Mathiơ 22:1-7
‘‘Ơ bơngai Pơlei Jêrusalem, iĕm pơlôch kơ kiơ lu bơngai ‘Bok Kei-Dei wơh pơtruh nơ̆r Sư kơ iĕm, iĕm iŏk tơmo klơ̆m pơlôch lu sư? Inh lung iĕm năm akŭm tơ Inh lơ wơ̆t bơih ră, dang iĕr krao kon sư wă krôp ră, mă-lei iĕm kuă kơ năm!”(Mathiơ 23:37)
Nơ̆r jet tơchĕng pơwao:
– Kră Yang Yêsu roi dơ̆ng tơdrong hơ’mon kiơ?
– Kră Yang wă bơtho tơdrong kiơ đơ̆ng tơdrong hơ’mon noh?
– Bơ̆n răp sơng iŏk tơdrong mơnat đơ̆ng Kră Yang ‘măn kơ bơ̆n thoi yơ?
Kră Yang Yêsu roi dơ̆ng minh tơdrong hơ’mon Sư wă pơma kơ lu adrĕch bơngai Isơrael arăng kơ̆l, ưh kơ băt bơnê kơ ‘Bok Kei-Dei.Tơdrong hơ’mon pơtơm đơ̆ng ‘bơ̆t ‘bok pơtao ei hơmet tơdrong et sa năr kon sư iŏk akăn. ’Nâu ưh kơ trŏ kơ et sa tơdrong ŭnh-om bơngai kon pơlei hmă đĕch ôh, ‘nâu et sa tơdrong kon tơdăm ‘bok pơtao iŏk akăn,et sa tih dêh, găl dêh păng đei pre hơmet lê̆ tôm,hơmet pơ’lơ̆ng.Lu đe ei đei đăi ‘bok pơtao mah krao wơ̆n wă kơ truh hơdai et sa tơdrong kon tơdăm sư iŏk akăn noh trŏ kơ hiôk dêh yua kơ pơtao lăng gĭt yom kơ lu sư, mă-lei hlĭch dêh,truh tơ năr et sa tơdrong kon ‘bok pơtao iŏk akăn noh tă tơ jua ưh kơ đei ‘bôh bu năm et sa! ‘Bok pơtao wơh dơ̆ng lu đam sư năm tơ’blŏk kơ rim ‘nu đe ei, mă-lei lu sư kư̆m oei kuă kơ năm ‘mơ̆i. ‘Bok pơtao wơh dơ̆ng lu đam sư nai năm tơ’blŏk dơ̆ng kơ lu tơmoi mă đêl sư krao wơ̆n noh, mă-lei lu đam pơtao ei pôm ‘bôh lu bơngai mă ‘bok pơtao krao wơ̆n ei ‘mơng ‘mang pơm nhen thoi ưh kơ băt ‘bok pơtao krao wơ̆n lu sư hloi. Đei bơngai mơ’nah tă tơ hil hơwĕng,pơjăm păng pơlôch tăm lu đam ‘bok pơtao ‘noh dơ̆ng! ‘Bok pơtao băt kơ lu bơngai mă sư krao wơ̆n ei lăng hơi, lăng ưh kơ gĭt kơ nơ̆r sư krao wơ̆n noh păng kư̆m băt kơ lu đe ei pơm kơnê̆ kơ lu đam sư na sư ‘blut jơhngơ̆m, sư ơh dêh, sư hil “wơh lu linh sư năm pơlôch đĭ-đăng lu bơngai mă pơlôch lu bơngai jang kơ sư ei păng soh rông chhông hnam kon pơlei pơla lu sư.” (tr.7).
