I Pêtrôs 1:17-21
“Bơ̆n krao khan kơ Sư yua kơ Sư ‘Bă bơ̆n, bơ̆n athei chu kơ Sư yua kơ Sư wă sek tơlang mă tơpăt đĭ đăng kon bơngai kiơ̆ tơdrong lu sư đêl pơm. Thoi noh na bơ̆n athei kơchăng hli kơ pơm yoch kơplah bơ̆n oei arih tơ ala teh âu. Bơ̆n oei arih tơ ala teh âu thoi bơngai tơmoi đĕch, ưh kơ sĭ teh đak bơ̆n kơdih ôh.”
(I Pêtrôs 1:17)
Nơ̆r jet tơchĕng pơwao:
– Tơdah băt tơpă kơ ‘Bok Kei-Dei jơ̆ ‘Bok ưh kơ pơdê, bongai lui kơ Kră Yang athei arih lơi lơi?
– Kră Yang đei chu iŏk thoi yơ wă kơ lu bơ̆n jing kon ‘Bok mă ưh kơ pơdê?
– Lu bơ̆n arih thoi yơ wă kơ nuih dơ̆ng ‘bơ̆t anăp ‘Bok mă ưh kơ pơdê kơ bu ôh?
Bơngai Lui kăl kơ băt tơpă kơ ‘Bok Kei-Dei sek tơlang tơdrong jang rim ‘nu hơnơ̆ng dang ăi, yua kơ Sư jơ̆ “‘Bok ưh kơ pơdê bu”. Kră Yang ‘Bok Kei-Dei sek tơlang minh ‘nu ưh kơ kiơ̆ kơ tơdrong jang lăm teh đak, tơdrong jang lăm Hnam Akŭm, đei anăn lăm teh đak dah bơngai noh đei mŭk tơmam ôh, ‘noh jơ̆ tơmam hiong hiach, năr ‘nâu đei, dơning hiong, mă-lei Sư sek tơlang kiơ̆ kơ tơdrong đêl bơ̆n pơm. Tơdah lu bơ̆n băt tơpă kơ Kră Yang ‘Bok mă tơpăt hơnơ̆ng lei lăp minh tơdrong đĕch wă kơ huay kơ sek tơlang păng wă kơ Kră yang lăp đon ‘noh arih hli yom kơ Kră Yang ( tr. 17 ). Kơplah pơm kơdranh kơ ‘bok Kôr-nei ‘Bok Pôl khan: “Dang ei inh băt tơpă bơih’Bok Kei-Dei jô̆ đĭ đăng bơngai lei-lăi đĕch. Lăm rim khul bơngai, bơngai bu lui kơkuh kơ ‘Bok Kei-Dei păng pơm trŏ thoi Sư wă, ‘Bok Kei-Dei kư̆m lăp đon kơ lu sư lei-lăi ngăl” (Tơdrong Jang 10: 34-35). Tơdrong arih đĭ jơhngơ̆m hli yom kơ Kră Yang gô tơgŭm lu bơ̆n ưh kơ pơang, kư̆m ưh kơ pơting hăm tơdrong mơdrŏng lu bơngai kơnê̆, mă lei băt kơ pơ’lơ̆ng lăm nơ̆r pơma, lăm tơdrong bơ̆n pơm ‘bơ̆t anăp Kră Yang, ‘bơ̆t anăp kon bơngai pơm liơ wă kơ Kră Yang lăp đon. ‘Bok Pôl pơm kơmil iŏk đon ala hloh kơ đĭ-đăng sư khan: “ Inh adrin pơm jơhngơ̆m chơ̆n kuă ăn akâu inh pơm yoch, hli kơ inh bơtho đe, đe lui mơ̆n, mă akâu inh kơdih hiong tơdrong apah” ( I Kôrintô 9:27).
Hăm ‘bơ̆t anih jing kon “‘Bok mă ưh kơ pơdê bu ôh”, lu bơ̆n athei băt kơ lăng bơ̆n kơdih ưh kơ gơh kĕ hlôi đơ̆ng tơdrong yoch, mă khan yua hu maih, dôm tơmam lăm chăl âu, kư̆m ưh kơgơh dŏng pơklaih đơ̆ng tơdrong yoch đơ̆ng tơm păng tơdrong yoch bơ̆n pơm kơdih. Mă-lei đơ̆ng Kră Yang ‘Bok Kei-Dei dŏng pơklaih lu bơ̆n klĕch hlôi đơ̆ng tơdrong phak yua kơ tơdrong yoch hăm tơmam gĭt kăl dêh, “Iĕm băt bơih ‘Bok Kei-Dei huai iŏk iĕm bơngai kư̆ kă, bơngai ưh kơ yua, iĕm juăt kơ pơm rok lu yă ‘bok iĕm sơ̆. Mă-lei Sư ưh kơ huai iŏk iĕm hăm tơmam hiong răm thoi lĕ kơ hu maih ôh. Tơdrong Sư huai iŏk kăl tơpă, hăm pham Kon Sư Yêsu Krist kơdih hloi; Yêsu Sư thoi lĕ triu mă rơgoh ‘lơ̆ng đe wă soi kơ ‘Bok Kei-Dei” (I Pêtrôs 1: 18-19 ). Yua kơ ‘mêm mơnat kơ kon bơngai, Kră Yang ‘Bok Kei-Dei hơmet tơdrong dŏng pơklaih đơ̆ng Sư pơjing plĕnh teh blŭng a, đơ̆ng Kră Yang Yêsu Krist lôch păng iung arih (tr.20). ‘Noh bơih tơm wă kơ bơ̆n hơmĕng hơđơ̆ng lăm đon lui kơ Kră Yang ‘Bok Kei-Dei (tr. 21).
Tơdah lu bơ̆n krao kơ ‘Bok mă ưh kơ pơdê ‘noh ‘Bă, apinh Kră Yang ăn kơ lu bơ̆n athei arih pơm kiơ̆ ‘Bok Pôl bơtho, “yua kơ ‘Bok Kei-Dei huai iŏk bơ̆n păng tơmam gĭt Sư tơpă. Thoi noh na bơ̆n dah pơyơ̆r bĕ akâu bơ̆n kơ Sư wă pơư pơang anăn Sư”( I Kôrintô 6:20). Lu bơ̆n kư̆m athei iŏk jơhngơ̆m hli yom kơ Kră Yang na arih mă ‘lơ̆ng tơpăt tơ ala teh âu.
Kơkuh kơ Ih jơ̆ ‘Bă mă ‘lơ̆ng tơpăt. Inh bơnê kơ Ih dei lôch tang yua kơ tơdrong yoch inh tơ ‘long pơglang. Apinh Yang Bơhngol ‘Lơ̆ng tơgŭm inh arih ‘lơ̆ng rơgoh , wă tơpă pơyơ̆r akâu jăn jơhngơ̆m pran wă kơ anăn Ih gơh ư-ang. Yua anăn Yêsu Krist ,Amen.
Lu bơ̆n hăm arih mă ‘lơ̆ng wă kơ tơdrong arih bơ̆n gơh ư-ang anăn Kră Yang ‘Bok Kei-Dei ưh ?
Đŏk Sơ̆p Hla ar ‘Bok Kei-Dei lăm pêng sơnăm: II Hơ’mon 34.
Kênh Youtube BHKTHN:
