Klei Aê Diê Blŭ: II Bruă Mtao 6:8-14
Êlan kliăng: “Mnuih khŏ lač hlăm ai tiê diñu, ‘Amâo mâo Aê Diê ôh.’ ” (Klei Mmuñ Hđăp 14:1a)
Klei êmuh ksiêm mĭn: Ya klei truh hlăm klei bi blah ti krah phung Siri leh anăn phung Israel? Si klei mtao Siri wĭt ngă? Si drei thâo săng kơ mtao Siri leh anăn kơ klei ñu wĭt ngă?
Klei yăl dliê hruê anei jing klei truh hlăm sa klei bi blah ti krah phung Siri leh anăn phung Israel. Mtao Siri dưm anôk kđông kăp bi blah hŏng phung Israel, ƀiădah lĕ, kyua mâo Khua pô hưn êlâo Y-Êlisê, “mnuih Aê Diê” hưn êlâo brei răng snăn mtao Israel lu blư̆ dưi tlaih. Mtao Siri mĭn mâo pô lhiăr leh nao hưn kơ mtao Israel, ƀiădah sa čô hlăm phung dĭng buăl ñu lač amâo mâo pô lhiăr hŏng mtao ôh, ƀiădah kyua mâo Khua pô hưn êlâo Y-Êlisê thâo klei hgăm mtao snăn hưn êlâo kơ mtao Israel. Hmư̆ msĕ snăn, mtao Siri tiŏ nao phung kahan nao kơ ƀuôn Dôthan mă Khua pô hưn êlâo Y-Êlisê.
Mrâo hmư̆, klei mtao Siri čuăn ngă jing djŏ kyuadah tơdah bi mdjiê hĕ Khua pô hưn êlâo Y-Êlisê snăn amâo lŏ mâo pô hưn mthâo kơ mtao Israel ôh. Ƀiădah lĕ, mtao Siri amâo yŏng mđing ôh kơ klei dĭng buăl ñu lač hŏng ñu: “Y-Êlisê, khua pô hưn êlâo dôk hlăm čar Israel hưn kơ mtao Israel klei ih blŭ hlăm adŭ ih pĭt” (êlan 12). Kyuanăn, klei tiŏ nao kahan nao mă Khua pô hưn êlâo Y-Êlisê jing sa klei čuăn ngă mluk mgu, kyua tơdah Khua pô hưn êlâo Y-Êlisê thâo leh jih klei mtao blŭ hlăm anôk hjăn păn leh anăn hgăm hĭn, snăn ñu amâo thâo hĕ klei mtao Siri tiŏ nao mnuih nao mă ñu!
Snăn, klei mrâo mrang êdah thâo hĕ anăn, amâo djŏ kyua klei lhiăr mnuih ôh ƀiădah jing mơ̆ng bruă myang. Khua pô hưn êlâo Y-Êlisê amâo dưi thâo hjăn ñu pô ôh jih hdră mnêč mtao Siri, ƀiădah kyua ñu jing “mnuih Aê Diê” (êlan 9) snăn Aê Diê yơh jing Pô thâo jih klei mĭn leh anăn ai tiê mnuih brei ñu thâo leh (Y-Yêrêmi 17:10). Sĭt nik mtao Siri thâo Y-Êlisê jing “mnuih Aê Diê” mơ̆ng jih jang bruă myang ñu ngă, boh nik nak hlăk Y-Naaman dưi hlao klei ruă djŏ phŭng. Hĭn kơnăn, phung dĭng buăl mtao pô yơh ăt lač mơh Y-Êlisê jing “khua pô hưn êlâo dôk hlăm čar Israel” (êlan 12). Ƀiădah lĕ, mtao Siri ăt knang kơ klei ktang phung kahan ñu pô, leh anăn amâo đăo ôh kơ klei Aê Diê bi êdah kơ Khua pô hưn êlâo Y-Êlisê. Mtao Siri mĭndah Aê Diê ăt jing msĕ si phung rup yang mkăn mơh, jing phung “Digơ̆ mâo ƀăng êgei, ƀiădah amâo thâo blŭ ôh; digơ̆ mâo ală, ƀiădah amâo thâo ƀuh ôh; digơ̆ mâo knga, ƀiădah amâo thâo hmư̆ ôh; digơ̆ mâo adŭng, ƀiădah amâo thâo ƀâo ôh; digơ̆ mâo kngan, ƀiădah amâo thâo ruêh ôh; digơ̆ mâo jơ̆ng, ƀiădah amâo thâo êbat ôh; kăn đŏk digơ̆ thâo bi ênai rei.” (Klei Mmuñ Hđăp 115:5-7).
Mtao Siri jing sa čô bum ală mngăt myang, bi ala kơ phung “Mnuih khŏ” kyua ñu mĭndah “Amâo mâo Aê Diê ôh” (Klei Mmuñ Hđăp 14:1). Jih jang bruă hŏng ñu knŏng dŭm mta bruă ñu dưi ƀuh hŏng ală leh anăn dưi mblang tui si lăn ala đuč yơh. Tơdah sa čô mnuih hngah kơ klei mâo Aê Diê snăn diñu srăng lač jih jang klei dleh dlan dưi mâo hdră êlan mgaih mkra sơăi, leh anăn diñu dưi ksiêm jih jang klei truh. Mnuih hdĭp msĕ snăn amâo tuôm thâo wah lač kơ Aê Diê ôh, wăt tơdah ñu ƀuh klă dưn mơh čiăng mâo klei pap brei klei soh leh anăn klei dưi bi hlao mngăt ai tiê ñu.
Si drei khăng wĭt ngă hŏng klei dleh dlan truh bhiâo riâo rit kơ drei?
Wah lač: Ơ Khua Yang, bi mni kơ Khua Yang kyua brei kâo thâo kral, kkuh mpŭ leh anăn đup gưt kơ Khua Yang. Brei kâo thâo knang kơ Khua Yang nanao čiăng kơ kâo dưi dôk ti gŭ klei Aê Diê Pô mâo jih klei dưi kiă kriê răng mgang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 25
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
