I Pêtrôs 1:8-12
“’Bok Kei-Dei tơbăt kơ lu sư dôm tơdrong lu sư wă pơma khan lê̆ hơdrol noh, Sư ưh kơ ăn truh chăl arih lu sư ôh, Sư ăn truh chăl arih lu bơ̆n dang ei. Thoi noh na ‘Bok Kei-Dei ăn Yang Bơhngol ‘Lơ̆ng Sư jur oei hăm lu ‘bok bơtho tơdrong ‘nao ‘lơ̆ng Yêsu Krist, na lu ‘bok bơtho noh roi tơbăt kơ iĕm boih tơdrong Sư wă pơklaih bơ̆n noh. Lu linh jang kơpal plĕnh kư̆m wă kơ hlôh tơdrong ‘noh mơ̆n.” (I Pêtrôs 1:12)
Nơ̆r jet tơchĕng pơwao:
– Lu bơngai pơtruh nơ̆r Pah so khan lê̆ adrol păng băt hơđăl tơdrong dŏng pơklaih thoi yơ?
– Lu bơngai lui đơ̆ng chăl noh sơ̆ đei Kră Yang mơnat ăn băt gah tơdrong Dŏng pơklaih liơ?
– Hlôh băt tơdrong hlĭch chrơp ‘nâu tơgŭm kơ đon lui lu bơ̆n thoi yơ?
Lu bơngai pơtruh nơ̆r ‘Bok Kei-Dei sơ̆ “lu sư khan lê̆ kơ bơ̆n adrol gah tơdrong ‘Bok Kei-Dei ‘mêm mơnat wă tơgŭm bơ̆n dang ei.” Wă khan tơdrong dŏng pơklaih đơ̆ng Yêsu Krist wă ‘măn kơ đe bu mă ‘mêm păng lui kơ Kră Yang Yêsu Krist (trong 10). Ưh kơ sĭ lu sư ưh kơ đei yua tơdrong gơh hơgei păng tơdrong hơgei kơdih wă khan lê̆ adrol gah tơdă tơdrong ‘Bok Krist dŏng pơklaih “Yua kơ dôm tơdrong lu sư khan lê̆ hơdrol noh, ưh kơ đei lĕch đơ̆ng kon bơngai ôh. ‘Bok Kei-Dei yua ‘bơ̆r kon bơngai đĕch na bơ̆n lăng thoi ‘bơ̆r kon bơngai. Mă tơpă đơ̆ng Yang Bơhngol ‘Lơ̆ng bơtho tơbăt kơ lu sư.” (II Pêtrôs 1:21) Yang Bơhngol ‘Lơ̆ng bơtho tơbăt păng roi tơbăt wă kơ lu sư gơh “Yang Bơhngol ‘Lơ̆ng Yêsu Krist oei hơdai hăm lu sư, ăn kơ lu sư jing bơngai khan lê̆ hơdrol gah tơdrong ‘Bok Krist gô đei tơdrong pơmat, klaih kơ noh Sư gô pơgơ̆r đĭ đăng. Mă-lei lu sư ưh kơ băt tơdrong noh wă truh layơ, sư thoi yơ, na lu sư adrin pơhrăm wă kơ băt tơdrong noh.” (trong 11).
Mălei mă khan adrin dang yơ hĭ, lu bơngai pơtruh nơ̆r ‘Bok Kei-Dei sơ̆ oei ưh kơ hlôh tơdrong noh truh layơ păng truh thoi yơ. Mă khan lei lu sư chu iŏk pơmat, pơm pơgŏ pơđep, đe pơm kơnê̆ păng chu lôch yua kơ ‘Bok Kei-Dei wă pơma khan ưh kơ sĭ yua kơ lu sư na yua kơ bơ̆n. Tơdrong tơdă tơdrong ‘Bok Kei-Dei dŏng pơklaih đơ̆ng Kră Yang Yêsu Krist noh tơdrong mơsêh hlĭch dêh yua kơ Kră Yang pơjing lu hơtăl plĕnh păng teh hăm nơ̆r Sư sơkat đĕch, mălei wă dŏng pơklaih kon bơngai klaih đơ̆ng tơdrong yoch, Kră Yang mă ‘bar đe gô tơpŭ kơ Sư, chu lôch păng iung arih, ding mah “lu Linh jang kơpal plĕnh kư̆m wă kơ hlôh tơdrong noh mơ̆n.” (trong 12).
Lu bơngai lui Juđê chăl noh sơ̆ đei kơtơ̆ng nơ̆r lu bơngai pơtruh nơ̆r ‘Bok Kei-Dei sơ̆, đei đŏk kơthơ ‘nâu đơ̆ng ‘bok Pêtrôs, đei ‘bôh păng măt tơdrong pơmat tat păng tơdrong Kră Yang Yêsu iung arih, sư mơn băt Kră Yang. ‘Nâu bơih tơm tơdrong kơjăp tơgŭm kơ lu sư lui kơ Kră Yang Yêsu Krist tơpă. Păng ‘nâu kư̆m tơdrong bơtho pơlung tih wă kơ lu bơngai lui chăl noh sơ̆ chu iŏk tơdrong pơlong, păng đĭ đăng kơ bơ̆n dang ei, rai băt hơđăl gah tơdrong dŏng pơklaih mă bơ̆n oei lui. Hlôh băt dôm tơdrong hlĭch chrơp ‘nâu tơgŭm kơ bơ̆n rai pơ̆n nuih, wei kơjăp đon lui ding truh năr iŏk tơdrong dŏng pơklaih tôm gah sĕch akar, jơhngơ̆m, bơhngol kơplah Kră Yang Yêsu jur dơ̆ng.
Ơ Kră Yang mă iơ̆m dim păng ‘bĕnh tơdrong ‘mêm mơnat. Inh bơnê kơ Ih yua kơ tơdrong dŏng pơklaih tih tin Ih đei ăn kơ kon bơngai păng inh kơdih. Apinh Kră Yang thim jơhngơ̆m pran păng ăn tơdrong hlôh wao wă kơ inh rai băt hơđăl tơdrong lui inh lui kơ tơdrong Ih dŏng pơklaih, wă kơ inh đĭ jơhngơ̆m tơnăp păng bơ̆jang kơ Ih truh tôch. Yua anăn Kră Yang Yêsu Krist, Amen.
Bơ̆n pơm thoi yơ wă kơ băt hơđăl kơ bơ̆n gah tơdrong Kră Yang dŏng pơklaih lu bơ̆n?
Băt hơđăl Kră Yang pơklaih bơ̆n
Jơhngơ̆m kơjăp lăm đon lui rim năr
Mơn băt kơ Kră Yang tơ’bôh
Hlôh băt tơdrong pŭ hiôk ‘bĕnh blai đơ̆ng Yang ‘Bă
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 2
Kênh Youtube BHKTHN:
