Klei Aê Diê Blŭ: Y-Mathiơ 22:8-14
Êlan kliăng: “Kyuadah lu mnuih arăng iêô, ƀiădah ƀiă mnuih arăng ruah” (Y-Mathiơ 22:14)
Klei êmuh ksiêm mĭn: Leh lu mnuih hngah kơ klei ƀơ̆ng huă, ya klei mtao ngă? Ya ngă mtao brei jak jih jang “wăt mnuih jhat wăt mnuih jăk”? Si ngă mtao ngă kơ pô hriê ƀơ̆ng huă ƀiădah amâo hơô ao bi kuôl ôh? Ya klei hriăm drei mă tŭ kơ drei pô mơ̆ng trăn Klei Aê Diê Blŭ anei?
Hlăm klei Khua Yang Yêsu yăl dliê kơ klei ƀơ̆ng huă bi kuôl ung mô̆ kơ anak êkei mtao, leh jih jang mnuih hngah kơ klei mtao jak, mtao lač digơ̆ amâo năng hriê ôh, snăn klei pap ñu lŏ pŏk prŏng hĭn tơdah tiŏ nao phung dĭng buăl ñu, “Snăn nao bĕ hlăm tar ƀar êlan dơ̆ng leh anăn jak jih jang mnuih diih ƀuh brei hriê kơ klei ƀơ̆ng huă bi kuôl ung mô̆” (êlan 9). Phung dĭng buăl anăn nao tar ƀar êlan dơ̆ng jak ba jih jang mnuih diñu ƀuh, “wăt mnuih jhat wăt mnuih jăk”, čiăng lač amâo bi kah mnuih jăk hŏng mnuih jhat ôh. Ya ngă mtao brei jak jih jang “wăt mnuih jhat wăt mnuih jăk”? Năng ai ti anăp mnuih, mâo mnuih jăk, mâo mnuih jhat, ƀiădah ti anăp Aê Diê “jih jang mnuih soh leh sơăi, leh anăn amâo tơl mâo klei guh kơang Aê Diê ôh” (Rôm 3:23). Jih jang mnuih čiăng mă tŭ sơăi klei pap klei Aê Diê bi mtlaih. Jih jang phung arăng jak leh mŭt hlăm adŭ ƀơ̆ng huă, dưi hơô ao bi kuôl, rup ao kpă ênô Khua Yang Yêsu, digơ̆ srăng mâo klei bi kčŭt kyua klei khăp anăn leh anăn hdĭp năng hŏng klei pap digơ̆ mă tŭ leh, ƀuăn rơ̆ng srăng gưt jih kơ klei mtao mtrŭn leh anăn klei bhiăn kơ klei ƀơ̆ng huă, čiăng năng mâo ƀô̆ mta hlăm klei ƀơ̆ng huă sang mtao. Knŏng bhiâo riâo rit adŭ ƀơ̆ng huă bŏ hŏng mnuih. Tơdah yăl dliê klei bi hriêng anei, Khua Yang Yêsu čiăng lač phung Yuđa hngah leh kơ Ñu, leh anăn klei bi mtlaih brei leh kơ phung tue.
Mâo sa čô êkei hriê ƀơ̆ng huă amâo hơô ao bi kuôl ôh ƀiădah hơô ao tui si ñu pô čiăng, êkei anei bŏ hŏng klei krưh leh anăn mgao, mưč kơ mtao leh anăn kơ klei ƀơ̆ng huă mtao, tơdah mtao êmuh ñu amâo thâo lŏ wĭt lač ôh. “Leh anăn mtao lač kơ phung dĭng buăl ñu, ‘Kă jơ̆ng kngan ñu leh anăn hwiê ñu hlăm anôk mmăt ti tač; tinăn srăng mâo klei čŏk hia leh anăn klei kriêt êgei.’” (êlan 13). Pô anei amâo năng ôh lŏ mâo ƀô̆ mta hlăm klei ƀơ̆ng huă klei pap kyuadah ñu amâo thâo ôh kơ ñu mâo leh klei pap ƀiădah ñu ăt hdĭp tui si klei mĭn ñu pô.
Lač jăk kơ Khua Yang lu êdimima kyuadah drei mă tŭ leh klei pap Ñu brei. Drei jing phung tue amâo năng mâo klei bi mtlaih leh anăn hriê ƀơ̆ng huă klei bi kuôl ung mô̆ Êđai Biăp ôh, ƀiădah Khua Yang Yêsu bi tui leh klei soh drei, “čiăng kơ drei dưi mâo klei yap kpă hŏng klei Ñu pap…” (Y-Tit 3:7). Brei drei mpŭ kơ ao klei kpă ênô Khua Yang Yêsu bi hơô leh kơ drei, hdĭp hŏng klei luă gŭ, bi luă gŭ drei pô leh anăn gưt kơ Khua Yang kyuadah Ñu khăp leh anăn brei leh klei jăk jĭn kơ klei hdĭp drei. Đăm bi luč ôh klei pap Aê Diê brei msĕ si êkei hriê ƀơ̆ng huă ƀiădah amâo čiăng hơô ôh ao bi kuôl. Brei drei răng nanao hlăm klei hdĭp tui hlue Khua Yang “Kyuadah lu mnuih arăng iêô, ƀiădah ƀiă mnuih arăng ruah” (êlan 14).
Drei bi mni kơ Khua Yang leh anăn gưt kơ Ñu hlăm klei hdĭp grăp hruê mơ̆?
Wah lač: Ơ Ama kâo khăp ơi, lač jăk kơ Ih kyuadah kâo jing mnuih amâo tŭ ôh ƀiădah Ih bi êdah leh klei Ih pap kơ kâo. Đru kâo thâo bi mni kơ Ih nanao, amâo hdĭp tui si klei mĭn kâo pô leh anăn bi luč hĕ klei pap Ih brei ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
