Klei Aê Diê Blŭ: I Y-Pêtrôs 1:17-21
Êlan kliăng: “Leh anăn tơdah diih iêu Ama êjai wah lač kơ Aê Diê, Pô phat kđi grăp čô tui si bruă Ñu amâo dlăng mnuih ti êngao ôh, brei diih hdĭp hŏng klei huĭ mpŭ êjai ênuk bhiâo diih dôk ti lăn ala” (I Y-Pêtrôs 1:17)
Klei êmuh ksiêm mĭn: Tơdah thâo kral leh Aê Diê jing Pô amâo dlăng mnuih ti êngao ôh, si phung đăo kơ Aê Diê brei hdĭp? Si ngă Khua Yang tla leh ênoh čiăng kơ drei dưi jing anak Pô amâo dlăng mnuih ti êngao ôh. Si drei hdĭp čiăng jhŏng dôk ti anăp Pô amâo dlăng mnuih ti êngao ôh?
Phung đăo brei thâo kral Aê Diê jing Pô phat kđi bruă knuă grăp čô hŏng klei mtăp mđơr, kyua Ñu jing “Pô amâo dlăng mnuih ti êngao ôh”. Aê Diê phat kđi sa čô mnuih amâo tui hlue si kơhưm hlăm ala ƀuôn, bruă klam hlăm Phung Sang Aê Diê, ala čar amâodah ngăn drăp pô anăn ôh, anăn jing mnơ̆ng dhơ̆ng hơăi mang, ară anei adôk mgi luč, ƀiădah Ñu phat kđi hlue si bruă diñu ngă. Tơdah thâo kral leh Aê Diê jing Pô kpă ênô snăk snăn knŏng sa hdră êlan čiăng amâo tŭ ôh klei phat kđi leh anăn dưi bi mơak kơ Aê Diê jing hdĭp huĭ mpŭ kơ Aê Diê (êlan 17). Tơdah hưn bi sĭt kơ Khua Yang kơ Y-Kornei, Khua ƀĭng kna Y-Pêtrôs ăt lač leh: “Y-Pêtrôs ha blŭ leh anăn lač, “Sĭt nik kâo thâo săng kơ Aê Diê amâo yap mnuih mdê mdê ôh, ƀiădah hlăm jih jang găp djuê mnuih Aê Diê tŭ hlei pô huĭ mpŭ kơ Ñu leh anăn ngă klei kpă ênô” (Bruă Phung Khua Ƀĭng Kna 10:34-35). Knuih hdĭp jih ai tiê huĭ mpŭ kơ Aê Diê srăng đru drei amâo ngă klei mgao ôh, ăt kăn bi msĕ hŏng klei mdrŏng sah mơ̆ng phung ƀai, ƀiădah brei thâo răng hlăm klei blŭ, bruă ngă pô ti anăp Aê Diê, ti anăp jih jang mnuih čiăng bi mơak kơ Aê Diê. Khua ƀĭng kna Y-Pôl ăt brei klei bi hmô luă gŭ jih hnơ̆ng tơdah ñu lač: “ƀiădah kâo bi knap asei mlei kâo leh anăn bi mjuăt ñu gưt, huĭdah leh kâo mtô kơ phung mkăn, kâo pô mơh Aê Diê srăng hngah” (I Kôrantô 9:27).
Hŏng kơhưm jing anak “Pô amâo dlăng mnuih ti êngao ôh”, brei drei ksiêm dlăng drei pô amâo dưi čŏng tlaih ôh mơ̆ng klei soh, wăt tơdah yua prăk mah, mnơ̆ng dhơ̆ng ênuk anei ăt kăn dưi bi mtlaih leh drei mơ̆ng klei soh mâo leh aduôn aê leh anăn klei soh drei pô. Ƀiădah Aê Diê bi mtlaih leh drei mơ̆ng klei bi kmhal kơ klei soh hŏng ênoh yuôm snăk, “amâo djŏ hŏng mnơ̆ng thâo rai luč msĕ si prăk amâodah mah ôh Aê Diê bi tui leh diih mơ̆ng klei bhiăn hơăi mang kbiă hriê mơ̆ng phung aê aduôn diih đưm, ƀiădah hŏng êrah yuôm Krist, msĕ si êrah sa drei êđai biăp amâo mâo anôk jhat, amâo mâo anôk djiu ruă ôh” (êlan 18-19). Kyua khăp kơ anak mnuih, Aê Diê mkra leh hdră bi mtlaih mơ̆ng hlăk mphŭn dơ̆ng, mơ̆ng klei Khua Yang Yêsu djiê leh anăn kbiă lŏ hdĭp (êlan 20). Anăn jing tur knơ̆ng kơ drei hơĭt ai tiê dưm klei đăo leh anăn klei čang hmăng pô hlăm Aê Diê (êlan 21).
Tơdah drei hưn Pô amâo dlăng mnuih ti êngao ôh jing Ama, akâo kơ Khua Yang đru drei hdĭp hlue si klei Khua ƀĭng kna Y-Pôl mtô, “Kyuadah Aê Diê blei leh diih hŏng sa ênoh. Snăn bi guh kơang bĕ Aê Diê hlăm asei mlei diih” (I Kôrantô 6:20). Mbĭt anăn brei drei jih ai tiê huĭ mpŭ kơ Aê Diê dôk dơ̆ng ƀơ̆ng huă bi kpă ênô ti krah lăn ala anei.
Drei dôk dơ̆ng ƀơ̆ng huă kpă ênô čiăng kơ knuih hdĭp bi guh kơang Anăn Aê Diê mơ̆?
Wah lač: Ơ Aê Diê jing Ama kpă ênô. Kâo bi mni kơ Khua Yang djiê hrô leh kyua klei soh kâo ti kyâo bi kal. Akâo kơ Yang Mngăt Jăk đru kâo hdĭp doh jăk, srăng myơr asei mlei, mngăt, ai ktang bi guh kơang Anăn Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 34
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
