Klei Aê Diê Blŭ: Y-Mathiơ 22:1-7
Êlan kliăng: “Ơ ƀuôn Yêrusalem, ƀuôn Yêrusalem, ih bi mdjiê phung khua pô hưn êlâo leh anăn bhĭr boh tâo kơ phung arăng tiŏ nao kơ ih! Jêñ jêñ leh Kâo čiăng bi kƀĭn mbĭt phung anak ih msĕ si sa drei mnŭ ana bi kƀĭn êđai gơ̆ ti gŭ siap gơ̆, ƀiădah diih amâo čiăng ôh!” (Y-Mathiơ 23:37)
Klei êmuh ksiêm mĭn: Ya klei Khua Yang Yêsu lŏ yăl dliê? Ya klei Khua Yang čiăng bi hriăm mơ̆ng klei yăl dliê anăn? Si ngă drei mă tŭ klei pap Khua Yang brei kơ drei?
Khua Yang lŏ yăl dliê sa klei bi hriêng čiăng lač kơ klei phung Israel khăng ai tiê, amâo thâo hdơr knga kơ Aê Diê. Klei yăl dliê kčưm hŏng klei sa čô mtao čiăng mkra klei ƀơ̆ng huă bi kuôl kơ anak êkei ñu. Anei amâo djŏ klei ƀơ̆ng huă bi kuôl sa čô mnuih ƀuôn sang ôh, ƀiădah jing sa klei ƀơ̆ng huă prŏng, kdrăm leh anăn mâo klei mprăp jăk snăk. Mâo klei mtao jak jing sa klei hơ̆k mơak prŏng, ƀiădah bi kngăr êdi kyuadah truh hruê bi kuôl amâo mâo pô hriê čhưn ôh! Mtao tiŏ nao phung dĭng buăl lŏ jak mñă kơ grăp čô, ƀiădah kăn diñu čiăng hriê rei. Ñu lŏ tiŏ nao phung dĭng buăl mkăn lŏ mñă kơ phung ñu jak leh, ƀiădah phung ñu jak anăn amâo mâo uêñ ôh, tơl mâo đa đa hŏng klei ngêñ diñu ngă jhat leh anăn bi mdjiê hĕ phung dĭng buăl mtao! Ti anăp klei dlăng hơăi mang kơ klei iêô jak leh anăn klei ngă jhat kơ phung dĭng buăl mtao, mtao ngêñ leh anăn “tiŏ nao phung kahan ñu bi rai phung bi mdjiê anăn leh anăn čuh ƀuôn diñu” (êlan 7).
Tơdah yăl dliê klei bi hriêng anei, Khua Yang Yêsu kñăm snei, “Ƀuôn ala mtao adiê jing msĕ” snăn (êlan 2). Kyuanăn, drei thâo săng mtao anăn jing Aê Diê yơh, phung Ñu jak jing phung Yuđa, diñu jing phung Aê Diê ruah, leh anăn diñu bi mni kơ diñu pô hŏng klei mĭn sĭt nik diñu srăng dưn Ƀuôn ala mtao Aê Diê, ƀiădah boh sĭt gơ̆ diñu bi luč leh klei pap Aê Diê brei leh kơ diñu hŏng klei diñu bi khăng ai tiê, amâo mâo đăo ôh. Mâo lu blư̆ diñu bi kdơ̆ng, ngă jhat amâodah bi mdjiê leh phung khua pô hưn êlâo Aê Diê tiŏ hriê leh čiăng brei diñu răng. Klei Khua Yang Yêsu hưn êlâo kơ ƀuôn prŏng diñu hlăm êlan 7 bi sĭt leh kluôm ênŭm hlăm thŭn 70 Êdei kơ Krist.
Hruê anei, mâo lu mnuih hlăm phung drei ăt hngah mơh kơ Pô Bi Mtlaih kyua mñik mñak hŏng lu bruă leh anăn kyua klei drei pô tluh tơl drei amâo uêñ ôh kơ klei Pô Bi Mtlaih iêô jak, anăn jing klei brei mdê Aê Diê pioh leh kơ drei. Mâo lu blư̆ drei mĭn sĭt nik drei mâo leh klei bi mtlaih kyua drei ngă bruă anei bruă anăn, amâodah kyua djă bruă hlăm Phung Sang Aê Diê, ƀiădah klei hriăm brei ƀuh tơdah amâo gưt ôh kơ klei iêo jak brei mă tŭ Khua Yang Yêsu, snăn wăt tơdah dôk hlăm sang Aê Diê dưn, drei ăt dôk hlăm klei rai tuč mơh. Leh anăn hdơr bĕ, tơdah drei ăt hngah kơ klei pap Aê Diê, sĭt nik drei srăng tŭ klei bi kmhal hlăm hruê Khua Yang Yêsu lŏ hriê: “Hlăk anăn klei bi knăl kơ Anak Mnuih srăng bi êdah hlăm adiê. Jih jang phung găp djuê hlăm lăn ala srăng čŏk hia, leh anăn diñu srăng ƀuh Anak Mnuih hriê ti knam hlăm adiê hŏng klei myang leh anăn klei guh kơang prŏng” (Y-Mathiơ 24:30).
Drei dôk hngah nanao mơ̆ kơ klei pap Aê Diê dôk iêô jak drei?
Wah lač: Ơ Khua Yang, pap brei kơ kâo đa tơdah kâo yua lu êlan čiăng hngah kơ klei Ih iêô jak, đru kâo amâo ngă klei amâo uêñ ôh ƀiădah hơ̆k mơak leh anăn thâo lač jăk, mă tŭ klei pap Ih čiăng kơ kâo dưi nao mbĭt hŏng Ih hruê Ih lŏ hriê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
