Luka 8:40-48
Kơkuh kơ đĭ đăng bơngai mă mơ̆ng,
Năr ‘nâu lu bơ̆n gô tơchĕng pơwao ‘bai pơhrăm đei kơ̆l ‘bai: Klĕnh Đơ̆ng Anat Anot Wă Kơ Hlôi Đơ̆ng Pơmat Tat kiơ̆ kơ Sơ̆p Hla bơar ‘Bok Kei-Dei Luka 8:40-48.
40 Yêsu tŏk tơ thŏng-nan tŏk găn brŏk tơ pah âu dơ̆ng. Đei lơ bơngai răp gô Sư. 41 Đei minh ‘nu bơngai năm tơ Yêsu. Sư ei bơngai kră wei-lăng hnam akŭm đe Juđê lăm pơlei kiơ̆ ei. Anăn sư Jairut. Sư ‘nap ‘bơ̆t jơ̆ng Yêsu na apinh Yêsu năm tơ hnam sư, 42 yua kơ kon pôm adruh sư bơlŏ dêh. Kơplah Yêsu oei yak năm tơ hnam sư ‘nei, đei lơ bơngai yak hơdai Sư hmĕt-hmot Sư. 43 Đei minh ‘nu bơngai drŏ-kăn tuh pham mơjĭt-‘bar sơnăm boih. Sư apah đe ming akâu sư tĕch đĭ mŭk tơmam sư ră mă-lei ưh kơ klaih ôh. 44 Sư năm hơdai đe kiơ̆ đơ̆ng rŏng Yêsu chur mơ̆t kiơ̆ Yêsu wă pel tơdrơi ao Yêsu wă kơ klaih kơ tơdrong jĭ sư. Lăp sư pel ‘bơm tơdrơi ao Yêsu, kơtă ei sư klaih hloi kơ đơ̆ng tuh pham. 45 Kơplah ‘nei Yêsu khan: “Bu kih pel Inh?” Đĭ đăng lu đe ei khan: “Nhôn ưh kơ đei pel Ih.” Na Pêtrôs khan: “Ơ ‘Bok Thây, đei lơ bơngai hmĕt-hmot Ih.” 46 Yêsu khan: “Đei bơngai pơrơ̆ng pel Inh yua kơ Inh băt kơdih tơdrong mơsêh Inh lĕch.” 47 Bơngai drŏ-kăn ei băt sư ưh pă gơh ôn boih na sư hli tơtei năm tơ Yêsu ‘nap ‘bơ̆t anăp Sư roi hloi ‘bơ̆t anăp đe tơpôl tơdrong sư pel Yêsu, na sư klaih hloi kơ jĭ. 48 Na Yêsu khan kơ sư: “Ơ duch, kơlih kơ ih lui na ih klaih. Na dang ei brŏk kơ ih mă ‘lơ̆ng bĕ.”
Trong tơm ‘bai pơhrăm ‘nâu:
“Lu bơngai ‘lơ̆ng tơpăt Krao apinh, Kră Yang mơ̆ng hloi. Păng pơklaih lu sư đơ̆ng tơdrong pơmat-tat.” (Hơriso 34:17)
Nơ̆r jet tơchĕng pơwao:
– Bơngai drŏkăn jĭ jăn tuh pham đei năm tơ Kră Yang thoi yơ păng gơh klaih lơ liơ?
– Chăl arih sư đei tơplih thoi yơ?
– ‘Bai pơhrăm âu tơgŭm kiơ kơ ih kơplah tơ’bơ̆p tơdrong pơlong lăm chăl arih?
