Yakaunpaus 5:1-6
Nqe cim:
“Qhov uas neeg ntshaw nyiaj txiag yog ib qho uas ua rau neeg ua txhua yam phem.” (I Timautes 6:10a)
Lus nug rau sawvdaws xav:
– Yakaunpaus ceebtoom rau cov neeg npluanuj zoo li cas?
– Vim li cas Yakaunpaus cem lawv li ntawd?
– Peb kawm tau tus lw Vajtswv Txojlus hais txog nyiaj txiag zoo li cas?
Yakaunpaus ceebtoom cov neeg npluanuj “nej cia li quaj, rau qhov nej twb yuav raug kev txomnyem” (nqe 1). Lo lus “quaj” uas Yakaunpaus siv no yog lo lus uas cov cev Vajtswv lus hauv Phau Vajluskub Qub pheej siv los qhia txojkev txaus ntshai uas tibneeg yuav raug thaum ntsib Vajtswv txojkev txiav txim thaum kawg; thiab cov neeg uas Yakaunpaus hais yog cov neeg Yudais uas ntseeg Yexus khiav mus nyob rau txhua qhov chaw (Yakaunpaus 1:1). Yog li ntawd, cov neeg npluanuj ntawm no yog hais txog cov ntseeg uas lawv hais tias ntseeg Yexus tiamsis qhov tseeb lawv twb tsis ntseeg. Tsimnyog lawv “cia li quaj” vim tsis yog tej kev txomnyem los raug lawv tiamsis yog Vajtswv txojkev txiav txim yuav los raug lawv thaum uas Nws txiav txim ncaj ncees.
Yakaunpaus hais txog ib qhov vimchiv rau cov neeg npluanuj no tias lawv yuav raug txim. Tim ib, lawv tsuas yog npaj khoom khaws cia, tej uas lawv khaws “ntsaum kab rwg” yuav noj, qhov no qhia paub lawv lub siab ntshaw tsis paub xaus (nqe 2-3). Tim ob, lawv ua kom npluanuj los ntawm qhov ntxo luag tej nyiaj zog (nqe 4). Tim peb, noj seem noj so, lomzem, tsis hmov tshua txog cov neeg pluag nyob ib ncig (nqe 5). Tim plaub, lawv txiav txim rau cov neeg tsis muaj txim (nqe 6). Tseeb tiag, “qhov uas neeg ntshaw nyiaj txiag yog ib qho uas ua rau neeg ua txhua yam phem.” (I Timautes 6:10). Cov neeg npluanuj no muab lawv tej nyiaj los ua lawv tus tswv, ua txaus txhua yam phem kom lawv tau nyiaj ntau, ua kom txaus li lub siab ntshaw ntawm tus kheej.
Dhau los ntawm cov lus ceebtoom no, peb kawm tau tus lw rau tej nyiaj txiag. Vajtswv Txojlus tsis qhia tias npluanuj yog kev txhaum. Cov yawg koob Anplahas, Ixaj, Yakhauj puavleej yog neeg npluanuj. Yog li, qhov teebmeem tsis yog nyiaj txiag khoom ntau tiamsis yog qhov uas peb siv cov khoom ntawd. Tim ib, tej khoom uas khaws cia yuav puastsuaj mus, yog li peb cia li khaws tej khoom uas muaj nqis nyob hauv lub tebchaws nyob mus ibtxhis uas yog ua Vajtswv tes haujlwm. Tim ob, cia li ua kom npluanuj ncaj ncees, zoo. Tim peb, txawm yog npluanuj los tsis siv phuam lam, tsis muaj qabhau, cia li ua neej kom nrog tau sawvdaws nyob. Tim plaub, tsis txhob muab txojkev npluanuj los liam, tsimtxom lwm tus tiamsis cia li hlub thiab pab cov neeg txomnyem uas tabtom cheemtsum kev pab. Hauv txhua yam, cia li nco ntsoov hais tias: Khoom nyiaj txiag yog coj siv, hos tibneeg ces yog cia hlub.
Thov Vajtswv,
Tus Tswv, nyob rau lub ntiajteb uas ntau tus tibneeg tabtom caum kev npluanuj no, thov Koj qhia kom nyuam yaus paub npaj tej uas nyob saum Koj lub tebchaws, thiab ua neeg siab dav, hlub cov neeg raug txomnyem. Thov Koj qhia kom nyuam yaus paub siv tej uas Koj pub ua yam cuabyeeb nthuav dav Koj tes haujlwm thiab pab tau lwm tus paub txog Koj. Nyuam yaus tuav Tswv Yexus lub npe thov, Amees.
Peb tabtom siv tej khoom los hlub neeg, los yog siv neeg los hlub tej khoom?
Nyeem Vajluskub hauv peb lub xyoo: Filipis 3
Kênh Youtube BHKTHN:
