Phau Ntawv Nkauj 78:1-8
Nqe cim:
“Ua li no lawv thiaj yuav cia siab rau Vajtswv thiab nco ntsoov tej haujlwm uas nws tau ua los lawm, thiab niaj hnub coj raws li Vajtswv tej lus samhwm” (Ntawv Nkauj 78:7)
Lus nug rau sawvdaws xav:
– Tus sau phau ntawv nkauj nqua hu cov pejxeem yam dabtsi?
– Nws hais meej qhov tseemceeb thiab lub homphiaj qhia menyuam li cas?
– Peb pheej nyiam qhia yam dabtsi rau peb tej menyuam ua ntej?
Ntawv Nkauj 78 yog cov lus sib dhos uas yog Axas (Axafes) neeg Levis sau. Nws yog thawjcoj thiab qhia nkauj rau tiam Vajntxwv Daviv kav (1 Xwmtxheej Vajntxwv 16:4-5). Qhib thawj hauv tshooj ntawv nkauj no, Axas nqua hu cov pejxeem txhua tus mloog nws tej lus qhuab qhia, yog yam uas lawv cov yawgkoob tau hais tseg cia txog Vajtswv lub koommeej thiab Nws lub hwjchim dhau los ntawm txhua ntu caij nyoog pub rau cov uas nyob tiam tom qab paub. Feem xyuam ntawm cov Yixalayees tiam no txuas mus rau tiam tom qab mas yuav tsum qhia Vajtswv rau yus tej xeeb ntxwv thiab piav Vajtswv rau tiam tom qab paub(Yaus-ees 1:3; 2 Kevcai 6:7-9).
Thaum sau tshooj nkauj no, tus uas sau qhov kev ntshaw tshaj yog tiam tom qab yuav tsum kawm paub yus keebkwm dhau los ntawm cov uas mus ua ntej tej lus qhia. Lub homphiaj yog pab kom lawv tsis poob rau kev txhaum, lossis tso kev ntseeg tseg tiamsis kom lawv tso siab plhuav tas nrho rau Vajtswv. Nws hais meej hais tias kev cob qhia rau tiam tom qab yog pab kom cov menyuam tsis hnov qab tej uas Vajtswv tau ua pab lawv cov yawgkoob lawm thiab paub ceev Vajtswv tej kevcai (nqe 7). Vajtswv tsis yog “muab kevcai cob rau cov Yixalayees; thiab muab kaum nqe kevcai cob rau Yakhauj cov xeebntxwv tiamsis Nws samhwm kom peb cov yawgkoob muab nws tej kevcai qhia lawv cov menyuam” (nqe 5). Nov yog ib lo lus samhwm! Vajtswv taij kom cov ua niam ua txiv yuav tsum muaj feem xyuam qhia yus cov menyuam, cov xeeb ntxwv hauv tsev neeg kom pab lawv paub Vajtswv thiab tas siab vamkhom Nws. Tus sau kuj rov hais txog cov yawgkoob Yixalayees tau sawv tawmtsam tus Tswv. Lawv tau sawv tsis ruaj rau hauv kev ntseeg thiab ua tsis ncaj ncees rau Vajtswv. Thiab lawv twb tau ris tej nujnqis hauv kev tsis mloog lus lawm.
Pawg Ntseeg niaj hnub nimno cheem tsum nqis peev nyiaj txiag, dag zog qhia Vajtswv Txojlus rau tiam hluas. Thiab tsis hnov qab ntuas cov uas yog niam txiv, pog yawg yuav tsum hmov tshua thov Vajtswv rau yus cov menyuam, cov xeeb ntxwv thiab qhia kev ntseeg rau lawv vim lawv yuav pab tau Pawg Ntseeg rau yav tom ntej no. Kev qhia Vajtswv tej kevcai rau tiam tom qab tseemceeb kawg nkaus thiab sai li sai tau kom cov menyuam sawv ruaj hauv kev ntseeg thiab paub mloog Vajtswv lus. Cov menyuam, cov xeeb ntxwv cheem tsum paub meej Vajtswv haivneeg tej keebkwm kom paub meej tej haujlwm uas Vajtswv tau ua thiab ceev Nws tej lus qhia. Thiab tagnrho tej uas cov yawgkoob yuam kev, tawv ncauj, tawmtsam, tsis ncaj ncees rau Vajtswv kuj tsis tsimnyog peb muab zais tiamsis yog ib zaj kawm pab rau cov menyuam, cov xeeb ntxwv tsis yuam kev li yus cov yawgkoob (nqe 8). Dhau qhov ntawd, peb cov menyuam yuav tsis cia siab rau tibneeg tiamsis “… lawv thiaj yuav cia siab rau Vajtswv thiab nco ntsoov tej haujlwm uas nws tau ua los lawm, thiab niaj hnub coj raws li Vajtswv tej lus samhwm” (nqe 7).
Thov Vajtswv,
Vajtswv, thov Koj ntuas qhia nyuam yaus tsis txhob hnov qab qhia Koj tej kevcai rau cov menyuam, cov xeeb ntxwv ceev Koj tej kevcai kom mus txog thaum laus los lawv tsis tso Koj tej kevcai tseg. Thov Vajtswv Koj pab rau tiam txuas ntxiv paub hlub Koj thiab cia siab rau Koj. Nyuam yaus tuav Tswv Yexus Khetos lub npe thov, Amees.
Peb puas tau thov Vajtswv thiab qhia Nws Txojlus rau peb cov menyuam li Vajtswv tej samhwm lawm?
Nyeem Vajluskub hauv peb lub xyoos: 2 Xwmtxheej Vajntxwv 6
Kênh Youtube BHKTHN:
