Klei Aê Diê Blŭ: Y‑Yakơ 5:1-6
Êlan kliăng: “Kyuadah klei khăp kơ prăk jing agha kơ jih jang klei jhat” (I Y‑Timôthê 6:10a)
Klei êmuh ksiêm mĭn: Si Y‑Yakơ mtă brei phung mdrŏng răng? Ya ngă ñu ƀuah kơ digơ̆ msĕ snăn lĕ? Si klei bi hriăm kơ drei djŏ kơ dŏ ngăn mơ̆ng trăn Klei Aê Diê Blŭ anei?
Y‑Yakơ mtă kơ phung mdrŏng brei răng snei, “hia leh anăn ur krao bĕ kyua klei knap mñai dơ̆ng truh kơ diih” (êlan 1). Pruê̆ blŭ “hia leh anăn ur krao” Y‑Yakơ yua tinei jing boh blŭ phung khua pô hưn êlâo hlăm Klei Bi Mguôp Hđăp khăng yua čiăng lač kơ klei huĭ anak mnuih srăng tŭ tơdah dôk ti anăp klei Aê Diê phat kđi knhal tuč; leh anăn anei jing hră ñu čih mơĭt kơ phung đăo phung Yuđa bra đuĕ leh (Y‑Yakơ 1:1). Kyuanăn, phung mdrŏng tinei čiăng lač kơ phung hưn diñu jing phung đăo kơ Krist ƀiădah boh sĭt gơ̆ amâo djŏ ôh. Brei diñu “hia leh anăn ur krao” kyuadah klei knap mñai diñu srăng tŭ amâo djŏ klei dleh dlan hlăm klei hdĭp anei ôh, ƀiădah anăn jing klei Aê Diê ngêñ dơ̆ng truh kơ diñu tơdah Aê Diê ngă klei phat kđi kpă.
Y‑Yakơ brei thâo ya ngă phung mdrŏng srăng tŭ klei bi kmhal. Tal sa, diñu knŏng mĭn kơ klei hrui mă leh anăn mkăm pioh tơl dŏ ngăn diñu jing hĕ “brŭ leh”, brei ƀuh diñu bŏ hŏng klei čuôt klih leh anăn klei diñu tluh amâo mâo knhal ôh (êlan 2-3). Tal dua, diñu bi mdrŏng diñu pô hŏng klei tlĕ pioh kơ diñu pô ênoh prăk mưn phung mă bruă mưn (êlan 4). Tal tlâo, diñu hdĭp hŏng klei kdrưh leh anăn hŏng klei hơ̆k mơak, amâo uêñ mĭn ôh kơ klei kƀah phung riêng gah (êlan 5). Tal pă, diñu phat kđi leh anăn bi mdjiê mnuih kpă ênô (êlan 6). Sĭt nik, “Kyuadah klei khăp kơ prăk jing agha kơ jih jang klei jhat” (I Y‑Timôthê 6:10). Phung mdrŏng anei brei leh prăk jing rup yang kơ klei hdĭp diñu, ngă djăp mta klei jhat čiăng dưi mâo prăk lu hĭn, čiăng bi hrăp klei tluh diñu pô.
Mơ̆ng klei mtă brei răng anei, čiăng bi hriăm drei klei hriăm djŏ kơ dŏ ngăn. Drei thâo sĭt nik Klei Aê Diê Blŭ amâo tuôm mtô mdrŏng jing soh ôh. Jih jang phung aê phŭn msĕ si Y‑Abraham, Y‑Isăk, leh anăn Y‑Yakôp jing phung hing ang mâo klei mdrŏng sah sơăi. Snăn yơh, klei čiăng lač jing amâo djŏ dŏ ngăn ôh ƀiădah êlan drei yua dŏ ngăn. Tal sa, dŏ ngăn drei mkăm pioh hlăm lăn ala anei srăng brŭ rai, kyuanăn êlâo hĭn brei drei mkăm pioh dŏ ngăn hlăm Ƀuôn ala mtao hlŏng lar Aê Diê hŏng klei myơr kơ bruă Ñu. Tal dua, bi mdrŏng bĕ drei pô hŏng klei ênuah leh anăn kpă ênô. Tal tlâo, wăt tơdah mdrŏng dưn mơh, đăm ngă klei kdrưh leh anăn bi liê dŏ ngăn hơăi mang ôh, ƀiădah bi mguôp bĕ hŏng jih jang mnuih. Tal pă, đăm bi mjhua klei mdrŏng drei pô ngă klei ktư̆ juă pô mkăn ôh, ƀiădah hŏng klei pap đru mtrah bĕ kơ phung ƀun ƀin knap mñai. Hlăm djăp mta klei, hdơr bĕ snei: Dŏ ngăn jing dŏ pioh kơ drei yua, bi mnuih pioh kơ drei khăp.
Si ngă drei dôk yua dŏ ngăn leh anăn khăp kơ mnuih hĕ amâodah yua mnuih leh anăn khăp kơ dŏ ngăn?
Wah lač: Ơ Khua Yang, ti krah lăn ala mâo lu mnuih tui duah klei mdrŏng, bi hriăm kâo mkăm pioh dŏ ngăn hlăm Ƀuôn Ala Mtao Ih, đru kâo mâo ai tiê kmah leh anăn thâo pap kơ phung knap mñai jŭm dar kâo. Akâo Khua Yang đru kâo thâo yua jih jang mnơ̆ng Ih brei leh kơ kâo jing mnơ̆ng pioh mă bruă kơ Ih leh anăn đru lu mnuih thâo kral Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Philip 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