Kră Yang Yêsu, kơplah Sư hơ’mon tơdrong ‘nâu, Sư pơma hơđăl khan “Dêh char ‘Bok Kei-Dei pơgơ̆r thoi âu” (tr.2). Yua kơ thoi noh na bơ̆n hlôh ‘bok pơtao noh wă khan ‘Bok Kei-Dei bơih, lu tơmoi mă sư krao wơ̆n noh wă khan adrĕch bơngai Isơrael. Lu sư âu adrĕch mă ‘Bok Kei-Dei rơih, na lu sư oei hơnơ̆ng chhôk ngeh kơ Dêh char ‘Bok Kei-Dei pơgơ̆r noh pơgơ̆r lu sư ‘mơ̆i jơ̆ oei pơgơ̆r lu sư ling-lang đĕch, mă-lei, tơpă sư, lu sư tơhiong lê̆ bơih tơdrong mơnat đơ̆ng Kră Yang ăn noh ‘bơ̆t lu sư arăng kơ̆l kuă kơ lui kơ Kră Yang noh.Kơbăt dôm yơ wơ̆t lu sư blah, pơm kơnê̆, tôn teh dah pơlôch lu bơngai khan lê̆ hơdrol mă ‘Bok Kei-Dei wơh năm tơbăt kơ lu sư athei kơchăng jah lui, mưh ưh kơ lui kơnh pŭ tơdrong phak. Nơ̆r Kră Yang khan lê̆ hơdrol gah Pơlei Jêrusalem, pơlei tih lu sư gô răm, khan lăm trong 7 noh hlôi pơkeh bơih‘blep thoi đêl Sư khan,pơkeh ‘bơ̆t sơnăm 70 ĐRKY(đơ̆ng rŏng kơ Kră Yang).
Dang ei, lơ bơngai lăm lu bơ̆n kư̆m hơtai oei sơngah kuă kơ lui kơ ‘Bok Dŏng Pơklaih yua kơ lu bơ̆n hrăt hrot lơ tơdrong jang,yua kơ lu bơ̆n hưch ham kiơ̆ kơdih wă…dôm tơdrong noh pơm kơ bơ̆n achăng lê̆, tơweh lê̆ nơ̆r Kră Yang Tơ’ngla Dŏng Pơklaih krao wơ̆n bơ̆n noh, nơ̆r Sư krao wơ̆n noh bơih tơdrong mơnat tih mă Kră Yang ‘măn ăn kơ bơ̆n.Lơ ‘măng lơ wơ̆t bơ̆n ngeh ngăi kơ bơ̆n gơh klaih yua kơ đơ̆ng bơ̆n pơm ‘lơ̆ng tơdrong ‘nâu, pơm ‘lơ̆ng tơdrong to, dah yua kơ đơ̆ng bơ̆n đei tơdrong jang lăm Khul Lui..v..v.., mă-lei ‘bai pơhrăm ‘nâu tơ’bôh kơ bơ̆n ‘bôh tơdah ưh kơ tơl tơwih nơ̆r Kră Yang,ưh kơ lui sơng iŏk Sư thoi Sư krao wă kơ bơ̆n lui sơng iŏk Sư noh lei mă bơ̆n oei lăm Khul Lui, mă bơ̆n năm akŭm tơ hnam akŭm ră…, bơ̆n ưh kơ gơh klaih ôh,bơ̆n hơnơ̆ng oei lăm tơdrong hiong răm đĕch.Păng bơ̆n kư̆m athei ‘blŏk tơdah hơnơ̆ng kơ sơngah kuă kơ iŏk tơdrong mơnat đơ̆ng ‘Bok Kei-Dei ăn, lei Sư gô sek tơlang, phak bơ̆n lăm năr Kră Yang Yêsu jur dơ̆ng ning-mônh. “Kơplah noh đĭ-đăng kon bơngai ala teh âu nhơ̆m hmoi yua kơ lu sư ‘bôh Inh Kon Bơngai ‘lơ̆ng rŏ mơsêh mơyang tih-tin jur hăm hơmơ̆l.” (Mathiơ 24:30).
Kơkuh kơ Ih Kră Yang, apinh Ih pă jô̆ yo kơ inh ‘bơ̆t năr inh pơma pơchĕ pơma pơlăp lơ tơdrong khan yua kơ tơdrong ‘nâu, tơdrong to wă sơngah kuă kơ iŏk nơ̆r Ih krao,apinh Ih ‘nĕ kơ lê̆ inh ‘mơng pơm ưh kơ băt kơ Ih krao, apinh Ih tơgŭm inh hiôk chơt, băt bơnê,lăp đon tơl tơwih, lui sơng iŏk tơdrong Ih mơnat krao inh lui noh wă kơ Ih sơng iŏk inh lăm năr Ih jur dơ̆ng ning-mônh.Inh krao khan yua anăn Kră Yang Yêsu Krist, Amen!
Bơ̆n hăm hơtai oei hơnơ̆ng kuă kơ tơl tơwih, kuă kơ lui sơng iŏk tơdrong mơnat mă Kră Yang ‘măn ăn kơ bơ̆n, krao wơ̆n wă kơ bơ̆n lui noh ưh?
Đŏk Sơ̆p hla bơar ‘Bok Kei-Dei lăm pêng sơnăm: Jêrêmi 1
Kênh Youtube BHKTHN:
