Yakaunpaus 1:16-18
Nqe cim:
“Ib puas tsav yam uas zoo thiab ib puas tsav yam koob hmoov uas zoo kawg nkaus yeej yog Vajtswv pub rau peb. Vajtswv yog tus uas tsim lub hnub, lub hli thiab tej hnubqub uas nyob saum nruab ntug. Lub hnub thiab lub hli yeej ua rau lub ntiajteb txawj kaj thiab txawj tsaus, tiamsis Vajtswv tsis zoo li ntawd, Vajtswv yeej zoo Vajtswv li qub.” (Yakaunpaus 1:17)
Lug nug rau sawvdaws xav:
– Peb pheej muaj kev xav licas thaum ntsib tej kev txomnyem hauv lubneej?
– Txhua yam koob hmoov uas tus Tswv pub rau peb yog tej yam twg?
– Yuav uacas peb thiaj cia siab taus rau tus Tswv txhua lub tsamthawj?
Thaum ntsib tej kev txomnyem hauv lubneej, yoojyim ua rau peb muaj kev iab siab, yws cem. Thaum saib mus rau tej yam uas lwm tus muaj, peb pheej khib thiab xav hais tias lubneej tsis ncaj ncees rau peb, vim licas lwm tus pheej txais tau tej yam zoo, tiamsis kuv tsis tau ib yam dabtsi? Ntawd yog tej kev xav uas peb pheej muaj, thiab qee zaug kuj yog yam uas peb coob leej tabtom ntsib tamsim no ntag. Tiamsis Yakaunpaus qhia hais tias Vajtswv tus uas muaj kev hlub, dawbhuv yeej tsis ntxias leejtwg li (Yakaunpaus 1:12-15 HMOWSV), vim li ntawd nws qhuab ntuas hais tias: “Cov kwvtij uas kuv hlub, nej tsis txhob pub leejtwg ntxias tau nej yuam kev” (nqe 16). Tsis txhob ntseeg tej lus dag ntxias vim peb muaj ntau tshaj tej uas peb xav, ntawd yog ib puas tsav yam uas zoo thiab ib puas tsav yam koob hmoov uas zoo kawg nkaus tus Tswv pub rau peb (nqe 17).
Nyob hauv lubneej txhua hnub, yog ua tib zoo xav peb yuav pom hais tias tej yam tus Tswv pub zoo npaum licas. Txhua tagkis sawv ntxov, peb muaj ib hnub tshiab ua neej, muaj huab cua los ua pa, muaj cov txheeb ze sib pab, thiab ntau yam zoo ntxiv uas suav tsis txheeb. Tiamsis yam koob hmnoov zoo kawg nkaus uas Yakaunpaus hais txog hauv ntu Vajluskub no ces yog tus Tswv “siv Nws Txojlus uas muaj tseeb yug peb tshwm los” (nqe 18 HMOWSV). Txojlus muaj tseeb yog Txojmoo Zoo uas pab peb paub txog txojkev cawmdim thiab ntseeg Tswv Yexus kom tau yug dua tshiab ib zaug ntxiv. Yug dua tshiab yog zaj txujci loj thiab tseemceeb heev raws li Cawmseej Yexus tau qhia hais tias: “yog leejtwg tsis yug dua tshiab, tus ntawd yeej tsis pom Vajtswv lub Tebchaws li.” (Yauhas 3:3).
Thaum cov nyeem tsab ntawv no tabtom ntsib tej kev txomnyem, Yakaunpaus xav kom lawv txhob hnov qab hais tias txawm yog lawv tsis muaj ntau khoom nyiaj txiag lossis hwjchim meejmom ntiajteb, tiamsis tej yam uas lawv tabtom muaj zoo dua txhua tsav yam huv tibsi. Tsis muaj ib yam dabtsi yuav piv tau txoj koob hmoov uas tau ua Vajtswv cov menyuam. Nyob hauv tsab ntawv Efexus tshooj 1, Timthawj Paulus qhia hais tias peb muaj “ib puas tsav yam koob hmoov saum ntuj ceebtsheej” thiab nws sau tawm sib txuas zaws tej koob hmoov ntawd, xws li: tau zam txim, tau cawmdim, tau Vaj Ntsujplig nyob nrog, tau paub txog Vajtswv tes haujlwm thiab Nws lub siabnyiam (Efexus 1:3-14). Tsis txhob xav txog tej yam uas yus tsis muaj thiab ua neej yws cem lawm, tiamsis cia li suav tej koob hmoov zoo kawg nkaus saum ntuj ceebtsheej uas tus Tswv pub thiab ua neej nco Nws txiajntsig txhua hnub.
Thov Vajtswv,
Tus Tswv, nyuam yaus ua Koj tsaug vim Koj kev muab pub tsis tu ncua hauv nyuam yaus lubneej. Nyob hauv Koj nyuam yaus tau zam txim, tau ua Koj menyuam thiab tau Vaj Ntsujplig nyob nrog nraim. Thov pab nyuam yaus hla dhau tej kev txomnyem hauv lubneej los ntawm nplooj siab ua tsaug, cia siab thiab zeem paub hais tias Koj yog tus uas siab dawb siab zoo kawg nkaus. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Hnub no, peb ua tus Tswv tsaug txog yam dabtsi?
Nyeem Vajluskub hauv peb lub xyoos: Loos 4
Kênh Youtube BHKTHN:
