Klei Aê Diê Blŭ: Klei Mphŭn Dơ̆ng 1:28-31
Êlan kliăng: “Aê Diê hơêč hmưi klei jăk jĭn kơ digơ̆ leh anăn lač kơ digơ̆, “Brei diih mâo anak leh anăn bi lar êngŭm, bi bŏ lăn ala, leh anăn brei diih jing khua kơ lăn ala; brei diih kiă kriê kan hlăm êa ksĭ, čĭm hlăm adiê, leh anăn jih jang mnơ̆ng hdĭp kpư̆ hiu ti lăn ala.” (Klei Mphŭn Dơ̆ng 1:28)
Klei êmuh ksiêm mĭn: Leh hrih mjing anak mnuih, ya klei Aê Diê mtă mtăn leh kơ diñu? Si Ñu mkăp leh kơ klei hdĭp anak mnuih? Si drei hdĭp hŏng bruă klam Aê Diê jao?
Leh hrih mjing, Aê Diê jao leh kơ anak mnuih, wăt êkei leh anăn mniê sa bruă klam: “Aê Diê hơêč hmưi klei jăk jĭn kơ digơ̆ leh anăn lač kơ digơ̆, “Brei diih mâo anak leh anăn bi lar êngŭm, bi bŏ lăn ala, leh anăn brei diih jing khua kơ lăn ala; brei diih kiă kriê kan hlăm êa ksĭ, čĭm hlăm adiê, leh anăn jih jang mnơ̆ng hdĭp kpư̆ hiu ti lăn ala” (êlan 28). Hlăm bruă klam anei, drei ƀuh: Tal sa, brei anak mnuih mâo anak, mđĭ ênoh mnuih ƀuôn sang leh anăn bi lar êngŭm bŏ lăn ala. Anăn jing rup kơ klei hdĭp mda lar êngŭm, đĭ kyar nanao mơ̆ng dŭm gŏ sang leh anăn êpul êya mnuih ƀuôn sang. Tal dua brei anak mnuih jing khua leh anăn kiă kriê lăn ala. Anăn jing rup sa lăn ala mâo dăp pruê̆, jing wăl hdĭp mda găl ênưih kơ klei đĭ kyar jih jang mnơ̆ng. Tal tlâo, brei anak mnuih kriê dlăng jih jang mnơ̆ng hdĭp, jing kiă kriê, wiê ênăk, leh anăn rơ̆ng klei đĭ kyar jăk kơ lăn ala.
Amâo djŏ Aê Diê knŏng jao kơ anak mnuih sa bruă klam ôh, Ñu lŏ brei klei hơêč hmưi leh anăn mprăp jih jang mnơ̆ng čiăng êdi. Hlăm klei Aê Diê hơêč hmưi, ñu ăt mkăp mnơ̆ng ƀơ̆ng huă rông anak mnuih (êlan 29). Anăn amâo djŏ knŏng jing mnơ̆ng ƀơ̆ng huă rông ba hlăm klei hdĭp grăp hruê ôh, ƀiădah yuôm bhăn hĭn, jing pŏk rup bruă anak mnuih hdĭp hlăm klei Pô Hrih Mjing răng mgang leh anăn kiă kriê. Anăn jing hruê hrih mjing tal năm, leh anăn Aê Diê ƀuh klei anăn jing jăk snăk.
Aê Diê čiăng kơ phung ba rup Aê Diê brei bi ala kơ Ñu čiăng ngă khua kơ lăn ala, kriê dlăng jih jang mnơ̆ng, rơ̆ng lăn ala amâo djŏ knŏng ngă bruă msĕ aguah tlam ôh ƀiădah đĭ kyar nanao. Mơ̆ng anăn, Aê Diê jing Pô Hrih Mjing mâo klei guh kơang. Anei jing klei mñă nanao kơ grăp čô drei brei hdĭp djŏ hŏng bruă klam jing pô răng kriê, kriê dlăng leh anăn đru mkŏ mjing lăn ala anei amâo djŏ knŏng jing phung knŏng mă yua ôh. Mơ̆ng bruă ngă ênưih snăk msĕ si amâo tuh djah plă plia, mkiêt mkriêm êa pui êwa čuh, răng mgang wăl hdĭp mda, truh kơ bruă knuă msĕ si nai mtô, phung mă bruă tuh tia mkra mjing, ƀĭng lŏ hma, aê mdrao… grăp čô brei mă bruă hŏng klei jăk hĭn čiăng mjing ênoh yuôm kơ lăn ala Aê Diê brei. Anăn jing dŭm hdră klă sĭt drei ngă bruă klam kriê dlăng leh anăn mkŏ mjing lăn ala Aê Diê hrih mjing leh.
Si drei dôk ngă bruă klam kriê dlăng lăn ala anei hlăm klei hdĭp pô grăp hruê?
Wah lač: Ơ Khua Yang, kâo bi mni kơ Ih kyua Ih hrih mjing leh kâo hŏng bruă klam kriê dlăng leh anăn mđĭ kyar lăn ala anei. Akâo kơ Ih đru kâo grăp hruê hlăm bruă knuă, hlăm klei hdĭp, hlăm dŭm klei bi mguôp, čiăng kơ jih jang đru mguôp mkŏ mjing lăn ala Aê Diê hrih mjing leh. Ƀuăn jih klei hdĭp kâo hdĭp djŏ hŏng bruă klam čiăng kơ dlông rŏng lăn ƀrư̆ hruê jăk hĭn, leh anăn Anăn Ih mâo klei mpŭ hlăm kluôm lăn ala. Kâo wah lač hlăm Anăn Khua Yang Yêsu Krist , Amen.
Dlăng Klei Aê Diê Blŭ hlăm tlâo thŭn: Y-Yêrêmi 9
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
