Klei Aê Diê Blŭ: II Klei Yăl Dliê 28:1-4
Êlan kliăng: “Tơdah ih mŭt hlăm ala čar Yêhôwa Aê Diê ih brei kơ ih, đăm hriăm ôh tui hlue klei soh jhat phung găp djuê anăn ngă” (Klei Mtô Mñă Klei Bhiăn 18:9).
Klei êmuh ksiêm mĭn: Hlei pô Mtao Y-Ahas tui, čiăng ngă klei Aê Diê bi êmut kheh? Ya ngă ñu ngă msă snăn lă? Ya klei bhiăn lăn ala drei ƀuh dôk bi hmăI kơ drei?
Hdruôm hră Klei Yăl Dliê amâo čih ôh kơ klei jăk Y-Ahas mtao Yuđa ngă ƀiădah čih yăl dliê snei, “Leh anăn ñu amâo ngă klei djŏ ôh ti anăp ală Yêhôwa msĕ si aê ñu Y-Đawit” (êlan 1). Ñu mâo klei bi hmô jăk mơ̆ng aê ñu pioh kơ ñu tui hlue, anăn jing Mtao Y-Đawit sa čô huĭ mpŭ kơ Aê Diê, amâo ngă klei soh kkuh mpŭ kơ rup yang ôh; ama ñu jing Mtao Y-Jôtham ăt jing sa čô mtao jăk mơh, amâo čih yăl dliê mâo sa anôk čhŏ ôh hlăm klei hdĭp gơ̆. Ƀiădah lă, hrô kơ klei tui phung aê leh anăn ama ñu pô, Mtao Y-Ahas êbat tui hlue êlan phung mtao Israel, jing phung mtao kkuh mpŭ kơ rup yang.
Mtao Y-Ahas tuh tia rup yang Ƀaal pioh kkuh mpŭ leh anăn čuh mnơ̆ng ƀâo mngưi hlăm tlung anak êkei Y-Hinôm, giăm ƀuôn Yêrusalem. Anei jing anôk phung Kanaan khăng myơr phung anak êkei leh anăn phung anak mniê diñu kơ yang Môlek ti sa bĭt anôk pia jing anôk Tôphet (II Bruă Mtao 23:10).
Hlăm klei bhiăn kkuh mpŭ kơ yang Môlek, arăng ngă sa rup yang hŏng msei leh anăn mđih anak điêt diñu ti dua nah kngan rup yang dôk pa leh anăn čuh bi hlơr rup yang snăn hđeh điêt anăn srăng djiê ti kngan rup yang anăn. Mtao Y-Ahas tui klei bhiăn phung Kanaan myơr anak êkei ñu pô jing mnơ̆ng ngă yang. Anăn jing klei bhiăn jhat snăk, kyua klei anăn yơh Aê Diê suôt leh phung găp djuê anei mơ̆ng phung Israel. Aê Diê mtă leh kơ phung ƀuôn sang Ñu amâo dưi tui phung anăn ôh, kyuadah tơdah ngă msă snăn, sĭt nik Aê Diê srăng suôt đuă diñu mơ̆ng lăn čar diñu (Klei Mtô Mñă Klei Bhiăn 18:9-12). Mtao Y-Ahas ngă yang leh anăn čuh mnơ̆ng ƀâo mngưi msă mơh ti anôk dlông, ti dlông kbuôn, leh anăn ti gŭ grăp ƀĕ ana kyâo mtah, čiăng lač ñu kkuh mpŭ kơ rup yang hŏng jih ai tiê hlăm tar ƀar anôk.
Mtao Y-Ahas mâo dua pluh thŭn tơdah ñu dơ̆ng kiă kriê, wăt tơdah arăng bi hriăm leh ñu kơ klei đăo gŏ sang leh anăn ala čar, mâo phung khua pô hưn êlâo Aê Diê dôk ti djiêo, ƀiădah ñu ruah tui hlue êlan phung mtao Israel kkuh mpŭ kơ rup yang, năng ai čar Israel ktang hĭn kơ čar Yuđa, leh anăn mâo klei bi hmăi hĭn hlăm bruă kđi čar. Hruê anei, arăng khăng tŭ klei bi hmăi mơ̆ng ala čar mâo klei đĭ kyar hĭn, mâo lu mnuih tui tiŏ klei dôk dơ̆ng ƀơ̆ng huă gao klei bhiăn mơ̆ng phung čar Yŭ msă si lông bi dôk êkei mniê, bi dôk êkei hdơ̆ng êkei, mniê hdơ̆ng mniê…Brei phung đăo hngah đăm tui ôh knhuah dôk dơ̆ng ƀơ̆ng huă leh anăn klei bhiăn soh jhat lăn ala anei, wăt tơdah arăng mplư amâodah mgô̆ ngă klei Aê Diê “bi êmut kheh” msă si klei kƀuč, klei dlăng kngan, klei đing đăo kơ ksơ̆k mtâo leh anăn klei kkuh kơ rup yang… Êbat tui hlue bă êlan Aê Diê hŏng jih ai tiê, tui klei bi hmô jăk mơ̆ng phung nao êlâo hlăm Phung Sang Aê Diê čiăng hdĭp bi mơak kơ Khua Yang leh anăn lŏ jing klei bi hmô jăk pioh kơ phung anak čô tui hlue.
Ti krah lăn ala kkuh mpŭ kơ rup yang, hdĭp hŏng klei gao klei bhiăn, si ngă drei tui hlue kjăp êlan Khua Yang mơ̆?
Wah lač: Ơ Khua Yang, đru kâo amâo tui phung lăn ala čiăng ngă klei amâo bi mơak kơ Ih ôh, ƀiădah đru kâo dôk kjăp ngă tui si klei Ih mtă čiăng bi mơak kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mmuñ Hđăp 16-17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
