I Pêtrôs 1:8-9
“Đơ̆ng sơ̆ iĕm ưh kơ ‘bôh Yêsu Krist thoi yơ, mă iĕm ‘mêm kơ Sư tơpă. Dang ei iĕm kư̆m ưh kơ ‘bôh Sư mă iĕm kư̆m lui kơ Sư kơjăp, jơhngơ̆m iĕm hiôk ling lang măng năr.” (I Pêtrôs 1:8)
Nơ̆r jet tơchĕng pơwao:
– Yua kơ kiơ ‘bok Pêtrôs bơtho bơngai lui ‘mêm păng lui kơ Kră Yang mă khan ưh kơ ‘bôh Sư?
– Đon lui ngeh thoi noh gô đei tơdrong pŭn hiôk kiơ?
– Bơ̆n yua iŏk ‘bai pơhrăm ‘nâu ăn kơ bơ̆n păng kơ tơdrong jang ră roi kơdranh thoi yơ?
Hăm trŏ kơ ‘bok Pêtrôs sư chă pơma ngôi kư̆ kă đĕch ưh kơplah sư bơtho lu bơngai lui mă arih tơklah tơklang chu đe pơm kơnê̆ yua kơ lui ngeh khan mă ưh kơ ‘bôh Kră Yang Yêsu mălei ‘nhŏng oh ‘mêm kơ Sư, mă khan tam mă tơ’bơ̆p Kră Yang Yêsu mălei ‘nhŏng oh oei lui kơ Sư păng oei chơt hiôk dêh păng ‘bĕnh tơdrong ưang (trong 8)? Đơ̆ng rŏng kơ iung arih, Kră Yang Yêsu kư̆m đei khan bơih kơ lu bơngai pơhrăm păng Sư păng hăm ‘bok Thôm, sư khan ‘bôh ‘mơ̆i na lui “Mă-lei Yêsu khan kơ sư: Ih ‘bôh Inh boih, thoi noh ih lui. Lu bơngai bu mă ưh kơ ‘bôh Inh, mă-lei sư lui, ‘noh hiôk tơpă kơ lu sư.” (Yôhan 20:29). ‘Bok Pêtrôs ưh kơ đei bu athrei sư lui păng ‘mêm, sư kư̆ kơ ‘mêm păng lui kơ Kră Yang Yêsu. Nơ̆r Kră Yang lăm âu ưh kơ đei bơtho kơ bơ̆n ‘mêm păng lui dôm tơdrong mă ưh kơ băt hơđăl, mălei ‘mêm păng lui kiơ̆ kơ hơnă tơm kơjăp. Đon lui thoi noh ba ăn kơ bơngai lui ‘bar tơdrong pŭn hiôk. Lăm chăl dang ei, đei tơdrong chơt hiôk ưh kơ kĕ roi khan oei tơ’bơ̆p hăm lơ tơdrong pơmat. Păng tơ anăp ning mônh ‘noh anih gơh iŏk tơdrong dŏng pơklaih ling lang hăm tơdrong Kră Yang Yêsu pơgơ̆r oei hơdai. Dôm tơdrong pŭn hiôk noh pơlung kon pơlei Kră Yanqg ‘nĕ kơ sơngah kơ tơdrong lui mă kơplah tơ’bơ̆p tơdrong gleh pơlong.
Dang ei, bơ̆n kư̆m ‘mêm păng lui kơ Kră Yang đơ̆ng Sơ̆p Hla bơar ‘Bok Kei-Dei, kư̆m nơ̆r tơbăt đơ̆ng lu bơngai đêl ‘bôh păng arih hăm Kră Yang đei chih. Mă kăl loi noh đơ̆ng tơdrong arih bơ̆n hlôi mơn hăm Kră Yang jơ̆ Tơ’ngla mă arih lăm bơ̆n. Lơ bơngai năm tơ Kră Yang mălei đon lui ưh kơ ngeh, năm tơ hnam akŭm yua kơ hli kơ phak lăm dơnâu ŭnh dah mă ‘maih chă lu tơdrong pŭn hiôk kơ mŭk tơmam. Đei bơngai kiơ̆ Kră Yang yua kơ đơ̆ng hnam dơnŏ pơgŏ, dah mă wă kơ đei iŏk ŭnh om thoi bơ̆n wă.v.v… Kră Yang wă kơ bơ̆n adrin pơhrăm nơ̆r Kră Yang wă kơ băt păng mơn gah Kră Yang rai hloh wă kơ bơ̆n ‘mêm păng lui kiơ̆ Tơ’ngla mă bơ̆n ưh kơ ‘bôh păng măt mălei ‘bôh hăm đon lui.
Păng bơ̆n kư̆m yua iŏk ‘bai pơhrăm ‘nâu dah bơ̆n năm ră roi gah Kră Yang, kăl kơ roi tơblang kơ bơngai tam mă lui băt gah tơdrong yoch, băt kơ Kră Yang Yêsu đei lôch tang tơdrong yoch lu sư, păng Sư iung arih dơ̆ng wă arih lăm bơngai mă lui kơ Kră Yang ‘nĕ pơgŏ bơngai tam mă lui yua kơ lu sư tam mă hlôh păng tam mă băt Tơ’ngla mă lu sư lui, đei pơm kiơ kơ lu sư. Tam mă ‘bôh Kră Yang na khan ‘mêm kơ Sư, tam mă ‘bôh Kră Yang na khan lui mălei tơdrong ‘nâu ưh kơ đei pơma ngôi kư̆ kă ôh.
Ơ Kră Yang ‘Bok Kei-Dei, bơnê kơ Ih ‘Bă yua kơ Ih ăn Nơ̆r Ih wă kơ inh hŏk pơhrăm păng lui. Apinh ‘Bă tơgŭm inh băt hơđăl inh lui kơ Kră Yang tơpă, jơ̆ Tơ’ngla mă inh ưh kơ ‘bôh păng măt, mălei ‘mêm păng lui. Yua anăn Kră YangYêsu Krist, Amen.
Bơ̆n hăm ‘mêm păng lui kơ Kră Yang hăm đon lui kơjăp tơpă ưh?
Ưh kơ ‘bôh Kră Yang, mălei Sư oei dui
Lui kơ Kră Yang tih hloh, mă khan ưh kơ ‘bôh
Hlôh dôm tơdrong pŭn hiôk Kră Yang hlĭch tih
Tơplih tơdrong arih, wă bơ̆jang kơ Sư
Đŏk Sơ̆p Hla bơar ‘Bok Kei-Dei lăm pêng sơnăm: II Hơ’mon 1
Kênh Youtube BHKTHN:
