Yakaunpaus 5:11
Nqe cim:
“Nej twb hnov lawm hais tias Yauj yog tus uas ua siab ntev, thiab nej twb paub lawm hais tias tus Tswv npaj txhua yam rau Yauj thaum kawg. Rau qhov tus Tswv muaj lub siab hlub thiab hmov tshua” (Yakaunpaus 5:11b)
Lus nug rau sawvdaws xav:
– Yauj yog leejtwg thiab nws sawv ruaj khov li cas?
– Yauj lub neej thaum kawg zoo li cas?
– Yauj lub neej txhawb peb zog kom sawv ruaj khov hauv kev nrog tus Tswv mus li cas?
Nrog tus Tswv mus tsis yog ib nyuag ncua sijhawm xwb, tiamsis yog coglus mus tas sim neej. Cov ntseeg Yexus tau nqua hu los ua siab ntev rau hauv txoj kev sib twv khiav ntawm sab kev ntseeg, kev ua ncaj ncees mus txog thaum kawg. Tej kev txomnyem tamsim no yuav ua rau peb txhawj ntshai thiab poob siab, tiamsis saib rau tej tus qauv ntawm cov ntseeg nyob ua ntej lawm, yuav txhawb peb zog thiab ua rau peb hajyam sawv ruaj khov ntawm kev ntseeg. Yauj kev sawv ruaj khov thaum ntsib txomnyem uas hais txog hauv Yakaunpaus 5:11 yuav txhawb peb lub zog kom sawv ruaj khov hauv kev ntseeg mus txog thaum kawg.
Peb pom Yauj “hwm thiab muab siab npuab Vajtswv. Nws yog neeg ua zoo thiab tsis ua kev phem kev qias” (Yauj 1:1). Txawm li ntawd los, thaum Yauj lub neej raug kev txomnyem los khwb nkaus yam tas yam tuaj rau nws tsev neeg, tib hnub xwb Yauj lub cuabtam, cov tubtxib thiab cov menyuam poob tas huv tibsi. Tsis tas li ntawd xwb, Yauj tus kheej tseem raug mob ua paug viag thoob plaws ibce, tseem raug tej txheeb ze nrog rau phoojywg saib tsis taus thiab. Txawm yog nyob rau lub tsamthawj muaj kev txomnyem loj npaum li ntawd los, Yauj tseem ceev ruaj nws kev ntseeg thiab ceev tau tej lus hais ruaj khov ntawm kev ntseeg rau txhua tiam tom qab tau kawm, Yauj hais tias“Thaum Vajtswv pub tej uas zoo rau peb, peb twb zoo siab hlo yuav, tiamsis thaum Vajtswv cia peb raug kev txomnyem, peb txawm ho yuav yws no los?” (Yauj 2:10); thiab “Vajtswv yuav muab kuv tua povtseg los xij peem. Kuv yeej yuav mus nrog nws hais kuv zaj xwb” (Yauj 13:15).
Hauv phau ntawv Yauj, peb saib pom thaum kawg ntawm Yauj lub neej “Tus TSWV foom koob hmoov rau Yauj lub neej zoo heev dua thaum chiv thawj” (Yauj 42:12). Vajtswv tau foom koob hmoov ntau tshaj ntxiv rau Yauj, nws thiaj muaj qhov txhia chaw, muaj tsiaj txu thiab muaj menyuam huv tibsi. Tsis yog Yauj tau koob hmoov sab nqaij tawv xwb, tiamsis dhau tej kev sim siab lawd, Yauj tseem paub meej Vajtswv zoo dua qub (saib Yauj 42:5). Yauj tau saj tej koob hmoov thaum uas tiv dhau kev txomnyem lawm, qhov ntawd qhia tshwm txog “tus Tswv muaj lub siab hlub thiab hmov tshua” (Yakaunpaus 5:11).
Ib yam li Yauj, tej thaum peb tsis totaub hais tias, ua cas nrog tus Tswv mus, tej zaum lub neej thiab tsev neeg yuav ntsib ntau yam kev txomnyem tuaj raug ua luaj. Peb yuav tsis paub txhij, yog vim li cas yuav muaj txhua yam tshwm tuaj raug peb lub neej, tiamsis qhov tseemceeb peb yuav tsum kawm Yauj tus qauv uas tso siab plhuav rau Vajtswv txoj kev tswj kav. Paub tseeb hais tias, thaum sawv ruaj khov hauv kev ntseeg mus txog thaum kawg, peb yuav tau txais koob hmoov ntawm Vajtswv. Txoj koob hmoov tseeb yog yim hnub yim paub Vajtswv heev ntxiv.
Thov Vajtswv,
Vajtswv, nyuam yaus paub hais tias, nyob hauv kev ua neej, nyuam yaus yuav ntsib ntau yam kev txomnyem thiab kev sim siab. Muaj tej yam tshwmsim tuaj rau lub neej nyuam yaus yeej tsis totaub txog. Tiamsis nyuam yaus ua Koj tsaug uas Yauj tus qauv zoo yuav txhawb nyuam yaus lub zog thiab ceev kev ntseeg nyob ruaj khov mus txog thaum kawg. Nyuam yaus tuav Tswv Yexus Khetos lub npe thov, Amees.
Thaum muaj kev txomnyem thiab teebmeem tshwm sim hauv peb lub neej, peb puas tso siab plhuav rau Vajtswv thiab sawv ruaj khov mus txog thaum kawg?
Nyeem Vajluskub hauv peb lub xyoos: Yakaunpaus 4
Kênh Youtube BHKTHN:
