2 Xwmtxheej Vajntxwv 32:2-8
Nqe cim:
“Nej cia li ua siab tawv qhawv thiab tsis txhob ntshai tus vajntxwv uas kav lub tebchaws Axilias thiab nws cov tubrog. Tus uas tuaj peb tog muaj zog dua tus uas tuaj lawv tog” (2 Xwmtxheej Vajntxwv 32:7)
Lus nug rau sawvdaws xav:
– Thaum paub yuav raug yeebncuab vij, Vajntxwv Hexekiyas siv tej txoj haukev twg los tiv thaiv nws?
– Vajntxwv txhawb cov nomtswv thiab cov tub rog zog li cas?
– Thaum ntsib kev txomnyem, peb tau Vajtswv txhawb zog li cas?
Thaum uas paub cov Axilias tus vajntxwv Xenakhelis yuav tuaj vij lub nroog Yeluxalees, Vajntxwv Hexekiyas sablaj nrog nws cov nomtswv thiab cov tub rog npaj txoj haukev los tiv thaiv lawv. Tim ib, lawv txhub cov qhov dej ib ncig ntawm lub nroog Yeluxalees kom cov tub rog Axilias tuaj txog tsis tau dej siv. Cov neeg hauv lub nroog Yeluxalees twb tauv dej cug los rau hauv lawm, yog li ntawd cov pejxeem hauv lub nroog yeej muaj dej haus tsis txhawj, tiamsis yeebncuab tsis muaj dej haus. Tim ob, Vajntxwv kho tus ntsayeej uas thaiv lub nroog tej ntu uas puas lawm thiab ua tej chaw tsomfaj rau saum tus ntsayeej, thiab ua ib txheej ntsayeej rau sab nraud ntxiv. Dhau ntawd, lawv tseem kho tus ntsayeej uas thaiv Daviv lub nroog, thiab lawv ua tau ib co hmuv, ib co thaiv hniav ntaj ntau heev rau lawv siv ua rog. Tim peb, vajntxwv tsa ib co thawj tubrog ua cov coj tej pab, thiab lawv tuaj sib sau rau ntawm lub roojvag nroog lub chaw las tshav kom tau sablaj. Vajntxwv txhawb lawv zog kom yuavtsum ua siab loj siab tuab, tsis txhob ntshai vajntxwv Axilias thiab cov tub rog coob coob uas nrog nws, vim tus uas tuaj peb tog muaj zog dua tus uas tuaj lawv tog. Cov Axilias tsuas cia siab rau neeg lub zog tiamsis vajntxwv Hexekiyas thiab cov Yudas tau tus Tswv uas muaj hwj chim nyob nrog nraim pab cawm thiab hloov lawv chaw tawmtsam yeeb ncuab. Thaum hnov tej lus no, cov tub rog thiab pej xeem puav leej tau kev ruaj siab.
Txawm yog npaj txaus txhua yam los tawmtsam yeebncuab, los vajntxwv Hexekiyas thiab nws cov neeg yeej paub hais tias, tus ntsa yeej, cov tub rog thiab tej cuabyeej ntawd yuav ua tsis tau dab tsi yog tsis muaj Vajtswv tus uas muaj zog dua txhua tus yeebncuab nyob nrog nraim lawv. Txawm yog nyob rau lub tsamthawj nyuaj heev, tas kev cia siab tiamsis los ntawm kev ntseeg hais tias muaj Vajtswv nyob nrog nraim pab tau rau cov Yudas tsis txhawj ntshai ntxiv lawm. Lawv tsis saib lub sijhawm uas yuav raug yeebncuab tuaj vij lub nroog ua kev txhawj ntshai, yeebncuab coob heev tiamsis lawv saib ntsoov Vajtswv tus uas muaj hwjchim loj kawg nkaus tabtom nrog lawv nyob.
Niaj hnub nim no, cov ntseeg yeej zam tsis dhau tej kev txomnyem, kev sim siab vij txhua fab hauv kev ua neej, thiab muaj tej lub sijhawm zoo li tsis muaj kev cia siab lawm. Thaum ntsib yam zoo li ntawd, tsis txhob poob siab thiab txhob tas kev cia siab rau Vajtswv, tiamsis cia li los cuag Vajtswv hauv kev pehawm, kev thov Vajtswv thiab xav txog Nws Txojlus peb yuav tau kev txhawb zog thiab kev pab ntawm Vajtswv. Yam tseem ceeb thaum uas tabmeeg nrog tej teeb meem hauv lub neej, yog tsis txhob hnov qab hais tias Vajtswv tabtom nyob nrog nraim, Nws muaj hwjchim loj dua txhua lub hwjchim thiab txhua yam teebmeem uas tuaj raug peb. Peb kuj yuav tsum ua kom tas peb feem xyuam, tiamsis qhov tseemceeb tshaj txhua yam yog peb yuavtsum vamkhom Vajtswv kom hla dhau tej kev nyuaj ib yam li vajntxwv Hexekiyas, nws cov nomtswv thiab cov pej xeem hnub thaud.
Thov Vajtswv,
Vajtswv, thaum uas ntsib ntau yam teebmeem hauv kev ua neej, thov pab kom nyuam yaus tsis txhob saib tej teebmeem ua yam loj dhau, tiamsis saib ntsoov rau ntawm Koj thiab paub vamkhom Koj pab. Nyuam yaus tuav Tswv Yexus Khetos lub npe thov, Amees.
Thaum ntsib kev nyuaj siab, ntsib teebmeem raug lub neej, peb kheev ua li cas?
Nyeem Vajluskub hauv peb lub xyoos: 1 Petus 1
Kênh Youtube BHKTHN:
https://www.youtube.com/c/bhkthn
