Pajlug 22:7-9
Nqe cim:
“Ua neeg siab dawb siab zoo thiab pub koj tej zaub mov rau cov neeg pluag noj, koj thiaj yuav tau koob hmoov.” (Pajlug 22:9)
Peb saib ntxiv hauv Phau Txhais Tshiab,
“Tus uas muaj lub siab dav yuav tau koob hmoov, rau qhov nws faib nws tej zaub mov rau cov pluag.” (Hmowsv)
Lus nug rau sawvdaws xav:
– Tus neeg pluag yuav tsum raug li cas?
– Vajtswv cov menyuam yuav tsum ua li cas rau cov neeg pluag txomnyem?
– Peb cheemtsum muaj lub siab thiab kev ua li cas rau cov kwvtij nkaujmuam pluag?
Vajtswv xav kom Nws cov menyuam ua zoo rau cov neeg pluag. Thawj qhov, cov neeg pluag yoojyim vamkhom cov neeg muaj. Thaum qiv nyiaj lawm yuav tsum txaus siab ua tubtxib lossis tub qhe rau tus tswv qiv, ua raws li lawv txib. Tus neeg pluag tsis yog tiv txomnyem vim kev ua neej sab nqaij tawv xwb lawv tseem txomnyem siab thiab. Yog li ntawd, Vajtswv cov menyuam tsis tau cai thuam thaum cov neeg pluag tsis muaj dabtsi.
Thib ob, muaj ntau leej pluag tsis yog tub nkeeg tiamsis yog lawv nyob rau lub tsamthawj uas tswj tsis tau xws li toj pob txhub dej nyab, muaj mob nkeeg, lossis raug quab yuam. Peb yuav tsum ua neeg zoo rau lawv, tsis quab yuam, tsis dag, tsis caij tsuj lwm tus, tsis ua kom lawv txomnyem ntxiv. Vajtswv tsis pub cai rau cov Yixalayees yuav paj laum thaum qiv nyiaj rau lwm tus (II Kevcai 23:20). Vajtswv tsis txaus siab rau cov neeg caij tsuj cov tibneeg pluag: “Yog koj caij tsuj cov neeg pluag, ces yog koj saib tsis taus Vajtswv tus uas tsim lawv. Tiamsis kev ua siab dawb paug rau cov pluag yog kev qhuas Vajtswv.” (Pajlug 14:31).
Thib peb, peb yuav tsum qhia tawm lub siab zoo los ntawm qhov “siab dawb siab zoo”, lossis “pub koj tej zaub mov rau cov neeg pluag noj”. Kev ua zoo yuav tsum pib hauv lub siab hlub tuaj. Peb tsis yog pub tej khoom seem rau cov pluag los ntawm qhov muaj tus cwjpwm thuam, saib tsis taus. “Siab dawb siab zoo” qhia tawm kev ua siab ntev, sib hlub, sib pab thaum cov neeg pluag nyuaj siab, txomnyem. Tsis tas li ntawd, kuj yuav tsum ua haujlwm tawm thiab. Tsis txhob yog lub ncauj hais “hlub” tiamsis lub siab tsis pom yus cov kwvtij txomnyem, tsis “pub tej zaub mov rau cov neeg pluag noj”. Tus Tswv txhawb Nws haivneeg kom pab cov neeg pluag vim qhov ntawd yog ua rau tus Tswv: “Thaum koj muab rau tus pluag yog koj qiv rau tus Tswv ntag, ces tus Tswv yuav them rov rau koj.” (Pajlug 19:17). Vajtswv qiv, Nws yeej yuav pauj rov qab; tus Tswv foom koob hmoov rau tus neeg uas pab lwm tus vim tus Tswv.
Peb Leej Txiv tus uas nyob saum ntuj tsis yog hmov tshua txog sab ntsujplig xwb, Nws kuj npaj sab nqaij tawv rau Nws cov menyuam thiab. Yog peb tabtom raug txomnyem tsis muaj dabtsi, cia li ntseeg tus Tswv, ua neeg ncaj ncees, nquag ua haujlwm. Thov Vajtswv pab kom peb dim tej kev txomnyem ntawd. Tsis yog li xwb, yog tus Tswv pub rau peb muaj, cia li ua Vajtswv tsaug, qhia tawm lub siab ua Nws tsaug los ntawm qhov pab cov neeg pluag, tshwjxeeb yog pab cov kwvtij ntseeg. Sib pab ntawm txojkev hlub ib yam li tus Tswv twb hlub peb lawm.
Thov Vajtswv,
Vajtswv, nyuam yaus ua Koj tsaug rau tej uas Koj pub rau nyuam yaus muaj txaus txhua hnub. Thov Koj qhia kom nyuam yaus paub hlub, txhawb zog, faib pub rau cov kwvtij pluag nyob ib ncig. Nyuam yuas tuav Tswv Yexus lub npe thov, Amees.
Peb ua li cas rau cov neeg pluag kom qhia tawm kev hlub thiab ua rau Vajtswv tau ntsejmuag?
Nyeem Vajluskub hauv peb lub xyoo: Yausuas 2
Kênh Youtube BHKTHN:
