Pajlug 25:11-12
Nqe cim:
“Lo lus zoo uas hais rau lub sijhawm tsimnyog hais zoo ib yam li tej kub uas muab vuam txaij nraug zees rau ntawm lub tais nyiaj” (Pajlug 25:11)
Lus nug rau sawvdaws xav:
– Vajntxwv Xalumoos qhia txog tus cwjpwm twg yuavtsum muaj rau hauv kev hais lus?
– Xalumoos muab tej kev sib piv twg los piav txog kev muaj nqis ntawm tej tus cwjpwm no?
– Nqe Pajlug no pab peb zeem paub peb tus kheej yuavtsum hloov yam dab tsi?
Zeem paub tej lus uas tsis ua tib zoo hais yuav coj kev puastsuaj los rau tus hais (Pajlug 25:9-10), Vajntxwv Xalumoos tau qhia nws cov menyuam hais tias “Lo lus zoo uas hais rau lub sijhawm tsimnyog” lossis yog sijhawm ces muaj nqis li “tej kub uas muab vuam txaij nraug zees rau ntawm lub tais nyiaj”. Tus duab “lub txiv duaj kub uas nyob hauv lub tais nyiaj” ( nqe 11 HMOWSV). Piav txog txhua yam uas zoo nkauj, muaj nqis thiab tib zoo nchuav los.
Ntawm no muaj peb yam “Lo lus hais yog sijhawm” cheemtsum muaj. Tim 1 yog yam tsimnyog. Hauv lo lus “ntuas” ntawm nqe 12 muaj lub ntsiab hais tias “kho tej yam uas yog hauv rooj kev sib kom” thiab kuj muaj lub ntsiab tias“hais kom sib haum” lossis “tuav kev ncaj ncees”. Lolus ntuas ntawm tus neeg txawjntse “mas zoo yam nkaus li nplhaib kub saw kub” (nqe 12 HMOWSV) Ib tug neeg txawj ntse tej lus qhuab ntuas tseem ceeb npaum li “ib txoj saw kub, ib qho zoo nkauj ntawm cov tseem kub.” Yog li ntawd, tej lus hais lossis kev txiav txim siab txawjntse yuavtsum yog raws li qhov tseeb thiab homphiaj yog kho qhov yuam kev lawm, kom pab tau tus mloog paub ua neej txawjntse. Tim 2 yog sijhawm. Ib lolus hais lossis kev txiav txim siab yog tau zoo li “tej kub uas muab vuam txaij nraug zees rau ntawm lub tais nyiaj”thiab tej lus hais yog sijhawm mas zoo li lub tswvyim nchuav nyiaj nchuav kub. Lolus tsimnyog hais, hais rau thaum yog sijhawm yuav muaj nqis tshaj ntau npaug. Tiamsis lolus hais tsis yog sijhawm tsis yog tsam thawj yuav tsis muaj nqis. Tus cev lus Yaxayas hais tias: “Tus TSWV uas yog Vajtswv pub tswvyim rau kuv, yog li ntawd, kuv thiaj txhawb tau cov neeg uas qaug zog…” (Yaxayas 50:4). Muaj qee lub sij hawm tus “uas qaug zog” xav tau tej lus qhia uas tsimnyog “txhawb zog” heev dua li tej lus thuam. Yauj hais rau Elifas tias: “Tej lus tseeb hloov tau lwm tus lub siab, tiamsis nej tej lus tsis muaj qabhau li” (Yauj 6:25). Thaum Yauj raug kev txom nyem mob lub cev, lub siab ntsws thiab ntsuj plig, ces tej lus “yws” tsis muaj nqis dab tsi! Tim 3 yog neeg. “Tus uas txawjntse ntuas tus uas tig ntsej mloog” (nqe 12). Lo lus “mloog” hauv lus Henplais muaj lub ntsiab hais tias ua raws (2Kevcai 6:4). Tsis yog txhua tus uas muaj pob ntseg puavleej paub mloog, thiab tsis yog txhua tus uas mloog puavleej ua raws li tej lus qhia uas yus hnov. Yog li ntawd, lolus ntuas ntawm tus neeg txawjntse muaj nqis heev, zoo li nkawm kauj ntseg uas yuavtsum muaj rau lub “pob ntseg uas nyiam mloog” coj rau yuav zoo nkauj dua li yav tas los. Tej lus ntuas ntawm tus neeg txawj ntse yuav nkag mus rau tus neeg uas ua tib zoo mloog thiab ua raws. Tus neeg txawjntse ntuas tus uas paub mloog lus, txaus siab kho qhov uas yuam kev mas yuav zoo li lub kauj ntseg kub zoo nkauj coj rau ntawm pobntsej. Ib yam li ntawd, tej lus txawjntse kuj yuavtsum tau hais kom yog neeg thiaj li muaj nqis.
Thov Vajtswv:
Tus Tswv, tej lus hais yog qhov uas nyuam yaus tswj nyuaj tshaj, yog li ntawd thov pab nyuam yaus paub ua tibzoo siv tej lus txawjntse kom yog sijhawm thiaj muaj nqis rau tus uas mloog. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb tej lus hais muaj nqis dab tsi rau tus uas mloog?
Nyeem Vajluskub hauv peb lub xyoos: Yausuas 19
Kênh Youtube BHKTHN:
