Êphêsô 1:15-23
“Inh ling lang krao khan bơnê kơ ‘Bok Kei-Dei, yua kơ inh kơtơ̆ng đe khan iĕm oei lui kơ Kră Yang Yêsu kơjăp, hăm iĕm băt ‘mêm mơnat kơ tơduă bôl buăl kon ‘Bok Kei-Dei.” (Êphêsô 1:15, 16)
Nơ̆r jet tơchĕng pơwao:
– ‘Bok Pôl hlôi pơm kiơ kơplah sư kơtơ̆ng gah đon lui păng tơdrong ‘mêm lu bơngai lui tơ pơlei Êphêsô?
– Bơ̆n krao khan thoi yơ wă kơ tơdrong lui lu bơngai lui bơ̆n wơ̆ tŏk?
Lăm lơ lu kơthơ ‘bok Pôl chih ăn kơ lu Khul Lui, sư ngăl pơma ‘bơm kơ tơdrong sư “’blŏk kơ lu ‘nhŏng oh kơplah krao khan” (tr.16). Tơ âu, lăp sư kơtơ̆ng gah đon lui păng tơdrong ‘mêm lu bơngai lui tơ pơlei Êphêsô, sư đĭ jơhngơ̆m bơnê kơ Kră Yang, sư hiôk yua, păng sư ling-lang ‘blŏk kơ lu bơngai lui ei kơplah sư krao khan tang.’Nâu bơih nơ̆r pơlung tơiung lu kon pơlei Kră Yang lăm Khul Lui pơlei Êphêsô.
Ưh kơ dơ̆ng ‘bơ̆t doh, ‘bok Pôl tơbăt dơ̆ng wă kơ lu bơngai lui băt kơ sư hlôi krao khan apĭnh Kră Yang ăn kơ lu sư “’Bok Kei-Dei ‘Bă Yêsu Krist Yŏng bơ̆n, Sư ‘Bă tơm kơ đĭ đăng păng Sư Yang tih tơpă, na inh ưh kơ hiơt krao khan apinh Sư tơgŭm iĕm hơgei, hăm tơhlôh ăn kơ iĕm tôm tơdrong Sư.” wă khan tơdrong gơh hơgei păng tơ’bôh wă kơ lu sư băt kơnăl kơ Kră Yang jrŭ hloh dơ̆ng (tr.17). Lu sư kăl kơ đei Yang Bơhngol ‘Lơ̆ng pơchrang hơdah wă kơ gơh hlôh dôm tơdrong Kră Yang wă păng pơm kiơ̆ hloi. ‘Bok Pôl krao khan apinh “Kră Yang pơchrang ăn măt jơhngơ̆m lu bơngai lui Pơlei Êphêsô” (tr.18) noh wă pơma kơ tơdrong hlôh băt gah bơhngol jrŭ hlom, mơn đei tơdrong sĭt, tơdrong ‘mêm đơ̆ng Kră Yang rơđah hơđăl. Tơdrong ‘nâu sư hloh kơ tơdrong hlôh wao kon bơngai bơ̆n, tơdrong noh hơtŭt jơhngơ̆m lăm to kon bơngai bơ̆n. Đơ̆ng tơdrong noh tơgŭm ‘me rong lu sư pơgơ̆p tơtil Kră Yang ‘Bok Kei-Dei hloh dơ̆ng.Sư hơpơi wă kơ lu bơngai lui băt kơ tơdrong hơmĕng mă Kră Yang krao, ‘măn ăn chăl arih lu sư. Tơdrong ‘nâu ba ăn tơdrong gĭt yua kơ lu sư, păng chông trong tơdrong arih lu sư tơ anăp, pơm hơnă tơm wă kơ lu sư lui pơm kiơ̆ nơ̆r Kră Yang kơjăp.
‘Bok Pôl kư̆m krao khan tơgŭm lu bơngai lui tơ âu wă kơ lu sư băt kơ’Bok Kei-Dei mơdrŏng đei tôm tơmam ‘lơ̆ng rŏ. Tơdrong ‘noh wă khan dôm tơdrong hiôk’lơ̆ng,tơdrong apah bơnê, tơdrong arih ling-lang oei răp gô, oei ‘măn ăn lu bơngai lui, lu kon Kră Yang wă iŏk yua tơmam Sư pơsư̆ noh tơ Dêh char Sư tơ plĕnh ti. Tuch luch, ‘bok Pôl wă kơ lu bơngai lui gơh hlôh tơdrong ‘Bok Kei-Dei mơsêh mơyang tih-tin tơgŭm dŏng lu bơngai lui kơ Sư. Tơdrong mơsêh tih-tin ‘noh hlôi tơiung arih Kră Yang Yêsu đơ̆ng lôch na pôk hơtŏk Kră Yang Yêsu pơm tih, tih hloh kơ đĭ-đăng lu yang,đĭ-đăng lu yŏng pơgơ̆r, Sư pơgơ̆r đĭ-đăng lu yang, lu yŏng pơtao…’Noh bơih mơsêh mơyang ‘lơ̆ng rŏ wei pơgơ̆r chăl arih lu bơngai lui wă kơ lu sư kĕ jei păng jang pơkeh tơdrong Kră Yang ‘Bok Kei-Dei kơnhăm wă tơ teh đak âu.
Nơ̆r ‘Bok Pôl krao khan ‘nâu tơ’bôh jơhngơ̆m sư ‘blŏk hiơ̆k kơ lu bơngai lui wă kơ tơdrong lui lu sư hlôh tơdrong ‘Bok Kei-Dei mă jrŭ, wă kơ tơdrong lui lu sư wơ̆ kơjăp.‘Bok Pôl hơpơi wă kơ lu bơngai lui mơn đei tơdrong pơgơ̆p tơ’bưh hăm Kră Yang’lơ̆ng tôm yua kơ đơ̆ng Kră Yang tơ’bôh, đơ̆ng lu sư hlôh băt,lu sư chang hơmĕng, lu sư kon Kră Yang,gơh iŏk tơmam Kră Yang pơsư̆,păng lu sư arih tơ’bôh lu sư đei tơdrong mơsêh Kră Yang. Rim ‘nu bơ̆n dang ei kư̆m athei thoi noh mơ̆n, tơdrong‘bok Pôl hơpơi lu bơngai lui sơ̆ thoi yơ, tơdrong hơpơi bơ̆n dang ei kư̆m thoi noh mơ̆n kơplah bơ̆n krao khan dŏng tang lu bơngai lui.
Ơ Kră Yang,inh apinh tơgŭm inh ling-lang ‘blŏk kơ lu ‘nhŏng oh lăm Khul lui kơplah inh krao khan. Yua kơ đơ̆ng tơdrong ‘noh inh hăm kon pơlei Ih wei kơjăp đon lui, đei mơsêh pran đơ̆ng Ih kĕ pŭ iŏk tơdrong pơlong păng huay kơ bơ̆l hăl lăm tơdrong lui kơkuh kơ Ih dĭng truh năr tơ’bơ̆p Ih. Inh krao khan yua anăn Kră Yang Yêsu Krist, Amen!
Jơhngơ̆m bơ̆n hăm ‘blŏk hiơ̆k, krao khan dŏng tang lu ‘nhŏng oh bơngai lui bơ̆n ưh?
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 9.
Kênh Youtube BHKTHN:
