Chivkeeb 1:9-13
Nqe cim:
“Ces Vajtswv hais tais, “Lub ntiajteb cia li tuaj txhua yam nroj tsuag, qoobloo thiab tej xyoob ntoo, kom tawg paj txi txiv raws li nyias yam,” ces txawm muaj raws li Vajtswv hais” (Chivkeeb 1:11)
Lus nug rau sawvdaws xav:
– Vajtswv tau tsim dabtsi hauv hnub tim peb thiab yam no muaj dabtsi tshwjxeeb?
– Cia av xeeb nroj tsuag qhia tshwm yam dabtsi txog Vajtswv thiab Nws kev npaj tseg?
– Peb tau kev txhawb zog li cas?
Hauv hnub tim peb, Vajtswv ua rau cov dej nyob hauv lub qab ntuj no sib sau ua ke nyob muaj chaw, txij ntawd los muaj daim av thiab dej hiavtxwv. Ua ntej hnub tim peb, lub ntiajteb no tsuas yog dej thiab nyob ntxhov hnyo, tiamsis los ntawm Vajtswv lo lus hais dej thiab av tau nyob muaj quas, los yug tau txhua yam muaj sia hauv lub qab ntuj no.
Yog hnub tsim tim ib thiab tim ob, ib hnub Vajtswv tsuas hais ib lo lus los tsim ib yam, ces hnub tim peb no, Vajtswv hais ntau lo lus thiab tsim tau ntau yam dua. Xub thawj Nws tsim hiavtxwv thiab daim av, txuas ntxiv Nws tsim xyoob ntoo thiab nroj tsuag. Vajtswv samhwm kom tej xyoob ntoo, nroj tsuag tawg paj txi txiv huamvam raws nyias yam. Tej uas Vajtswv tsim tau ntawd, Nws pom hais tias zoo heev.
Thaum Vajtswv tsim tau muaj daim av, av xeeb nroj tsuag thiab xyoob ntoo. Dhau ntawd, xyoob ntoo thiab nroj tsuag yuav tsum tawg paj txi txiv, huam vam raws li nyias yam. Tamsim no, txhua yam uas Vajtswv tsim hauv qab ntuj tsis yog Vajtswv tus kheej tsim txhua yam xwb, tej uas Nws tsim tau los, muaj feem nrog Nws koom tu kom tej uas Nws tsim tseg zoo nkauj ntxiv mus thiab. Tej uas Vajtswv tsim muaj feem nrog Vajtswv txhim kho txhua yam hauv Nws kev tsim, tej no yog Vajtswv lub homphiaj uas tau npaj tseg.
Yog tig saib Vajtswv tes haujlwm tsim txhua yam, xubthawj cuag li Vajtswv tsis ua haujlwm ntau pes tsawg. Vajtswv maj mam ua haujlwm ntau zuj zus ntxiv mus, uas yog ua haujlwm ntau dua uas yog; hais ntau dua, tsim ntau dua thiab Nws txaus siab dua. Thaum paub hais tias, Vajtswv pub txhua yam uas Vajtswv tsim tseg muaj feem nrog Vajtswv tsim muaj tej yam raws li nyias yam kom muaj ntau ntxiv, xws li ib tsob ntoo muaj noob, noob tawg kaus ua ib tsob ntoo tshiab ntxiv… Ntawd kuj yog qhov uas Vajtswv ua haujlwm rau ntau tus lub neej. Tej lub sijhawm, peb pom zoo li Vajtswv tsis ua haujlwm, tiamsis yog ua tib zoo saib kom meej ntawm txhua yam, Vajtswv yim hnub yim ua haujlwm ntau ntxiv, tsis muaj hnub nres li. Tswv Yexus kuj hais txog qhov ntawd hais tias: “Kuv Txiv yeej ua haujlwm tsis so li, yog li ntawd kuv yeej yuav ua haujlwm thiab” (Yauhas 5:17). Ua Vajtswv tsaug vim Nws pub cai, pub peev xwm thiab nqua hu kom peb koom nrog Vajtswv ua haujlwm li Nws kev npaj tseg. Thov Vajtswv pab kom peb npaj txhij los koom nrog Vajtswv ua haujlwm li Nws tau npaj tseg.
Thov Vajtswv,
Thov qhuas Vajtswv tus uas loj kawg nkaus. Ua Vajtswv Koj tsaug, vim Koj ibtxwm hlub thiab pub cai rau nyuam yaus tau koom nrog Koj ua haujlwm li Koj kev npaj tseg. Thov Koj pab nyuam yaus paub qhia txoj kev zoo ntawm Koj rau tibneeg ntiajteb. Nyuam yaus tuav Yexus Khetos lub npe thov. Amees.
Peb puas cog lus yuav los koom nrog Vajtswv ua haujlwm li Nws kev npaj tseg?
Nyeem Vajluskub hauv peb lub xyoos: Yakaunpaus 1
Kênh Youtube BHKTHN:
