj muaj lub ntsiab: Hauv tus Tswv lub npe, kuv yuav qhia txoj kev cawmdim uas los ntawm tus Tswv los.
Yam xub thawj ib tug neeg nco tus Tswv txiajntsig yog los ntawm qhov uas tshaj tawm txoj Moo Zoo, ua timkhawv txog tej koob hmoov ntawm tus Tswv, thiab qhia rau lwm tus paub txog tus Vajtswv uas zoo kawg nkaus. Hauv Malakaus 4:20-21 hais txog ib tug neeg uas txais yuav Txojmoo Zoo tiag tiag yuav tawg paj txi txiv “qee hnab txi tau peb caug lub, qee hnab txi tau rau caum lub, qee hnab txi tau ib puas lub”, thiab Tswv Yexus hais ntxiv tias: “Puas muaj leejtwg taws teeb thiab muab phiab khwb rau lossis muab txawb rau hauv qab txag? Tsuas yog muaj yuav muab txawb rau saum qhov chaw siab xwb?” Zaj lus qhia no muaj ob lub ntsiab lus tseemceeb: tim ib, peb tau cawmdim yog cia ua lub teeb ci thiab ua tim khawv rau tus Tswv, tim ob, qhia Txojmoo Zoo thiab ua tim khawv txog tus Tswv yog ib qhov tim khawv qhia meej hais tias tus ntawd tau txais kev cawmdim lawm tiag. Peb pheej hais txog hlub tus Tswv thiab nco Nws txiajntsig, tiamsis zaum kawg uas peb qhia txog tus Tswv rau lwm tus, zaum kawg uas peb ua tim khawv txog tej koob hmoov uas tus Tswv pub rau peb yog thaum twg? Cia li qhia tshwm kev nco tus Tswv txiajntsig dhau los ntawm kev tshaj tawm Tswv Yexus uas yog tus Cawmseej thiab kub siab lug ua tim khawv txog tej koobhmoov uas Nws pub.
Tim ob, tus sau Phau Ntawv Nkauj qhia tshwm nws kev nco tus Tswv txiajntsig dhau los ntawm qhov uas “kuv yuav coj tej uas kuv tau coglus tseg lawm tuaj fij rau nws” (nqe 14). Vajluskub suav hais tias, kev coglus rau tus Tswv yog kev pehawm, yog zeem paub tus Tswv uas peb pehawm yog tus tswj kav txhua yam, tus txiav txim ncajncees mas peb yuavtsum ua tib zoo rau peb tej lus cogtseg. Muaj tej lus cogtseg twg uas peb twb hnov qab lawm? Xws li coglus hauv kev txij nkawm, niam txiv puas tseem paub ntshai Vajtswv thiab puas tseem sib txhawb txhim kho lub neej sab ntsujplig? Lossis tej lus cogtseg thaum fij menyuam, niam txiv puas tseem txhawj txog menyuam lubneej sab ntsujplig? v.v…
Thov Vajtswv,
Tus Tswv, thov pab kom nyuam yaus nco ntsoov tej koobhmoov uas Koj pub rau nyuam yaus, kom nyuam yaus nco ntsoov hais tias nyuam yaus tau cawmdim los ua tim khawv rau Koj, thiab ncajncees rau nyuam yaus tej lus cogtseg. Nyuam yaus tuav Tswv Yexus Khetos lub npe thov, Amees.
Ib tsoom mloog uas hmov tshua,
Yam dabtsi qhia hais tias peb yeej tseem nco ntsoov tus Tswv tej txiajntsig?
Nyeem Vajluskub haub peb lub xyoo: Yelemis 24
Kênh Youtube BHKTHN:
