Klei Aê Diê Blŭ: II Klei Yăl Dliê 32:2-8
Êlan kliăng: “Jing ktang bĕ leh anăn dôk jhŏng. Đăm huĭ amâodah êdu ai ôh ti anăp mtao Asiri leh anăn jih jang phung kahan lu mbĭt hŏng ñu; kyuadah mâo sa čô pô mbĭt hŏng drei jing prŏng hĭn kơ pô dôk mbĭt hŏng ñu” (II Klei Yăl Dliê 32:7)
Klei êmuh ksiêm mĭn: Tơdah thâo arăng dơ̆ng wang blah, si hdră gang mkhư̆ Mtao Hêsêkia ngă? Si mtao bi mđĭ ai phung khua kahan leh anăn phung ƀuôn sang? Tơdah tuôm hŏng klei dleh dlan, si Klei Aê Diê Blŭ bi mđĭ ai drei?
Tơdah Mtao Sênakêrip mơ̆ng Asiri dơ̆ng wang blah Yêrusalem, Mtao Hêsêkia bi trông čhai hŏng phung khua kahan jhŏng ktang čiăng bi kdơ̆ng hŏng tlâo hdră. Tal sa, bư̆ hĕ akŏ êa ti êngao ƀuôn Yêrusalem čiăng kơ phung kahan Asiri amâo dưi mâo êa ôh. Phung ƀuôn sang hlăm ƀuôn mâo leh phŭn êa hgăm đoh mơ̆ng nah êngao mŭt hlăm ƀuôn. Snăn phung ƀuôn sang hlăm ƀuôn ăt mâo êa mnăm mơh, bi phung kahan roh snăn kƀah êa. Tal dua, mtao brei čuăn ngă bruă lŏ mdơ̆ng mnư̆ klưh leh, leh anăn mdơ̆ng sang tum ti dlông gơ̆, leh anăn ti êngao ñu mdơ̆ng mnư̆ mkăn; leh anăn ñu bi kjăp Milô ti gŭ mtih ƀuôn Yêrusalem. Mtao ngă msĕ mơh lu êbeh mnơ̆ng bi blah leh anăn khil. Tal tlâo, mtao mdưm phung khua kahan kiă kriê phung ƀuôn sang, leh anăn bi kƀĭn digơ̆ mbĭt hŏng ñu hlăm wăl ti ƀăng jang ƀuôn leh anăn blŭ klei bi mđĭ ai kơ digơ̆. Mtao bi mđĭ ai digơ̆ jing ktang bĕ leh anăn dôk jhŏng, đăm huĭ amâodah êdu ai ôh ti anăp mtao Asiri leh anăn jih jang phung kahan lu mbĭt hŏng ñu; kyuadah mâo sa Pô mbĭt hŏng drei jing prŏng hĭn kơ pô dôk mbĭt hŏng mtao Asiri. Phung anei knŏng knang kơ ai ktang anak mnuih bi Mtao Hêsêkia leh anăn phung ƀuôn sang Yuđa mâo Aê Diê myang snăk dôk mbĭt čiăng đru leh anăn bi blah brei kơ diñu. Tơdah hmư̆ klei anei, phung kahan leh anăn phung ƀuôn sang hơĭt ai tiê.
Wăt tơdah mprăp leh djăp mta klei čiăng bi kdơ̆ng hŏng phung roh ƀiădah Mtao Hêsêkia leh anăn phung ƀuôn sang ăt thâo jih jang mnư̆ ƀuôn prŏng, phung kahan, kdrăp mnơ̆ng bi blah anăn srăng jing hơăi mang tơdah amâo mâo Aê Diê, Pô ktang hĭn kơ jih jang phung roh dôk mbĭt. Wăt tơdah hlăm klei dleh dlan, luč klei čang hmăng ƀiădah hŏng klei đăo knang mâo Aê Diê dôk mbĭt đru leh phung Yuđa ƀuh amâo lŏ huĭ ôh, amâo lŏ rŭng răng ôh. Diñu amâo dlăng kơ klei arăng dơ̆ng wang blah ôh, phung roh lu ôh, ƀiădah dlăng kơ Aê Diê jing Pô myang êdi dôk mbĭt.
Hruê anei, phung đăo ăt srăng tuôm hŏng klei dleh wang jŭm dar, leh anăn mâo mơh tăp năng djăp mta klei msĕ si luč klei čang hmăng. Tơdah tuôm hŏng boh klei msĕ snăn, đăm êdu ai leh anăn luč klei čang hmăng ôh ƀiădah brei nao kơ Khua Yang hlăm klei kkuh mpŭ, wah lač leh anăn ksiêm mĭn Klei Aê Diê Blŭ čiăng mâo klei bi juh, klei đru mơ̆ng Aê Diê. Klei yuôm bhăn hĭn tơdah tuôm hŏng klei dleh dlan hlăm klei hdĭp jing drei đăm wơr ôh drei mâo Aê Diê dôk mbĭt, leh anăn Pô dôk mbĭt hŏng drei ktang hĭn kơ jih jang klei dưi, jih jang klei dleh dlan drei. Drei ăt ngă jih bruă klam pô, ƀiădah hlăm djăp boh klei, brei drei knang kơ Khua Yang čiăng găn jih klei dleh dlan msĕ si Mtao Hêsêkia, khua kahan leh anăn phung ƀuôn sang mphŭn dô.
Tơdah tuôm hŏng dleh dlan, drei dlăng kơ boh klei mâo amâodah jih ai tiê dlăng kơ Aê Diê Pô myang hĭn, Pô dôk mbĭt hŏng drei?
Wah lač: Ơ Khua Yang, grăp blư̆ tuôm hŏng klei dleh dlan hlăm klei hdĭp, akâo kơ Ih đru kâo amâo dlăng kơ boh klei mâo ôh ƀiădah thâo nanao kâo dôk mâo Aê Diê pô myang dôk mbĭt hŏng kâo hlăm djăp boh klei. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y-Pêtrôs 1
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
