Rôm 16:25-27
“Bơnê kơ ‘Bok Kei-Dei, Sư boih gơh tơgŭm iĕm lui kơjăp, inh bơtho iĕm tơdrong ‘nao ‘lơ̆ng Yêsu Krist wă kơ iĕm băt Sư gơh ăn kơ iĕm lui kơjăp. Tơdrong Yêsu Krist âu lu kră sơ̆ ưh tam kơtơ̆ng ôh.”
(Rôm 16:25)
Nơ̆r jet tơchĕng pơwao:
– Nơ̆r ư-ang kơ Kră Yang lăm tuch luch kơ thơ Rôm tơ ‘bôh kơ Tơdrong ‘Nao ‘Lơ̆ng mă ‘Bok Pôl đei bơtho noh tơdrong kiơ?
– Tơdrong ‘Nao ‘Lơ̆ng âu đei tơdrong mơsêh păng đei yua thoi yơ?
– Hăm trong ayơ bơ̆n đei klah song Tơdrong ‘Nao ‘Lơ̆ng ăn kơ bơngai jum dăr kơ bơ̆n?
‘Bok Pôl chih pơtôch kơ thơ Rôm âu hăm tơdrong ư-ang kơ ‘Bok Kei-Dei yua kơ Sư gơh pơm ăn tơdrong kơjăp dôm lu bơngai mă sơng iŏk Tơdrong ‘Nao ‘Lơ̆ng đơ̆ng ‘Bok Pôl đei bơtho, nơ̆r ‘Bok Pôl kŭm nhen thoi nơ̆r Kră Yang Yêsu Krist (trong 25). Tơdrong ‘Nao ‘Lơ̆ng ‘bok Pôl đei bơtho ưh kơ lĕnh đơ̆ng kon bơngai mă lei lĕch đơ̆ng Kră Yang ‘Bok Kei-Dei mă sư đei chih đơ̆ng lăm blŭng a kơ thơ: “Inh Pôl chih hơpong kơ iĕm bơngai Rôm. Inh bơngai đĭch đam Yêsu Krist. ‘Bok Kei-Dei krao inh pơm jơ̆ng ‘bang Sư, wă kơ inh năm chă bơtho kơ đe tơdrong ‘nao ‘lơ̆ng Sư.” (Rôm 1:1)
Tơdrong hlơp lăm Tơdrong ‘Nao ‘Lơ̆ng noh jơ̆ tơdrong dŏng pơklaih kon bơngai đơ̆ng Kră Yang ‘Bok Kei-Dei đei pơm lăm Kră Yang Yêsu Krist. ‘nâu kŭm jơ̆ tơm lăm kơ thơ Rôm. Tơdrong Hlơp âu jơ̆ đei ôn đơ̆ng rim kơchăl đơ̆ng sơ̆, kiơ̆ thoi Kră Yang ‘Bok Kei-Dei arih ling lang, đei tơ’bôh pơdah ‘net ‘net đơ̆ng lu bơngai pơtruh nơ̆r ‘Bok Kei-Dei lăm Pah So, păng đei pơdah hơđăl lăm chăl arih Kră Yang Yêsu, a-năn Yang Mă ‘Bar ‘Bok Kei-Dei. Tơdrong ‘Nao ‘Lơ̆ng dŏng pơklaih âu jơ̆ ba ăn đĕch yua kơ tơdrong ‘mêm mơnat tih tin ưh kơ kĕ jô̆ đơ̆ng ‘Bok Kei-Dei păng tơdrong dŏng pơklaih đơ̆ng Kră Yang Yêsu tơ’long pơglang. Kiơ̆ thoi Kră Yang wă, Tơdrong ‘Nao ‘Lơ̆ng kăl kơ ră roi jơ̆p kơ adrĕch adrŭng kon bơngai wă ba ăn kơ tơdrong chu yom lăm tơdrong lui. Rôm jơ̆ anih tơm kơ lăm tơdrong jang sa, tơdrong pơgơ̆r, tơanih ‘noh đei trong năm tơ rim dêh char lăm kơplah chăl noh sơ̆, wă ba ăn Tơdrong ‘Nao ‘Lơ̆ng jơ̆p kơ dêh char.
Tơdrong ‘Nao ‘Lơ̆ng Kră Yang Yêsu ba ăn tơdrong tơplih ‘nao ăn kơ bơngai bu mă sơng iŏk tơdrong dŏng pơklaih hăm đon lui (II Kôrintô 5:17); anih đei tơplih đơ̆ng bơngai yoch trŏ kơ Kră Yang wă sek tơlang gơh jing Kon Kră Yang mă ‘mêm kơ eng, hoei pă wă pơm yoch păng tơdrong yoch ưh pă đei chrih kơ bơ̆n lăm chăl arih. Tơdrong ‘Nao ‘Lơ̆ng Kră Yang Yêsu tơplih lăm chăl arih, tơdrong pơproh dan tơdrong ayơ hơdrol păng kơnhăm lăm chăl arih kơ lu bơngai mă lui kơ Sư. Bơngai Lui Tơpă đei mơn kơ tơdrong hơđơ̆ng hiôk hian lăm teh đak âu păng tơ a-năp đei pơkă pơkăm sĭt gô đei tơpă tơdrong ‘lơ̆ng rŏ lăm pơlei ‘lơ̆ng Kră Yang ‘Bok Kei-Dei. Lu bơ̆n kăl kơ ră roi Tơdrong ‘Nao ‘Lơ̆ng Kră Yang Yêsu đơ̆ng lăm tơdrong tơplih lăm chăl arih bơ̆n, đơ̆ng lăm chăl arih ‘mêm mơnat, đơ̆ng lăm nơ̆r bơ̆n pơm kơdranh tơdrong dŏng pơklaih đơ̆ng Kră Yang Yêsu. Lu bơ̆n kăl kơ Pơ ư-ang kơ Pêng Anăn Yang ‘Bok Kei-Dei đơ̆ng jơ âu truh tơ ning mônh ling lang.
Ơ Kră Yang, Inh ư-ang kơ Ih yua kơ Ih đei tơbôh ăn kơ inh tơdrong hlĭch chrơp hlơp dêh na ăn kơ đĭ đăng kon bơngai băt hơđal lăm Kră Yang Yêsu Krist! Bơnê kơ Ih đei ăn tơdrong mơnat lăm tơdrong dŏng pơklaih păng ăn kơ Inh đei tơdrong arih ling lang. Apinh Ih ăn kơ inh lui kơjăp păng ăn kơ inh Yang Bơhngol ‘Lơ̆ng wă kơ inh đei tơdrong pran đơ̆ng Ih, păng ‘maih wă ră roi Tơdrong ‘Nao ‘Lơ̆ng ăn kơ lu bơngai ưh tam mă băt bơ̆t jum dăr kơ Inh. Yua anăn Kră Yang Yêsu Krist. Amen
Tơdrong arih Ih thoi yơ wă kơ Ih ling lang tơ’bôh Ih ling lang ư-ang kơ ‘Bok Kei-Dei?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: II Hơ’mon 29
Kênh Youtube BHKTHN:
