Klei Aê Diê Blŭ: Klei Mtô Mñă Klei Bhiăn 31:1-8
Êlan kliăng: “Yêhôwa yơh jing pô êbat ti anăp ih; Ñu srăng dôk mbĭt hŏng ih, Ñu amâo srăng lui ih amâodah hngah kơ ih ôh. Đăm huĭ amâodah êdu ai ôh” (Klei Mtô Mñă Klei Bhiăn 31:8)
Klei êmuh ksiêm mĭn: Si Y-Môis mñă, mđĭ ai phung ƀuôn sang leh anăn Y-Yôsuê? Ai tiê Y-Môis brei ƀuh hlei jing Pô kiă kriê ti dlông hĭn? Thâo săng klei anei si srăng đru drei hlăm klei mă bruă kơ Aê Diê?
Êlâo kơ wĭt hŏng Aê Diê, Y-Môis mâo leh klei mđĭ ai kơ phung ƀuôn sang Israel. Hĭn kơ jih jang, ñu thâo săng ai tiê rŭng răng wăt hŏng hur har phung ƀuôn sang Israel tơdah mprăp nao plah miă krĭng Lăn Aê Diê Ƀuăn. Năng ai dưi lač, sa hlăm dŭm klei diñu rŭng răng hĭn hlăm anăn jing khua gĭt gai Y-Môis amâo mbĭt hŏng diñu găn êa krông Yurdan mŭt hlăm Lăn Aê Diê Ƀuăn ôh. Ñu jing khua gĭt gai tal êlâo mơ̆ng phung ƀuôn sang Israel leh anăn ăt jing pô hrăm mbĭt hŏng diñu mơ̆ng hlăk kbiă mơ̆ng čar Êjip truh kơ ară anei. Y-Môis jing sa čô mâo klei thâo gĭt gai snăk leh anăn mâo klei hmăi prŏng snăk hŏng phung ƀuôn sang Aê Diê.
Thâo kơ klei anei, mphŭn mơ̆ng êlan 3 truh êlan 8 Y-Môis lu blư̆ mñă kơ phung ƀuôn sang Aê Diê snei, amâo djŏ ñu amâodah hlei pô mkăn ôh ƀiădah Aê Diê Pô nao êlâo atăt êlan kơ phung ƀuôn sang Aê Diê. Ñu čiăng mñă kơ phung ƀuôn sang Aê Diê brei đăo kơ Aê Diê hrô kơ knang kơ ñu. Amâo djŏ knŏng dŭm năn ôh, Y-Môis lŏ iêô Y-Yôsuê nao ti anăp phung ƀuôn sang Aê Diê čiăng mđĭ ai, đru pô lŏ čuê Y-Yôsuê amâo ƀuh ktrŏ đei ôh hŏng bruă prŏng prĭn Y-Môis jao kơ ñu. Bruă anei msĕ si sa klei bhiăn jao klei dưi mơ̆ng Y-Môis kơ Y-Yôsuê ti anăp jih jang phung ƀuôn sang Israel. Hŏng sa čô khua gĭt gai lŏ čuê, amâo mâo ôh klei yuôm bhăn leh anăn năng mpŭ hĭn tơdah Y-Môis mđĭ ai: “Yêhôwa yơh jing pô êbat ti anăp ih; ñu srăng dôk mbĭt hŏng ih, ñu amâo srăng lui ih amâodah hngah kơ ih ôh…” (êlan 8).
Pô gĭt gai hlăm mngăt brei thâo săng klei yuôm bhăn hĭn hlăm bruă pô gĭt gai jing Aê Diê, Pô kiă kriê ti dlông hĭn nao êlâo nanao čiăng atăt gai phung ƀuôn sang Ñu, Ñu jing Pô “bi rai phung găp djuê anei ti anăp ih” čiăng kơ phung ƀuôn sang Aê Diê “mă bha ala čar diñu”, Aê Diê amâo srăng lui amâodah hngah kơ phung ƀuôn sang Ñu ôh. Mdê hŏng hua gĭt gai ti lăn ala “mgô̆ phung ƀuôn sang gưt kơ pô… mă klei dưi kiă kiê phung ƀuôn sang”, bi khua gĭt gai hlăm Aê Diê “snăn srăng jing dĭng buăl…, jing mnuih mă bruă kơ jih jang”. Anăn jing mnuih mâo Aê Diê yua čiăng bi leh hdră kñăm Ñu hlăm phung ƀuôn sang Aê Diê (Y-Markôs 10:42-45). Snăn, khua gĭt gai amâo djŏ knŏng jing pô atăt êlan leh anăn đru kơ phung ƀuôn sang bi leh bruă klam mơ̆ng Aê Diê ôh, ƀiădah truh mmông Aê Diê, lŏ brei mơak mđĭ ai leh anăn đru kơ phung Aê Diê ruah ngă khua gĭt gai lŏ čuê bruă pô, čiăng kơ bruă Aê Diê dưi lŏ čuê hŏng klei jăk. Thâo kral Aê Diê jing Pô kiă kriê ti dlông hĭn đru jih jang drei bi mguôp, gĭr đru bi leh hdră kñăm Aê Diê hlăm Sang Aê Diê.
Si klei bi êdah brei ƀuh drei thâo kral Aê Diê jing Pô kiă kriê ti dlông hĭn hlăm Sang Aê Diê?
Wah lač: Ơ Khua Yang, bi mni kơ Ih kyua Ih jing Pô kiă kriê ti dlông hĭn hlăm Sang Aê Diê. Akâo kơ Ih đru jih jang hmei êbat nanao hlue gru jơ̆ng Ih čiăng bi leh bruă klam Aê Diê jao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