Kơkuh kơ đĭ đăng,
Kră Yang Yêsu yak rok trong năm tơ hnam ‘bok Jairut, bơngai wei Hnam akŭm wă kơ pơklaih kon adruh sư đei jĭ kal, đei kon pơlei lơ yak năm hmĕt hmot Sư. Kơplah ei, đei minh ‘nu drŏkăn đei tơdrong jĭ tuh pham đĭ 12 sơnăm bơih, đei năm tơ âu, tơ to wă pơklaih, mălei ưh kơ gơh klaih. Sư adrin chơ chur lơ lŭt tơ lăm tơpôl lơ wă kơ tơ’bơ̆p Kră Yang. Kiơ̆ kơ tơdrong juăt lu bơngai Juđê, đe lăng sư noh bơngai kơnê̆ ‘mê̆ ‘mach (Lêwi 15:19-33), kon pơlei weh wer, păng ưh kơ ăn năm akŭm kơkuh tơ hnam akŭm. Ưh pă đei anih wă gơnang hơmĕng, sư đei kơtơ̆ng khan đei bơngai anăn Sư Yêsu tơ lăm pơlei Nasaret đei tơdrong mơsêh mơyang gơh pơklaih tơdrong jĭ jăn. sư đei đon lui na năm tơ’bơ̆p Kră Yang wă apinh Sư pơklaih. Mă khan lei ră, sư tơ’bơ̆p tơdrong anat anot hăm bơngai tơpôl lơ jum dăr kơ Kră Yang Yêsu, păng sư bơngai ‘mê̆ ‘mach tăm dơ̆ng na liơ wă kơ gơh tơ’bơ̆p Kră Yang Yêsu wă kơ tơ‘bơ̆p tơ âu na apinh Sư pơklaih. Yua kơ thoi noh, sư đei tơchĕng trong nai dơ̆ng: “sư chur đơ̆ng rŏng wă pel tơdrơi ao Yêsu” (trong 44 BTTHĐ). ‘Nâu đei pơm yua kơ đon lui! Sư đei ‘mê̆ ‘mach păng kơdơ̆ mơlâu ưh kơ pơ̆n ‘bơ̆t anăp tơpôl. Mălei hăm đon lui păng pran kơtang, sư tơchĕng: “Dah inh pel pôm ao sư đĕch inh klaih mơ̆n!” (Markôs 5:28). Hlĭch dêh tơpă, kơplah sư đei pel tơdrơi ao Kră Yang na pham sư nhĕt ưh pă tuh bơih (trong 44). Tơdrong mơsêh đei truh lăm tơdrong sư. Sư mơn đei tơdrong mơsêh mơyang pơklaih hlĭch dêh đơ̆ng Kră Yang Yêsu Krist.
Adrol kơ noh, bơngai drŏkăn âu chơ chur năm tơ Kră Yang, sư đei đon lui mălei ưh kơ đei krao apinh Sư hăm ‘bơ̆r pơma, mălei pơm tơ’bôh đon lui hăm tơdrong sư đei pơm. Jơ âu, kơplah Kră Yang pơklaih sư, sư gơh pơma dơnuh hăm Kră Yang păng đei nơ̆r Kră Yang khan kơ sư: “Ơ duch, kơlih kơ ih lui na ih klaih, na dang ei brŏk kơ ih mă ‘lơ̆ng bĕ.” (trong 48 BTĐHĐ). Sư gơh klaih đơ̆ng akâu jăn truh tơ gah bơhngol, ăn hiôk hơđơ̆ng păng gơh oei hơdai kon pơlei.
Tơdrong arih kon pơlei Kră Yang ưh kơ weh wer đơ̆ng tơdrong anat anot, tơdrong pơlong wăng dăr. Kơplah bơ̆n hơmet tơdrong anat anot hăm jơhngơ̆m pran kơdih bơ̆n gơnang thoi kơ jên tơmam, gơnang tơduă kon bơngai, jơhngơ̆m pran bơngai lăp ba ăn tơdrong răm ‘băm, ưh kơ kĕ. Mălei dah bơ̆n năm tơ Kră Yang hăm đon lui păng nơ̆r krao apinh, Kră Yang gô pơklaih tơdrong anat anot, dŏng pơklaih đơ̆ng akâu jăn truh tơ gah bơhngol. Mă khan thoi ei, kăl kơ ‘blŏk Kră Yang dŏng pơklaih ưh kơ kiơ̆ kơ bơ̆n wă, mălei kiơ̆ thoi gơh hơgei ‘lơ̆ng hloh đơ̆ng Kră Yang ba ăn tơdrong ‘lơ̆ng hloh ăn kơ kon pơlei Kră Yang.
Lu bơ̆n wang pôm đon lăm nơ̆r krao khan,
Ơ Kră Yang, apinh Ih tơgŭm inh đei đon lui pran, wă kơ kĕ hlôi đơ̆ng anat anot pơlong na wă kơ gơh năm jê̆ Ih, đĭ jơhngơ̆m lui gơnang kơ Ih wă kơ gơh klaih păng wă kơ gơh kĕ jei hlôi đơ̆ng tơdrong pơlong lăm chăl arih. Yua anăn Kră Yang Yêsu Krist, Amen.
Ơ đĭ đăng lu bơngai mơ̆ng mă ‘mêm kơeng,
Lu bơ̆n hăm đĭ jơhngơ̆m krao khan hăm Kră Yang hăm đon lui pran kơplah tơ’bơ̆p tơdrong anat anot pơlong lăm tơdrong arih ưh?
Tơ’bơ̆p tơdrong pơlong wang dăr
Ơ Kră Yang inh lui gơnang lăp minh Ih đĕch
Jên tơmam anăn đe ư-ang lăm chăl arih
Liơ gơh tam tơdrong ‘mêm rơkah rơkai đơ̆ng Ih ăn
Đŏk Sơ̆p Hla bơar ‘Bok Kei-Dei lăm pêng sơnăm: Êsai 65
Kênh Youtube BHKTHN:
