Klei Aê Diê Blŭ: Klei Bi Hriêng 25:11-12
Êlan kliăng: “Klei blŭ găl djŏ mmông jing msĕ si boh mah mƀlir hlăm prăk.” (Klei Bi Hriêng 25:11)
Klei êmuh ksiêm mĭn: Mtao Y-Salômôn mtă ya mta knuih brei mâo hlăm klei blŭ? Hŏng ya klei ñu yua bi msĕ, čiăng bi êdah ênoh yuôm knuih anei? Êlan Klei Bi Hriêng anei đru drei thâo ƀuh ya mta klei, čiăng kơ drei bi mlih?
Thâo săng klei blŭ amâo răng ba klei jhat kơ pô blŭ (Klei Bi Hriêng 25:9-10), mtao Y-Salômôn mtô leh anak “klei blŭ găl djŏ mông” amâodah hbĭl năng blŭ srăng mâo ênoh yuôm msĕ si “boh mah mƀlir hlăm prăk”. Rup “boh pom mah dưm ti dlông jam ngă hŏng prăk” (êlan 11) bi êdah klei jăk siam, mâo ênoh yuôm leh anăn mkra mjing bŏ hŏng klei răng.
Tinei mâo tlâo mta “klei blŭ găl djŏ mmông” brei bi mâo. Tal sa jing djŏ. Boh blŭ “ƀuah” hlăm êlan 12 mblang jing “čiăng mkŏ mjing hŏng klei djŏ hlăm klei mkra sa klei kčŭt”, leh anăn ăt mblang jing “bi grăng”, amâodah djă pioh klei kpă ênô. Klei blŭ ƀuah mơ̆ng sa čô thâo mĭn mâo ênoh yuôm msĕ si “kông mah, sa mta mnơ̆ng bi msiam mkra hŏng mah doh”. Snăn, klei blŭ amâodah klei čuăn thâo mĭn brei djŏ hŏng klei sĭt nik leh anăn kñăm čiăng mkra mta klei soh wê, đru kơ phung hmư̆ hdĭp thâo mĭn.
Tal dua jing găl mông. Sa klei blŭ amâodah klei čuăn djŏ, jing bi msĕ “boh mah mƀlir hlăm prăk”, leh anăn boh klei truh djŏ găl bi msĕ hŏng mnơ̆ng kruăk mjing hŏng prăk. Klei blŭ djŏ, blŭ găl mông srăng bi mđĭ hĭn ênoh yuôm lu blư̆, bi mklăk wĭt, klei blŭ amâo găl djŏ mông, amâo djŏ hŏng boh klei truh, srăng bi luč jih ênoh yuôm ñu. Khua pô hưn êlâo Y-Êsai lač: “Khua Yang Yêhôwa brei leh kơ kâo êlah phung hriăm leh, čiăng kơ hŏng klei kâo blŭ kâo dưi krơ̆ng pô êmăn. Grăp aguah Ñu pŏk knga kâo, čiăng kơ kâo dôk hmư̆ msĕ si pô hriăm.” (Y-Êsai 50:4). Mâo đa mông “pô êmăn” čiăng mâo klei bi hriăm djŏ dưi “krơ̆ng” hĭn kơ klei ƀuah. Bi mklăk wĭt, Y-Yôp lač leh hŏng Y-Êlipas: “Klei blŭ ênuah mâo klei kčŭt êdi! Ƀiădah ya yuôm klei diih ƀuah?” (Y-Yôp 6:25). Êjai hlăk Y-Yôp dôk tŭ klei knap mñai hlăm kđeh asei mlei, ai tiê klei mĭn, wăt mngăt, snăn “klei ƀuah” ya yuôm!
Tal tlâo jing djŏ mnuih. “Klei pô thâo mĭn ƀuah kơ pô dôk hmư̆,” (êlan 12). Boh blŭ “dôk hmư̆” hlăm klei Hêbrơ čiăng lač kơ klei gưt asăp (Klei Mtô Mñă Klei Bhiăn 6:4). Amâo djŏ hlei pô mâo knga thâo dôk hmư̆ sơăi ôh, leh anăn amâo djŏ hlei pô dôk hmư̆ gưt ngă tui si klei bi hriăm diñu hmư̆ leh ôh mơh. Snăn, klei blŭ ƀuah mơ̆ng pô thâo mĭn mâo ênoh yuôm, ƀiădah buê kdrăp ti knga brei mâo “knga thâo hmư̆” čiăng kơ tơdah čŭt srăng jing siam hĭn kơ jih jang. Klei blŭ ƀuah mơ̆ng pô thâo mĭn brei mŭt kma hlăm knga mđing hmư̆ thâo gưt asăp. Klei djŏ găl ti krah pô thâo mĭn ƀuah, amâodah klei drei čuăn ngă hŏng pô thâo dôk hmư̆ leh anăn tŭ ư mkra klei soh wê, ăt jing jăk siam leh anăn yuôm msĕ si buê mah mkra mjing hŏng kngan mbruă čŭt ti knga mơh. Msĕ snăn mơh, klei blŭ thâo mĭn brei blŭ găl djŏ mông kơh mâo klei yuôm.
Klei blŭ drei khăng ba ya mta boh kơ pô dôk hmư̆?
Wah lač: Ơ Khua Yang, klei blŭ yơh jing mta klei kâo dleh krơ̆ng ksiêm hĭn, kyuanăn akâo kơ Khua Yang brei kâo thâo răng, čiăng kơ kâo yua klei blŭ kâo hŏng klei thâo mĭn, găl djŏ mông, tŭ dưn kơ pô dôk hmư̆. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
