Klei Aê Diê Blŭ: Y‑Tit 2:3-5
Êlan kliăng: “Leh anăn bi hriăm phung mniê hlăk ai khăp kơ ung leh anăn phung anak diñu, dôk djŏ hnơ̆ng, dôk ênuah, thâo mă bruă hlăm sang, êmhač, thâo đup gưt kơ ung diñu, čiăng đăm arăng mưč kơ klei Aê Diê blŭ ôh.” (Y‑Tit 2:4-5)
Klei êmuh ksiêm mĭn: Hlei mâo bruă klam brei mtô lač kơ phung mniê hlăk ai? Ya knuih brei mtô kơ phung mniê hlăk ai? Si drei leh anăn Phung Sang Aê Diê ngă leh bruă klam anei?
Khua ƀĭng kna Y‑Pôl mtô Y‑Tit mâo bruă klam mtô kơ phung khua thŭn kơ knuih hdĭp bi hmô hlăm Sang Aê Diê, hŏng phung mniê hlăk ai snăn phung mniê mduôn brei mtô lač, bi hriăm. Kyua phung amĭ, phung aduôn mâo bruă klam yuôm bhăn hlăm knuih hdĭp bi hmô čiăng kơ anak čô tui hlue. Boh nik hlăm klei hdĭp mda grăp hruê, amâo tlaih ôh kơ klei amâo thâo bi djŏ, ênguôt hnĭng, kƀah klei pap, klei thâo săng… ênưih mjing klei mưng jhat hmăi kơ phung mniê hlăk ai hlăm gŏ sang. Bruă klam mtô anei jing hdră čiăng mtô mñă kơ ênoh yuôm jăk siam hlăm Khua Yang mơ̆ng ênuk anei kơ ênuk mkăn. Y‑Timôthê mâo klei đăo sĭt leh anăn jing pô mă bruă kơ Aê Diê, lu jing kyua klei đăo aduôn leh anăn amĭ ñu (II Y‑Timôthê 2:5). Phung amĭ, phung aduôn huĭ mpŭ kơ Aê Diê leh anăn mâo klei thâo hlăm klei hdĭp, “…brei diñu mtô ya jing jăk”, bi hriăm phung mniê hlăk ai thâo “khăp kơ ung leh anăn phung anak diñu,…”
(êlan 3-4). Thâo bi msiam kơ pô hŏng klei “dôk djŏ hnơ̆ng, dôk ênuah” jing kpă ênô, thâo mĭn, djŏ hnơ̆ng hlăm klei hdĭp hŏng grăp čô mnuih. Hŏng gŏ sang, mô̆, amĭ brei kiă kriê hlăm gŏ sang, djŏ hdră “thâo mă bruă hlăm sang, êmhač, thâo đup gưt kơ ung diñu,… (êlan 5). Hŏng dŭm gŏ sang hlăk ai ară anei, wăt tơdah bruă thâo kiă kriê gŏ sang, tŭk knă, mă bruă hlăm pưk sang amâo djŏ knŏng jing bruă klam hjăn mô̆ ôh, ƀiădah ung ăt mâo bruă klam hrăm mbĭt, đru kơ mô̆ hlăk awăt asei mlei msĕ si ruă duam, hlăk kkiêng anak, amâodah hlăk mmông mâo lu bruă,… Ƀiădah phung mô̆ phung amĭ ăt brei mâo klei mđing uêñ, kriê dlăng bruă pưk sang, mbŏ klei khăp, klei suaih pral kơ ung, kơ anak. Anăn jing klei bhiăn čiăng kriê pioh gŏ sang jăk mơak nanao, leh anăn “čiăng đăm arăng mưč kơ klei Aê Diê blŭ ôh” (êlan 5). Kyuadah mơ̆ng knuih hdĭp drei arăng srăng thâo si Pô Khua Yang jing?
Bruă klam mtô bi hriăm ênoh yuôm hlăm mngăt leh anăn knuih phung đăo jing kơ jih jang mnuih. Phung khua thŭn jing phung bi hmô kơ phung hlăk ai tui hlue, phung hlăk ai tui hriăm knuih huĭ mpŭ kơ aduôn aê, amĭ ama čiăng gŏ sang jăk mơak, arăng amâo mưč ôh kơ Klei Aê Diê Blŭ. Phung ka đăo dlăng kơ knuih hdĭp drei čiăng lač kơ klei đăo kơ Aê Diê, kyua anăn Sang Aê Diê brei mtô leh anăn mđĭ ai grăp gưl thŭn hriăm mbĭt djă pioh “klei thâo mĭn” “klei đăo djŏ sĭt”, čiăng lu mnuih thâo leh anăn đăo kơ Aê Diê, čiăng kơ arăng đăm mưč ôh kơ Klei Aê Diê Blŭ, čiăng Anăn Khua Yang dưi mpŭ mni.
Si phung ka đăo kơ Khua Yang riêng gah lač kơ knuih hdĭp hlăm gŏ sang drei?
Wah lač: Bi mni kơ Aê Diê jing Khua kơ gŏ sang kâo. Bi mni kơ Ih kyua Klei Aê Diê Blŭ mñă kơ kâo hlue ngă leh anăn djă pioh knuih jăk siam phung đăo kơ Krist čiăng kơ gŏ sang mâo klei jăk mơak, bi hmô kơ anak čô, leh anăn Anăn Ih mâo klei guh kơang. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 22
Kênh Youtube BHKTHN:
