Tĭt 2:3-5
“…athei lu sư bơtho lu drŏ-kăn oei moh mă trŏ wă kơ lu sư ‘mêm mơnat kơ lu kon klo sư. Lu sư bơtho lu drŏ-kăn oei moh ‘nĕ pơm đon kư̆ kă athei tơchĕng đon ‘lơ̆ng tơpăt ling lang păng athei tơchĕng tơdrong bơ̆ jang lăm hnam dơnŏ sư kơdih. Jơhngơ̆m sư athei ‘lơ̆ng păng klo sư, lui yom kơ klo sư păng pơm jơhngơ̆m ‘lơ̆ng hăm lu bôl buăl mơ̆n. Sư athei răk đon thoi âu mă tơpă na lu bơngai ưh tam mă lui, sư huay kơ bâu roi tơdrong ‘Bok Kei-Dei.” (Tĭt 2:4-5)
Nơ̆r jet tơchĕng pơwao:
– Bu pŭ iŏk bơtho lu drŏ-kăn oei moh?
– Kăl kơ bơtho akăn oei moh thoi yơ lăm tơdrong arih?
– Lu bơ̆n păng khul bơngai lui đei pơm pơkeh bơih tơdrong ‘nâu thoi yơ?
Pôl jơ̆ng ‘bang Kră Yang Yêssu đei bơtho Tĭt pŭ iŏk bơtho lu ‘bok kră gah tơdrong arih pơm kơmĭl kơ khul bơngai lui, mă-lei hăm lu drŏ-kăn oei moh noh athei lu yă kră bơtho lu sư mă trŏ, yua kơ lu bơngai jing mĕ, jing yă gah ‘bă, yă gah mĕ ling lang pŭ iŏk kăl hloh lăm tơdrong arih pơm kơmĭl wă kơ kon sâu rok kiơ̆. Mă-loi lăm tơdrong arih rim năr, ưh kơ weh wer ôh lăm tơdrong pơma hơtŭt ‘bơm băl, ơh sơ’ngon, kơ’bah gah ‘blŏk mơnat, tam mă hlôh băl… ngăl juăt kơ lĕch tơdrong kơnê̆ ‘bơm kơ lu drŏ-kăn oei moh lăm hnma dơnŏ. Pŭ iŏk bơtho tơdrong âu noh kăl tơpă wă pơjao tơdrong gĭt kăl ‘lơ̆ng lăm Kră Yang đơ̆ng jơhnơr ‘nâu truh tơ jơhnơr đơ̆ng rŏng dơ̆ng, ‘bok Timôthê đei đon lui ‘lơ̆ng bơ̆jang kơ Kră Yang, tơdrong ‘lơ̆ng noh lĕch đơ̆ng đon lui yă păng mĕ sư (II Timôthê 1:5).
Lu bơngai jing mĕ, jing yă lui yom kơ Kră Yang păng đêl đei tơdrong arih ‘lơ̆ng, “athei gơh bơtho mă trŏ” bơtho lu drŏ-kăn oei moh “băt ‘mêm kơ kon klo…” (trong 3-4 BTTHĐ). Băt pơguăng akâu jăn kơdih arih “athei đei đon tơchĕng ‘lơ̆ng tơpăt” wă khan pơm mă trŏ, gơh hơgei, pơm jơhngơ̆m ‘lơ̆ng hăm đĭ đăng bơngai, hăm akâu kơdih…” (trong 5). Hăm lu bơngai oei moh ‘nao wă pơjing hnam dơnŏ chăl dang ei, mă khan pơgơ̆r, bơwih bơwăn, lăm hnam dơnŏ, ưh pă minh ‘nu drŏ-kăn đĕch, mă-lei athei băt kơ pơm ‘lơ̆ng, chu yom klo noh bơih pŭ iŏk jing minh ‘nu drŏ-kăn, mă klo kư̆m wang jang hơdai tơgŭm akăn lăm tơdrong kăl kơplah đei tơdrong jĭ jăn, kơplah rơneh dah kơplah oei hrăt hrot,….Mă-lei gah akăn, jing mĕ oei kăl kơ hiơ̆k tơtăm, bơ̆jang lăm hnam dơnŏ sư kơdih, ‘mêm mơnat kơ kon klo. Noh bơih tơdrong juăt wei lăng hnam dơnŏ ling lang chơt hiôk, păng
“na lu bơngai ưh tam mă lui, sư huay kơ bâu roi tơdrong ‘Bok Kei-Dei.” (tr,5). Yua kơ đơ̆ng tơdrong arih lu bơ̆n pơm ‘lơ̆ng, bơngai nai gô băt thoi yơ gah Kră Yang?
Pŭ iŏk bơwei pơtrơp gĭt kăl tơdrong arih gah bơhngol păng tơdrong arih ‘lơ̆ng đĭ đăng khul bơngai lui, bơngai ‘lŏ kră wă pơm kơmĭl ăn kơ lu bơngai oei moh rok kiơ̆, lu bơngai oei moh pơhrăm pơjuăt rok kiơ đon lui đơ̆ng mĕ ‘bă, yă ‘bok wă kơ lăm hnam dơnŏ chơt hiôk, tơdrong lui kơ Kră Yang huei kơ đei pơjăm, bơngai tam mă lui ‘bôh tơdrong arih lu bơ̆n wă kơ gơh hlôh tơdrong lui kơ Kră Yang, thoi noh khul bơngai lui kăl kơ bơtho tơ’bôh kơ rim ‘nu wang bơwei “ tơdrong gơh hơgei” “ hơdai hăm tơdrong ‘lơ̆ng” wă kơ lơ bơngai băt păng lui kơ Kră Yang, wă kơ đe huei kơ pơjăm, che bơle kơ tơdrong lui, wă kơ anăn Kră Yang gơh ư-ang.
Tơdrong arih lăm hnam dơnŏ lu bơ̆n đei tơ’bôh kơ bơngai tam mă lui jum dăr lăng lu bơ̆n thoi yơ?
Kơkuh kơ Kră Yang ‘Bok Kei-Dei, Ih bơih Tơ’ngla pơgơ̆r hnam dơnŏ kon, bơnê kơ ih yua kơ Ih yua kơ đơ̆ng Nơ̆r Ih tơ’blŏk kơ kon pơm kiơ̆ păng bơwei tơdrong arih ‘lơ̆ng trŏ kơ bơngai lui wă kơ lăm hnam dơnŏ chơt hiôk. Pơm kơmĭl kơ kon sâu, păng pơchrang hơdah anăn Kră Yang krao khan yua anăn Kră Yang Yêsu Kris, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 22.
Kênh Youtube BHKTHN:
