LĐ Êyiptơ 15:22-26
“Sư khan: Tơdah iĕm mơ̆ng nơ̆r Kră Yang ‘Bok Kei-Dei, pơm ‘lơ̆ng tơpăt ‘bơ̆t anăp Inh tơdah iĕm mơ̆ng nơ̆r tơtă păng wei răk dôm tơdrong juăt Inh, lei Inh ưh kơ đei tuh kơ iĕm minh tơdrong jĭ-jăn mă inh tuh ăn boih kơ dêh Êyiptơ; Inh boih Kră Yang, tơ’ngla pơklaih iĕm đơ̆ng jĭ-jăn.” (LĐ Êyiptơ 15:26)
Nơ̆r jet tơchĕng pơwao:
– Trong 26 Kră Yang pơ ma hăm bu,kơplah đei tơdrong truh yă kiơ ?
– Tơdrong kơnhăm Kră Yang ăn dôm tơdrong juăt lăm pơđăm khôi juăt Môis ‘noh kiơ?
– Bơ̆n kăl kơ pơm kiơ wăkơ gơh oei lăm tơdrong Kră yang wei lăng? 15
Tơdrong hơ’mon kơplah ei sơ̆ đei truh Kră Yang dŏng pơklaih kon pơlei Ju Đa đơ̆ng pơm đĭch tơ dêh char Êyiptơ, ăn kơ lusư tŏk hlôi kơ Đak dơsĭ ‘Brê păng tŏk tơ kông Si-nai. Kơplah truh tơ char glă Sur, yak năm lăm pêng năr ưh kơ đei đak nhă. Truh tơ Mara đei ră đak mă lei tăngdêh ưh kơ gơh kơ nhă. Kon pơlei chrih hil kơ ‘bok Môis, sư krao khan apinh Kră Yang păng hăm tơdrong mơsêh mơyang ăn đak nhă. Tơ anih âu bơih,đơ̆ng ‘bok Môis, ” ‘Bok Pơklaih Jĭ jăn” wă kơ konpơlei Kră Yang ‘bôh khan chu yom Kră Yang pơmkiơ̆ khôi juăt Sư gô tơgŭm ăn đei jơhngơ̆m pran gah bơhngol păng sĕch akar.
Lăm pơđăm khôi juăt Môis, Kră Yang ăn lơ khôi juăt sư ‘bơm hăm jơhngơ̆m pran. Kơplah kon pơlei Kră Yang wei răk khôi juăt Kră Yang lu sư huay kơ đei jĭ jăn. Pơtih gia thoi lăm Lêwi 3:17, kon pơlei Kră Yang ưh kơ gơh sa rơmă dah pham yua kơ pơrăm jơhngơ̆m pran. Lêwi chăl 11 đei klah asong sem dơrong rơgoh păng ưh kơ rơgoh wă kơ băt hơ yơ tơmam sa ăn đei jơhngơ̆m pran păng hơ yơ tơmam sa đei tơdrong jĭ. Lêwi chăl 13, tơdrong juăt gah tơdrong jĭ ‘bơm akar ngăl hơpoh, thoi kơ jĭ chin păng pơm liơ wă huay kơ hơpoh. Lêwi chăl 23, Kră Yang pơjing tơpơh ‘măng phĕt ‘lơ̆ng rơgoh lăm rim sơnăm wă kơ kon pơlei wă kơ gơh năm kơkuh kơ Kră Yang păng pơdơh v.v… Dôm khôi juăt âu đơ̆ng Kră Yang bơtho tơ’bôh kơ kon pơlei athei pơm kiơ̆ hloi, wă bơwei kon bơngai huay kơ jĭ jăn gah bơhngol păng sĕch akar.
Chăl arih gah akâu jăn, gah bơhngol păng gah tơdrong lui lu bơ̆n sư ‘bơm tơ’bưh dih băl. Kră Yang wă kơ lu kon Sư đei jơhngơ̆m pran ưh kơ sĭ kơ gah bơhngol đĕch mă lăm tơdrong arih păng kư̆m gah sĕch akar mơ̆n (I Têsalônik 5:23). Tơdah wă kơ ‘Bok Kei-Dei wei-lăng bơ̆n , bơ̆n athei chu yom Kră Yang kiơ̆ thoi Sư bơtho tơ’bôh chông anhăk. Dang ei, Khul Lui đei Nơ̆r ‘Bok Kei-Dei lu bơ̆n kăl kơ đŏk, hŏk pơhrăm Nơ̆r ‘Bok Kei-Dei păng tơ’bưh hăm Sư rim năr wă kơ gơh kơtơ̆ng nơ̆r Kră Yang pơma. Kơplah băt tơdrong Kră Yang wă păng tơdrong juăt Sư, pơm kiơ̆ nơ̆r Sư athei păng pơm ‘lơ̆ng tơpăt ‘bơ̆t anăp Sư, kiơ̆ thoi nơ̆r Sư pơka “Bơ̆n ‘bôh bơngai bu mă ‘mêm kơ ‘Bok Kei-Dei, bơngai noh ‘Bok Kei-Dei rơih iŏk lui kơ Sư, lu bơngai thoi noh boih, mă sư tơ’bơ̆p tơdrong kiơ, bơ̆n băt kơ ‘Bok Kei-Dei ăn kơ sư hiôk ngăl.” (Rôm 8:28).
Ơ Kră yang mă ‘mêm mơnat, bơnê kơ Ih yua kơ Ih ling lang ăn đei jơhngơ̆m pran gah bơhngol păng gah sĕch akar kiơ̆ thoi Ih lăp đon. Apinh tơgŭm inh băt pơyơ̆r akâu jăn pơm tơmam soi arih păng ‘lơ̆ng rơgoh kiơ̆ thoi Ih lăp đon. Yua anăn Kră yang Yêsu Krist, Amen.
Lu bơ̆n hăm wă chu yom tơdrong Kră yang chông anhăk wă kơ pơm ‘lơ̆ng tôm tơdrong?
Minh jơhngơ̆m đon lui kơjăp
Akâu jăn pran gah bơhngol hơdah hơdong
Năr gleh glăn năr hiôk chơt
Arih ‘lơ̆ng tơpăt đei pŭn hiôk đơ̆ng Kră Yang ăn
Đŏk Nơ̆r ‘Bok Kei-Dei lăm pêng sơnăm : I Hơ’mon 21
Kênh Youtube BHKTHN:
