Mathais 18:15-17
Nqe cim:
“Tus TSWV qhuab ntuas tus uas nws hlub ib yam li leej txiv qhuab ntuas tus tub uas nws cia siab rau” (Pajlug 3:12)
Lus nug rau sawvdaws xav:
– Tswv Yexus qhia txog txhua kauj ruam uas yuav mus ntuas tus uas ua txhaum yus li cas?
– Lub hom phiaj kawg ntawm kev qhuab ntuas tus neeg ua txhaum yog dab tsi?
– Peb siv txoj kevcai no rau peb cov kwvtij ntseeg li cas?
Pib hauv tshooj 18, Yexus siv tus duab ntawm cov menyuam yaus, yog cov neeg uas muaj kev ntseeg mos rau ntawm Vajtswv los qhia rau cov thwjtim kom yuavtsum hmov tshua saib xyuas thiab txhawb lawv zog hauv kev ntseeg. Vajtswv xav kom nws cov thwjtim paub ua siab ntev rau tus uas qaug zog, yuam kev ua txhaum ntawd, tiamsis tsis yog txais yuav lawv los ntawm kev digmuag ntuv zais rawv kev txhaum. Lolus “ua txhaum” txhais tau tias tsis ua raws li Vajtswv txoj kevcai qhia. Thaum yus ib tug kwvtij ua txhaum tawmtsam rau yus, ces kauj ruam daws teebmeem tim ib yog yuavtsum “ntuas” txhais hais tias pab lawv zeem paub txog yus kev txhaum ntawm yus ob leeg. Daws tim ntsej tim muag ntawm yus ob leeg yuav pab tau tej teebmeem tsis mus deb sab nraud thiab tsis dhau uas teebmeem loj. Thaum tus kwvtij ua txhaum ntawd kam mloog yus hais, ces txoj kev sib raug zoo ntawm nws thiab yus rov kho tau zoo li qub. Tiamsis tsis txhob muaj ib tug twg maj muab yus tus kwvtij uas ua txhaum rau yus hais phem rau tus ub tus no lossis txiav txim ib tog tuaj xwb, vim tsis tau hnov tus ua txhaum tej lus, qee zaus yus yog tus ua txhaum thiab los muaj. Yog li ntawd cia yus ob leeg sib tham hauv kev hlub yuav pom tseeb qhov teebmeem.
“Tiamsis yog nws tsis mloog” ces kauj ruam tim ob coj ob peb leeg uas yus ntseeg siab nrog yus mus ua timkhawv sib pab daws (2 Kevcai19:15). Dhau ntawm ob peb leeg tej lus ua tim khawv txog qhov tseeb yuav pab tau tus uas ua txhaum zeem paub nws kev txhaum. Tiamsis yog nws tseem tawv ncauj tsis kam lees kev txhaum thiab ces kauj ruam tim peb, tshaj tawm qhia rau pawg ntseeg paub. Tsis yog ib tug lossis ib pab neeg ntuas lawm tiamsis yog tagnrho pawg ntseeg koom ntuas. Homphiaj tsis yog hais phem tiamsis cia tus ua txhaum zeem paub hais tias nws tes haujlwm ua tabtom mus tsis raws Vajtswv Txojlus qhia lawm. Yog nws tseem tsis mloog pawg ntseeg lus thiab, ces cia li suav hais tias nws yog lwm haivneeg lossis yog ib tug neeg uas sau se “Tiamsis nej tsis txhob ntxub nws, nej yuav tsum ntuas nws ib yam li nej ntuas nej tej kwvtij” (2 Thexalaunikes 3:15).
Vajtswv yog kev hlub tiamsis Nws kuj yog Tus uas ncaj ncees, Nws yuav tsis ua siab ntev nyiaj peb tej kev txhaum. Hauv kev pehawm, ua haujlwm hauv pawg ntseeg, peb zam tsis dhau tej kev ua yuam kev, ib leeg ua txhaum rau ib leeg, ua rau luag hais tsis zoo rau Vajtswv thiab pawg ntseeg. Peb txhua tus pheej nyiam daws tej teebmeem yuam kev los ntawm qhov muab tso rau saum huab cua lossis mus hais phem qhia rau tus ub tus no lossis nrhiav kev ua pauj… Siv txhua kauj ruam no los daws teebmeem raws li Vajtswv Txojlus qhia, pab peb daws tau teebmeem hauv kev hlub thiab lub homphiaj yog kom peb rov tau peb tus kwvtij dua.
Thov Vajtswv:
Tus Tswv, thaum uas muaj lus qhuab ntuas nyuam yaus thov pab nyuam yaus paub lees txim kev txhaum kom yeej tamsim ntawd. Thiab thov pab nyuam yaus paub siv Koj Txojlus qhia los pab nyuam yaus cov kwv tij ntseeg kom zeem paub txog lawv kev txhaum, thiab lees txim kom tau Vajtswv Koj zam txim rau lawv. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas pheej hais phem rau peb cov kwvtij ntseeg thaum uas lawv yuam kev?
Nyeem Vajluskub hauv peb lub xyoos: Pajlug 11
Kênh Youtube BHKTHN:
