Klei Aê Diê Blŭ: Y-Mathiơ 28:5-7
Êlan kliăng: “Ñu amâo dôk tinei ôh, kyuadah Ñu kbiă lŏ hdĭp leh tui si Ñu lač leh” (Y-Mathiơ 28:6a)
Klei êmuh ksiêm mĭn: Si ih mĭn kơ ai tiê phung mniê nao čuă msat?Klei Khua Yang Yêsu kbiă lŏ hdĭp tui si Ñu lač leh ya klei yuôm mâo kơ phung ƀĭng kna Ñu ênuk anăn leh anăn kơ drei hruê anei?
Phung ƀĭng kna Khua Yang mâo klei ênguôt leh anăn pap snăk dlăng kơ nai diñu arăng pơ̆ng ti kyâo bi kal, bi knap msĕ si sa čô mnuih soh arăng huĭ snăk. Leh ruĕ hruê Saƀat, phung mniê ƀĭng kna nao čuă msat čiăng bi êdah klei digơ̆ ênguôt hnĭng. Ai tiê digơ̆ ênguôt snăk, digơ̆ rŭng răng amâo thâo ôh hruê mgi si srăng jing.
Truh ti msat, digơ̆ ƀuh dĭng buăl jăk Khua Yang jing mngač msĕ kmlă, ao ñu kô̆ msĕ pliêr klŭng hĕ leh boh tâo prŏng kđhăp ƀăng msat (Y-Mathiơ 28:2-3). Dĭng buăl jăk lač kơ digơ̆ snei, “Đăm huĭ ôh” (êlan 5). Amâo brei digơ̆ huĭ ôh kyuadah ară anei jih jang klei jing mdê leh, Khua Yang Yêsu kbiă lŏ hdĭp leh mơ̆ng phung djiê, klei djiê amâo dưi djă kơ̆ng Ñu ôh. “Ñu amâo dôk tinei ôh, kyuadah Ñu kbiă lŏ hdĭp leh tui si Ñu lač leh. Hriê dlăng anôk arăng bi mđih Ñu” (êlan 6). Klei Khua Yang kbiă lŏ hdĭp amâo djŏ knŏng jing klei hưn bi sĭt brei ƀuh Ñu dưi leh hŏng klei djiê ôh, ƀiădah wăt brei ƀuh jih klei Ñu blŭ mâo klei bi sĭt leh sơăi. Hlăm mmông Khua Yang dôk mă bruă, lu blư̆ Ñu tuôm lač êlâo leh kơ klei anei (dlăng Y-Mathiơ 16:21). Ƀiădah năng ai klei ênguôt ktrŏ tơdah ƀuh arăng pơ̆ng Khua Yang hŏng msei kđĭn bi wơr hĕ klei mĭn phung ƀĭng kna tơl diñu amâo lŏ hdơr ôh kơ klei Khua Yang Yêsu lač leh. Kyuanăn, klei lŏ mñă Khua Yang kbiă lŏ hdĭp leh, tui si Ñu lač leh, bi wir digơ̆ mơ̆ng klei huĭ, klei ênguôt nao kơ klei đăo leh anăn klei čang hmăng.
Knăm bi hdơr kơ klei Khua Yang Yêsu tŭ klei knap mñai, ai tiê grăp čô drei mâo klei ênguôt snăk. Kyua klei soh drei, Khua Yang săn asei mlei tŭ klei djiê ti kyâo bi kal hrô kơ drei. Klei ênguôt sĭt srăng atăt truh kơ klei kmhal kơ klei soh sĭt nik. Hŏng jih ai tiê bi mni kơ Khua Yang kyua Ñu săn asei mlei kyua drei. Ƀiădah bi hdơr kơ klei Khua Yang kbiă lŏ hdĭp tui si Ñu lač leh brei kơ drei klei hơ̆k mơak, klei čang hmăng leh anăn klei dôk kjăp. Khua Yang Yêsu dưi leh hŏng klei djiê, jih jang phung tui hlue Ñu ăt srăng mâo klei ƀuăn rơ̆ng kơ klei hdĭp hlŏng lar mơh, klei djiê kăn lŏ dưi hŏng drei rei. Jih jang klei Khua Yang ƀuăn srăng bi sĭt sơăi hlăm klei hdĭp phung tui hlue Ñu. Wăt tơdah hruê anei si klei hdĭp anei jing, wăt tơdah klei drei tui hlue Khua Yang mâo lu klei lông dlăng dưn, akâo Khua Yang đru grăp čô drei ăt đăo kjăp kơ Ñu jing Pô sĭt suôr: “Kyuadah Kâo dôk hdĭp, diih srăng dôk hdĭp msĕ mơh” (Y-Yôhan 14:19).
Ai tiê drei dôk kjăp mơ̆ tơdah thâo kơ Khua Yang jing Pô Myang leh anăn sĭt suôr?
Wah lač: Hơêč hmưi kơ Ih, Ơ Khua Yang Yêsu! Kyuadah Ih kbiă lŏ hdĭp leh tui si Ih lač leh čiăng hruê anei kâo dưi dôk hdĭp hlăm Ih leh anăn dôk kjăp hlăm klei čang hmăng kơ klei hdĭp hlŏng lar. Brei klei myang mơ̆ng klei Ih kbiă lŏ hdĭp đru kâo mâo klei ktang dưi găn jih klei lông dlăng hlăm klei đăo, sĭt suôr tui hlue Ih leh anăn mă bruă kơ Ih, kyuadah kâo thâo Ih ăt dôk hdĭp leh anăn Ih jing Pô sĭt suôr nanao. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: II Bruă Mtao 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
