Lukas 22:39-43
Nqe cim:
“Nej yuav tsum ceevfaj thiab thov Vajtswv pab, kev sim siab thiaj yuav ntxias tsis tau nej. Lub siab mas kub lug, tiamsis cev nqaij daim tawv qaug zog kawg li.” (Mathais 26:41)
Lus nug rau sawvdaws xav:
– Dag ntxias yog dabtsi?
– Dab ntxwgnyoog ntxias Tswv Yexus li cas?
– Yuav ua li cas kom peb tsis raug dag ntxias?
Dag ntxias yog yam uas txhua tus ntseeg Yexus yeej ntsib txhua hnub, tej ntawd yog “tej uas neeg lub siab ntshaw, tej uas neeg lub qhovmuag pom thiab xav yuav” (I Yauhas 2:16). Dag ntxias pib los ntawm qhov uas ntsia pom xws li pom qab, zoo nkauj, thiab txuas ntxiv yog kev xav kom tau li lub siab ntshaw, txojkev xav ntawd dhau los ua kev txhaum. Hauv Tswv Yexus cov thwjtim, Yudas Ixakali-us, raug Dab ntxwgnyoog ntxias ua txhaum rau tus Tswv (Lukas 22:3). Dab ntxwgnyoog kuj ntxias peb tus Tswv Yexus. Thaum Nws pib ua Vajtswv tes haujlwm, Dab ntxwgnyoog muab kev noj haus, koob npe thiab Vajtswv Txojlus los ntxias Yexus, tiamsis Tswv Yexus kovyeej tagnrho. Hauv lub vaj Khexemanes, ib zaug ntxiv Dab ntxwgnyoog los ntxias tus Tswv tso txojkev cawm dim tseg. Tus Tswv thov Vajtswv txog qib uas hws nrog ua ntshav thiab Nws kovyeej lawm. Tus Tswv tawmtsam txojkev nkees ntawm sab nqaij tawv los ntawm kev thov Vajtswv, zoo ib yam li uas Nws twb qhia rau cov thwjtim: tsis txhob ua raws li kuv lub siab nyiam, tiamsis ua raws li koj lub siab nyiam xwb! (nqe 42). Yam cuabyeej ua rog muaj zog sis uas Tswv Yexus siv yog kev taij thov tiag tiag raws li Leej Txiv siab nyiam.
Cia kom hla dhau kev dag ntxias, cov ntseeg Yexus yuav tsum ceevfaj, thov Vajtswv, thiab qaij deb tej kev dag ntxias, txiav tu nrho txojkev txhaum ib yam li Tswv Yexus tau qhia: “Yog koj sab tes xis ua rau koj ua txhaum, ces koj cia li muab sab tes ntawd txiav povtseg! Koj tshuav ib sab tes xwb, zoo dua li muab tagnrho koj lub cev pov rau hauv ntujtawg.” (Mathais 5:30). Swb thaum raug dag ntxias yuav coj peb mus ua txhaum, tsis muaj kev kaj siab, poob koob hmoov thaum tseem ua neej nyob. Yog pheej ua kev txhaum ntxiv tsis kam lees txim ces tus ntsujplig yuav tsis tau txojsia ntev mus ibtxhis. Dua li ntawd, peb txhua tus cheemtsum zeem paub, yus lub dag zog, yeej kov tsis yeej tej kev dag ntxias li, yog li ntawd peb yuav tsum siv zog thov Vajtswv, thov Vaj Ntsujplig pub koob hmoov, lub zog kom hla dhau kev dag ntxias. Yuav tsum nco ntsoov hais tias peb yeej zoo tsis tshaj Tswv Yexus cov thwjtim hnub thaud, “lub siab mas kub lug, tiamsis cev nqaij daim tawv qaug zog kawg li.” (Mathais 26:41). Yog li ntawd, Tswv Yexus qhia kom peb yuav tsum thov Vajtswv tawmtsam tej kev dag ntxias ua ntej nws ntxias tau peb mus ua txhaum hais tias: “Thov koj tsis txhob cia tej kev sim siab ntxias tau peb, tiamsis thov koj pab kom peb dim ntawm dab Ntxwgnyoog txhais tes.” (Mathais 6:13). Thov Vajtswv pab kom peb txhua tus tswj rawv lub neej sab ntsujplig, rau siab ntso thov Vajtswv kom hla dhau txhua yam kev dag ntxias hauv kev ua neej txhua hnub.
Thov Vajtswv,
Vajtswv tus muaj kev hlub! Nyuam yaus yog neeg qaug zog, ua tsis tau zoo thiab niaj hnub ntsib kev dag ntxias. Thov Koj pab kom nyuam yaus paub qaij deb tej kev dag ntxias thiab rau siab ntso thov Vajtswv, vamkhom Koj kom kovyeej lub siab ntshaw, dab kev ntxias, cia Koj lub siab nyiam ua tiav nyob hauv nyuam yaus lub neej. Nyuam yaus tuav Tswv Yexus lub npe thov, Amees.
Peb thov Vajtswv qhia kom peb tso tseg, qaij deb tej kev txhaum thiab xyaum ua neeg thov Vajtswv kom kovyeej kev dag ntxias zoo li cas?
Nyeem Vajluskub hauv peb lub xyoo: Yaxayas 62
Kênh Youtube BHKTHN:
