Klei Aê Diê Blŭ: Y-Mathiơ 7:1-6
Êlan kliăng: “Ơ mnuih ai ngăm, mă hĕ êda mơ̆ng ală ih êlâo, leh anăn ih srăng ƀuh mngač dưi mă ƀruih mơ̆ng ală ayŏng adei ih.” (Y-Mathiơ 7:5)
Klei êmuh ksiêm mĭn: Klei Aê Diê Blŭ mtô “đăm phat kđi arăng ôh” si mblang? Asâo leh anăn ŭn hlăm êlan 6 kơ hlei phung mnuih čiăng lač? Klei Aê Diê Blŭ brei thâo hlei pô jing khua pô mtô soh, hlei pô jing mnuih ai ngăm? Si diih mă yua klei hriăm anei hlăm Phung Sang Aê Diê?
Mâo đa mnuih mă Y-Mathiơ 7:1 lač snei, đăm phat kđi arăng ôh, jing amâo dưi ksiêm, ƀuah ôh klei soh jhat mnuih mkăn ngă, tơl hlei pô mñă lač kơ klei soh jhat, yap pô anăn jing mnuih bi rŭng, kƀah klei thâo khăp, đa đa… ƀiădah klei sĭt Klei Aê Diê Blŭ mtô, klei amâo mâo ƀuah mkra klei soh yơh jing kƀah klei khăp (Bruă Lêwi 19:17).
Khua Yang lač: “Đăm brei mnơ̆ng doh jăk kơ asâo ôh; leh anăn đăm hwiê añŭ diih ti anăp ŭn ôh,…” (êlan 6). Asâo leh anăn ŭn jing hlô mnơ̆ng amâo thâo kral ôh ênoh yuôm añŭ boh tâo yuôm. Msĕ snăn mơh, hŏng phung mâo ai tiê khăng, amâo čiăng đăo, yap hơăi mang klei bi mtlaih, Khua Yang Yêsu amâo bi luč hruê mmông mtô mblang Klei Mrâo Mrang Jăk kơ diñu ôh, msĕ si phung ƀuôn sang Nasaret (Y-Markôs 6:4-6), amâodah msĕ si mtao Hêrôt (Y-Luk 23:8-9). Hlăm Y-Mathiơ 7:15-16 Khua Yang mtô: “Răng bĕ kơ phung khua pô hưn êlâo soh. Diñu hriê kơ diih hơô klĭt biăp, ƀiădah ti lam diñu jing asâo tan ră. Diih srăng thâo kral diñu tui si boh diñu…” Phung khua pô mtô soh jing mnuih mâo knhuah hdĭp bi mklăk hŏng klei ñu mtô. Hlăk Khua Yang mtô hlăm Sang Yang, Ñu wĭt lač kơ phung đing đăo kơ klei dưi Ñu mtô snei, “Đăm phat kđi tui si klei bi êdah ti êngao ôh, ƀiădah brei diih phat kđi hŏng klei kpă.” (Y-Yôhan 7:24). Snăn, mâo đa boh klei drei tuôm, hŏng klei Khua Yang mtrang mngač leh anăn kna ti Klei Aê Diê Blŭ, drei dưi thâo kral leh anăn đru kơ klei blŭ amâodah klei ngă mnuih mkăn jing djŏ amâodah soh, jăk amâodah jhat.
Hlue si pruê̆ blŭ hlăm Y-Mathiơ kdrêč 7, Khua Yang Yêsu dôk lač kơ klei phung ai ngăm phat kđi arăng, anăn jing knuih kbiă hriê mơ̆ng ai tiê mgao, ksiêm kđêč klei soh điêt dhiêt msĕ si ƀruih mnuih mkăn, ƀiădah mdăp hĕ klei soh pô ngă prŏng mđơr hŏng êda. Khua Yang čiăng drei ksiêm drei pô hŏng Klei Aê Diê Blŭ, hưn klei soh pô leh anăn lui hĕ klei soh jhat pô êlâo kơ čiăng đru rŭ mdơ̆ng mnuih mkăn. Khua ƀĭng kna Y-Pôl mtô, tơdah ƀuh ayŏng amai adei “tơdah diih ƀuh sa čô lĕ hlăm klei soh, hŏng klei êdu êun mkra brei ñu wĭt ngă klei djŏ.” (Galati 6:1). Hŏng klei čiăng jăk, kbiă hriê mơ̆ng klei khăp, brei drei đru rŭ pô ngă soh hŏng klei êdu êun. Khua Yang Yêsu mtô tơdah mâo mnuih hlăm Phung Sang Aê Diê ngă soh hŏng drei, êlâo hĭn blŭ hjăn drei hŏng pô anăn. Tơdah amâo dưi ôh, iêô thiăm dua tlâo čô hưn bi sĭt. Tơdah pô anăn ăt kăn tŭ hmư̆ rei, snăn kơh hưn mdah ti krah Phung Sang Aê Diê. Čiăng lač, hŏng jih ai tiê bi grăng hlăm klei khăp leh anăn gĭr (Y-Mathiơ 18:15-17). Mă drei pô ngă hnơ̆ng čuăn kăp phat kđi arăng srăng lŏ thiăm hĭn klei bi rŭng, hŏng Klei Aê Diê Blŭ bi đru hlăm klei khăp srăng đru rŭ mdơ̆ng hdơ̆ng pô.
Hŏng si ênhă êlan drei dôk đru mgaih mkra klei amâo thâo bi djŏ hlăm Phung Sang Aê Diê?
Wah lač: Ơ Khua Yang, akâo Ih đru kâo ksiêm kâo pô nanao hŏng Klei Ih Blŭ, čiăng kâo thâo ƀuh klei soh kâo pô, leh anăn mâo klei thâo săng, klei khăp bi đru găn gao klei amâo thâo bi djŏ hlăm Phung Sang Aê Diê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Yôsuê 15
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
