Klei Aê Diê Blŭ: Klei Mmuñ Hđăp 1:1-2
Êlan kliăng: “Jăk mơak yơh mnuih amâo êbat ôh tui si klei phung ƀai kčĕ, kăn dôk rei hlăm êlan phung soh, kăn dôk gŭ rei mbĭt hŏng phung mưč. Ƀiădah ñu mơak hlăm klei bhiăn Yêhôwa,leh anăn ñu dôk mĭn kơ klei bhiăn anăn hruê mlam.” (Klei Mmuñ Hđăp 1:1-2)
Klei êmuh ksiêm mĭn: Pô čih hră Klei Mmuñ Hđăp tal sa brei thâo si klei bi êdah kơ pô mâo klei hơêč hmưi? Ya klei êdah êdi mơ̆ng pô mâo klei hơêč hmưi? Si klei yuôm bhăn bruă ksiêm hriăm klei bhiăn Aê Diê hlăm klei hdĭp drei?
Pô čih hră Klei Mmuñ Hđăp tal sa brei thâo pô mâo klei hơêč hmưi amâo tui hlue ôh klei phung ƀai kčĕ, amâo brei klei hdĭp pô hmăi ôh mơ̆ng knuih hdĭp lăn ala. Diñu amâo dôk ôh hlăm êlan phung soh; kăn dôk gŭ rei mbĭt hŏng phung mưč, amâo bi mguôp sĭt suôr, amâo bi kƀĭn ôh hŏng phung ngă mgao mưč kơ Aê Diê (êlan 1). Wăt tơdah tuôm hŏng ya klei dleh dlan, diñu ăt lŏ dơ̆ng đăo knang kơ Aê Diê msĕ si Y-Yôp, tuôm hŏng Satan mplư, mô̆ ñu lač: “Si ngă ih ăt dôk sĭt suôr hĕ? Tăm pah bĕ kơ Aê Diê leh anăn djiê.” Ƀiădah ñu lač kơ mô̆ ñu mluk, leh anăn lŏ dơ̆ng krơ̆ng klei đăo kơ Aê Diê (Y-Yôp 2:9-10).
Klei êdah êdi hĭn mơ̆ng mnuih mâo klei hơêč hmưi jing mơak kơ klei bhiăn Yêhôwa leh anăn ksiêm hriăm klei bhiăn anăn hruê leh anăn mlam (êlan 2). Hŏng diñu, Klei Aê Diê Blŭ jing klei mmih, diñu khăp hriăm amâo djŏ arăng mgô̆ ôh.
Mtao Đawit thâo leh: “Klei huĭ mpŭ kơ Yêhôwa jing doh, Ñu dôk nanao hlŏng lar; klei Yêhôwa mtrŭn jing sĭt nik, leh anăn djŏ sơăi. Diñu yuôm hĭn kơ mah, kơ lu mah điêt aruăt; diñu mmih hĭn kơ êa hnuê, êa hnuê rôč mơ̆ng ksing” (Klei Mmuñ Hđăp 19:9-10). Pô mâo klei hơêč hmưi bi mguôp nanao hŏng Aê Diê mơ̆ng Klei Aê Diê Blŭ, čiăng kơ klei bhiăn jing hdră atăt êlan hlăm djăp klei mĭn, bruă ngă leh anăn klei blŭ diñu. “Klei ih blŭ jing pui kđen kơ jơ̆ng kâo, leh anăn klei mngač kơ êlan kâo” (Klei Mmuñ Hđăp 119:105). Anei jing klei yuôm bhăn čiăng kơ diñu amâo tui hlue ôh klei phung ƀai kčĕ, thâo răng kơ klei phung ƀai mplư; jing tur knơ̆ng leh anăn ai ktang hlăm mngăt čiăng amâo tui hlue, amâo dôk mbĭt, kăn dôk gŭ rei hŏng phung soh.
Wăt tơdah pô mâo Aê Diê hơêč hmưi ăt adôk awăt, ênưih lĕ hlăm klei soh ƀiădah diñu amâo lŏ dơ̆ng êbat hlăm êlan soh jhat amâodah êngăp hlăm klei soh ôh, ƀiădah knang kơ Klei Aê Diê Blŭ ƀuah mkra, mtô bi hriăm čiăng kmhal klei soh čiăng kơ mâo klei pap brei leh anăn lŏ dơ̆ng êbat hŏng Aê Diê čiăng mâo klei hơêč hmưi.
Phung đăo kơ Krist mâo klei đăo sĭt srăng huĭ mpŭ kơ Aê Diê, čiăng mkŏ mjing klei bi mguôp kjăp hŏng Ñu. Mđing pioh hjăn mnĭt mmông găl jăk, hlăm sa anôk kriêp ñăt dlăng leh anăn ksiêm mĭn Klei Aê Diê Blŭ. Bruă mđing pioh mmông wah lač hjăn grăp hruê ba drei nao giăm Khua Yang hĭn; thâo kơ klei Ñu kiă kriê, klei Ñu atăt gai leh anăn hmao đru čiăng kơ drei mâo klei hơêč hmưi Aê Diê brei.
Drei mâo klei mđing pioh mnĭt mmông ksiêm hriăm Klei Aê Diê Blŭ hrăm hruê mơ̆?
Wah lač: Ơ Khua Yang! Kâo khăp kơ Ih, kâo čiăng Ih đru hlăm klei hdĭp. Akâo kơ Klei Aê Diê Blŭ ktrâo atăt êlan kâo nao, krơ̆ng kâo tlaih mơ̆ng klei phung ƀai kčĕ, leh anăn ñĕ kơ klei soh jhat. Akâo kơ klei mĭn, bruă ngă leh anăn klei kâo blŭ bi mơak kơ Ih. Kâo wah lač hlăm Anăn Khua Yang Yêsu Krist , Amen
Dlăng Klei Aê Diê Blŭ hlăm tlâo thŭn: Y-Yêrêmi 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
