Klei Aê Diê Blŭ: Rôm 16:25-27
Êlan kliăng: “Mpŭ mni kơ Pô dưi bi kjăp diih tui si klei mrâo mrang jăk kâo leh anăn klei mtô klei Yêsu Krist, tui si klei bi êdah klei hgăm Aê Diê mdăp leh êjai lu ênuk êlâo” (Rôm 16:25)
Klei êmuh ksiêm mĭn: Klei mpŭ mni knhal tuč hră Rôm bi êdah ya jing Klei Mrâo Mrang Jăk Khua ƀĭng kna Y-Pôl mtô? Si klei myang leh anăn klei hmăi mơ̆ng Klei Mrâo Mrang Jăk anei? Hŏng ya hdră êlan drei hiu hưn Klei Mrâo Mrang Jăk kơ phung riêng gah pô?
Khua ƀĭng kna Y-Pôl bi ruĕ hră Rôm hŏng klei mpŭ mni kơ Aê Diê kyua Aê Diê mâo klei dưi bi kjăp ai tiê hlei phung mă tŭ Klei Mrâo Mrang Jăk ñu dôk mtô, ăt jing Klei Blŭ mơ̆ng Khua Yang Yêsu Krist (êlan 25). Klei Mrâo Mrang Jăk Y-Pôl mtô amâo hriê mơ̆ng anak mnuih ôh ƀiădah hriê mơ̆ng Aê Diê msĕ si klei ñu čih leh akŏ hră: “Kâo gơ̆ Y-Pôl, jing sa čô dĭng buăl Yêsu Krist Aê Diê iêô brei jing khua ƀĭng kna, leh anăn čuăn pioh kơ bruă hưn klei mrâo mrang jăk Aê Diê” (Rôm 1:1).
KIei yuôm bhăn dưi bi êdah jing hdră Aê Diê bi mtlaih anak mnuih dưi ngă kyua Khua Yang Yêsu Krist. Anei ăt jing boh phŭn mơ̆ng hră Rôm. Klei yuôm bhăn anei tuôm mdăp hgăm lu ênuk êlâo, leh anăn hlue si klei blŭ Aê Diê pô hdĭp, ƀrư̆ ƀrư̆ bi êdah hlăm klei hưn êlâo ênuk Klei Bi mguôp Hđăp, leh anăn lŏ bi êdah kluôm dhuôm hlăm Khua Yang Yêsu Krist, Aê Diê Pô Tal Dua. Klei Mrâo Mrang Jăk bi mtlaih bŏ hŏng klei pap anei dưi brei amâo mâo ya klei mtui ôh kyua klei khăp Aê Diê êbeh dlai leh anăn klei bi mtlaih mơ̆ng Khua Yang Yêsu ti kyâo bi kal. Hlue si klei Khua Yang čiăng, Klei Mrâo Mrang Jăk anei brei bi êdah kơ jih jang djuê ana čiăng ba jih jang mnuih truh kơ klei đup gưt kơ klei đăo. Rôm jing anôk phŭn bruă mnia blei, kđi čar, mâo êlan klông găn êrô truh kơ djăp krĭng kwar kluôm rŏng lăn ênuk anăn, đru kơ bruă hiu hưn Klei Mrâo Mrang Jăk Aê Diê hlăm djăp anôk ti lăn ala.
Klei Mrâo Mrang Jăk mơ̆ng Khua Yang Yêsu ba klei hdĭp mrâo kluôm dhuôm kơ hlei pô mă tŭ klei pap bi mtlaih mơ̆ng Khua Yang kyua klei đăo (II Kôrantô 5:17); dưi bi mlih mơ̆ng sa čô mnuih soh tŭ klei Khua Yang phat kđi dưi jing anak Ñu khăp hơiêng, mâo klei êngiê mơ̆ng klei kă leh anăn klei mâo kđi kơ klei soh. Klei Mrâo Mrang Jăk Khua Yang Yêsu bi mlih klei mĭn hdĭp, klei dăp pruê̆ êlâo êdei hlăm klei hdĭp leh anăn klei kñăm čiăng kơ klei hdĭp phung mă tŭ Khua Yang. Phung đăo sĭt kơ Krist thâo kral kơ sa klei hdĭp êđăp ênang jăk mơak hlăm klei hdĭp anei leh anăn mâo klei rơ̆ng kơ hruê êdei anăp guh kơang hlăm Ƀuôn Ala Mtao Aê Diê. Brei drei hiu hưn Klei Mrâo Mrang Jăk Khua Yang Yêsu hŏng klei hdĭp drei pô mâo leh klei bi mlih, mơ̆ng knuih hdĭp thâo khăp, leh anăn mơ̆ng klei hưn bi sĭt kơ klei bi mtlaih mơ̆ng Khua Yang Yêsu. Brei drei hrăm mbĭt bi mni kơ Aê Diê Tlâo Čô Yang mơ̆ng ară anei tơl truh hlŏng lar.
Si knuih hdĭp drei mâo čiăng bi êdah kơ klei drei mpŭ mni nanao kơ Aê Diê?
Wah lač: Ơ Khua Yang, kâo bi mni kơ Ih kyua Ih bi êdah leh klei myang kơ jih jang mnuih dưi thâo hlăm Khua Yang Yêsu Krist! Bi mni kơ Khua Yang kơ klei pap bi mtlaih leh anăn klei hdĭp lă lar Ih brei leh kơ kâo. Akâo kơ Khua Yang bi kjăp klei đăo kâo leh anăn akâo kơ Yang Mngăt Jăk Ih đru kâo jing ktang, hur har hlăm klei hiu hưn Klei Mrâo Mrang Jăk kơ phung ka thâo kral Ih riêng gah kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 29
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
