Klei Aê Diê Blŭ: Y-Mathiơ 18:15-17
Êlan kliăng: “Kyuadah Yêhôwa mkra hlei pô Ñu khăp, msĕ si sa čô ama ngă kơ anak ñu khăp” (Klei Bi Hriêng 3:12).
Klei êmuh ksiêm mĭn: Si Khua Yang Yêsu mtô kơ knhuang bi mkra klei hŏng mnuih ngă soh hŏng drei pô? Ya jing klei kñăm čiăng knhal tuč kơ klei mkra mjuăt sa čô mnuih ngă soh? Si ngă drei yua hdră êlan anei hŏng phung ayŏng adei drei?
Mơ̆ng akŏ kdrêč 18, Khua Yang Yêsu yua rup phung hđeh điêt, jing phung mâo klei đăo êđal kơ Khua Yang čiăng mtô kơ phung ƀĭng kna thâo bi uêñ mĭn, bi đru bi mđĭ klei đăo hdơ̆ng digơ̆. Khua Yang čiăng phung ƀĭng kna thâo săng kơ klei awăt, leh anăn klei soh phung ayŏng adei digơ̆ ngă leh, ƀiădah amâo mâo ư ai leh anăn tŭ ôh kơ klei soh digơ̆ ngă anăn. Boh blŭ “ngă soh” čiăng lač kơ klei hdĭp ti gŭ hnơ̆ng čuăn, amâo djŏ hŏng hdră êlan Khua Yang mtă. Tơdah sa čô ayŏng adei ngă soh hŏng drei, knhuang bi mkra klei tal êlâo hĭn jing “hưn” kơ gơ̆ klei soh gơ̆ ngă leh, čiăng lač đru hjăn gơ̆ pô ƀuh klei soh gơ̆ ngă leh plah wah dua čô. Bi mkra mă klei knŏng hjăn dua čô srăng đru amâo bi prŏng ya klei mâo ôh. Tơdah ayŏng adei ngă soh hmư̆ klei drei snăn drei mâo klei bi grăng hŏng gơ̆. Đăm ôh hrô kơ klei bi mkra mă klei plah wah dua čô snăn drei hiu blŭ êkŭt kơ ayŏng adei drei brei lu mnuih thâo, amâodah knŏng kčŭt kơ klei soh sa nah, amâo mâo klei bi ktuê mơ̆ng pô ngă soh ôh. Si gah thâo, thâo drei jing soh. Bi mkra klei hŏng klei khăp srăng bi mngač jih jang klei.
“Ƀiădah tơdah ñu amâo dôk hmư̆ ôh”, knhuang tal dua jing brei drei jak ba sa amâodah dua čô mnuih drei dưi knang nao mbĭt đru bi mkra klei hŏng gơ̆ (Klei Mtô Mñă Klei Bhiăn 19:15). Klei hưn bi sĭt mơ̆ng dua amâodah tlâo čô mnuih srăng đru pô ngă soh thâo, amâo djŏ kyua klei bi roh amâodah bi êmut ôh, ƀiădah hŏng klei hưn bi sĭt jưh ti atur klei sĭt nik anăn, digơ̆ srăng ƀuh klei soh digơ̆ ngă leh. Tơdah pô anăn ăt ngă klei khăng kŏ amâo tŭ ôh kơ ñu mâo klei soh, knhuang tal tlâo jing bi êdah klei anăn ti anăp jih jang Phung Sang Aê Diê. Amâo djŏ sa čô amâodah sa êpul ôh ngă klei mkra mjuăt ƀiădah Phung Sang Aê Diê. Klei kñăm čiăng kơ klei mkra mjuăt amâo djŏ čiăng bi hêñ ôh ƀiădah đru pô ngă soh thâo kơ ñu dôk ngă bi klăk hŏng klei Khua Yang mtă. Tơdah pô ngă soh amâo čiăng dôk hmư̆ ôh, snăn Phung Sang Aê Diê srăng yap ñu Msĕ si phung amâo mâo đăo amâodah sa čô rĭng jia. “Đăm yap diñu msĕ si roh ôh, ƀiădah brei mtô kơ diñu msĕ si kơ phung ayŏng adei” (II Têsalônik 3:15).
Aê Diê jing Pô bŏ hŏng klei khăp ƀiădah ăt jing Pô kpă ênô mơh, Ñu amâo tŭ ôh drei ngă soh. Hlăm Phung Sang Aê Diê, drei amâo dưi weh đuĕ ôh kơ klei ngă soh hdơ̆ng ayŏng adei, bi hmăi jhat kơ anăn Khua Yang leh anăn kơ Phung Sang Aê Diê Ñu. Drei khăng msir mkra klei anăn hŏng klei čhuai jing čih yăl dliê hlăm facebook, yăl dliê brei lu mnuih thâo, amâodah duah êlan rŭ ênua…
Yua dŭm knhuang bi mkra klei tui si Khua Yang mtă leh đru drei mkra hŏng klei khăp čiăng dưi lŏ bi grăng hŏng phung ayŏng adei drei.
Si ngă drei tuôm hiu blŭ êkŭt mơ̆ kơ klei soh phung ayŏng adei drei ngă leh?
Wah lač: Ơ Khua Yang, tơdah phung ayŏng adei bi êdah klei soh kâo ngă leh, đru kâo kmhal hĕ mtam, leh anăn đru kâo yua klei Ih mtă kăp đru phung ayŏng adei kâo thâo kơ digơ̆ ngă soh leh, čiăng kơ digơ̆ kmhal leh anăn mâo klei Ih pap brei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Bi Hriêng 11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
