2Xwmtxheej Vajntxwv 28:1-4
Nqe cim:
“Thaum nej mus nyob hauv lub tebchaws uas tus TSWV uas yog nej tus Vajtswv muab rau nej, nej tsis txhob mus xyaum coj thiab ua tej kev phem kev qias li cov neeg uas nyob hauv lub tebchaws ntawd ua” (2Kevcai 18:9)
Lus nug rau sawvdaws xav:
– Vajntxwv Ahas xyaum leejtwg ua tej haujlwm uas Vajtswv ntxub kawg nkaus?
– Vim li cas Vajntxwv ua li ntawd?
– Peb pom peb tabtom raug tej kev phem kev qias ntiajteb cuamtsuam li cas?
Vajntxwv Ahas uas kav tebchaws Yudas tsis tau phau ntawv Xwmtxheej Vajntxwv ntau nqis zoo tiamsis sau hais tias “Ahas tsis ua lub neej zoo raws li nws yawgkoob uas yog Vajntxwv Daviv; tiamsis nws ua tej uas tsis haum tus TSWV lub siab nyiam,” (nqe 1). Vajntxwv muaj tus qauv zoo ntawm nws cov yawgkoob rau nws xyaum raws, tshwjxeeb zoo li vajntxwv Daviv yog tus uas hwm Vajtswv thiab tsis ua txhaum kev pe mlom, thiab nws txiv Yauthas kuj yog ib tug vajntxwv zoo, tsis muaj ib qho phem uas sau tseg hauv nws lub neej li. Txawm li ntawd los vajntxwv Ahas ua raws li cov vajntxwv Yixayees ua, lawv yog cov vajntxwv uas pe hawm mlom thiab tsis hwm Vajtswv.
Vajntxwv nchuav tus mlom tooj Npa-as los pe thiab hlawv hmoov tshuaj tsw qab hauv lub Hav Hinoos uas nyob ze lub nroog Yeluxalees. Ntawd yog thaj chaw hu ua Taufes uas cov Kana-as pheej coj lawv tej tub tej ntxhais tuaj tua hlawv fij rau tus mlom Maulej (2 Vajntxwv 23:10). Nyob rau hauv kevcai kev pehawm tus mlom Maulej, luag puab ib tug mlom hlau xyab ob txhais npab tiaj tiaj thiab muab lawv cov menyuam txawb rau ntawm tus mlom ob txhais npab, hlawv tus mlom kom kub tuaj ces tus menyuam ntawd yuav tuag rau hauv tus mlom ob txhais npab. Vajntxwv Ahas kuj ua raws li cov Kana-as tej kevcai thiab muab nws tus tub tua ua khoom fij. Ntawd yog tej kev phem kev qias uas phem kawg nkaus, vim li ntawd Vajtswv thiaj tau ntiab cov neeg no kom khiav deb ntawm cov Yixalayees. Vajtswv yeej qhia rau Nws haivneeg kom tsis txhob xyaum raws li cov neeg ntawd ua, yog lawv xyaum lawv kuj yuav raug ntiab tawm ntawm lawv lub tebchaws mus ib yam (2Kevcai 18:9-12). Vajntxwv Ahas kuj tua tsiaj hlawv fij thiab hlawv hmoov tshuaj tsw qab rau ntawm tej chaw teev dab uas ua rau saum tej pov roob thiab hauv qab tej tsob ntoo uas muaj nplooj ntxoov nyos, txhais hais tias vajntxwv tas siab pe dab pe mlom rau txhua qhov chaw.
Vajntxwv Ahas ua vajntxwv thaum nws hnub nyoog muaj nees nkaum xyoo, txawm yog vajntxwv tau kawm txhij txhua txog kev ntseeg ntawm tsev neeg, lub tebchaws thiab muaj Vajtswv cov cev lus nyob ntawm nws ib sab, tiamsis vajntxwv Ahas hos mus xyaum ua raws li cov vajntxwv Yixayees ua, tej zaum vim qhov uas tebchaws Yixayees yeej ib txwm muaj zog dua tebchaws Yudas. Niaj hnub nimno, tibneeg pheej nyiam cia lawv tus kheej xyaum raws tej lub tebchaws uas vam meej dua. Muaj coob tus twb xyaum kev ua neej raws li tej uas tibneeg nyiam ua thiab xyaum raws cov tebchaws sab hnub poob, ua neej sim, lossis pojniam yuav pojniam, txiv neej yuav txiv neej…Ib tus ntseeg tsis txhob mus xyaum tej kev phem kev qias uas neeg ntiajteb ua, txawm yog yuav raug haub ntxias lossis raug quab yuam ua tej haujlwm Vajtswv “ntxub” xws li saib yaig, qaug rau yam tsis muaj tseeb, pe mlom… los tsis txhob ua. Tiamsis cia li mus raws tus Tswv txoj kev, xyaum cov neeg uas muaj tus qauv zoo ua ntej nyob hauv pawg ntseeg, kom ua neej haum Vajtswv siab thiab rov ua qauv rau yus tej menyuam, xeeb leej xeeb ntxwv xyaum.
Thov Vajtswv:
Tus Tswv, thov Koj pab nyuam yaus tsis xyaum neeg ntiajteb ua tej yam uas tsis haum Koj siab. Tiamsis thov pab nyuam yaus sawv ruaj rau hauv Koj Txojlus kom ua neej kovyeej tej kev dag ntxias. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Hauv lub ntiajteb uas pe mlom, ua neej ywj siab, peb puas ua neej raws li Vajtswv lub siab nyiam?
Nyeem Vajluskub hauv peb lub xyoos: Ntawv Nkauj 16-17
Kênh Youtube BHKTHN:
