Klei Aê Diê Blŭ: Klei Bi Hriêng 22:7-9
Êlan kliăng: “Mnuih thâo pap srăng mâo klei jăk jĭn, kyuadah ñu bi mbha brei mnơ̆ng ƀơ̆ng huă ñu kơ phung ƀun ƀin.” (Klei Bi Hriêng 22:9)
Klei êmuh ksiêm mĭn: Si klei phung ƀun ƀin tŭ klei arăng ngă? Si phung ƀuôn sang Aê Diê brei hdĭp hŏng phung ƀun ƀin? Si ai tiê leh anăn bruă ngă drei mâo hŏng ayŏng amai adei pô hlăm klei digơ̆ dleh dlan?
Aê Diê čiăng kơ phung ƀuôn sang Aê Diê ngă jăk hŏng phung ƀun ƀin. Êlâo hĭn, phung ƀun ênưih knang kơ mnuih mdrŏng. Tơdah čan prăk jing dĭng buăl amâodah hlŭn kơ pô brei čan, tŭ klei diñu gĭt gai. Phung ƀun amâo djŏ knŏng tŭ dleh dlan kyua klei hdĭp knap mñai ôh ƀiădah lŏ tŭ klei dleh dlan kơ ai tiê. Kyua anăn, phung ƀuôn sang Aê Diê amâo dưi mưč mač ôh kơ phung ƀun kyua klei dleh dlan digơ̆ dôk găn.
Tal dua, lu phung ƀun amâo djŏ kyua alah ôh ƀiădah kyua lĕ hlăm klei amâo dưi ktuê dlăng msĕ si yan adiê ngă, klei ruă duam, amâodah arăng ktư̆ juă. Brei drei hdĭp thâo pap hŏng diñu, klă klơ̆ng jing amâo dưi ktư̆ juă ôh, amâo dưi mplư ôh, kpĭ mgô̆ čiăng duah klei tŭ kơ pô, ngă kơ digơ̆ knư̆ ƀun ƀin hĭn êjai, knap mñai hĭn. Aê Diê amâo brei phung ƀuôn sang Yuđa mă prăk mnga ôh tơdah brei ayŏng amai adei pô čan (Klei Mtô Mñă Klei Bhiăn 23:20). Aê Diê lač kơ klei ktư̆ juă phung ƀun ƀin: “Hlei pô ktư̆ juă mnuih ƀun ƀin dlao wač kơ Pô Mjing gơ̆, ƀiădah hlei pô pap kơ mnuih ƀun ƀin mpŭ kơ Pô Mjing gơ̆” (Klei Bi Hriêng 14:31).
Tal tlâo, drei bi êdah ai tiê thâo pap mơ̆ng “ală thâo pap” amâodah “mbha brei mnơ̆ng ƀơ̆ng huă ñu kơ phung ƀun ƀin”. Klei pap êlâo hĭn brei hriê mơ̆ng ai tiê thâo khăp. Drei amâo brei ôh mnơ̆ng êbeh kơ phung ƀun hŏng knuih mưč mač, kƀah klei mpŭ. “Ală thâo pap” bi êdah klei pap, klei khăp, čiăng bi đru găn klei knap mñai, klei kƀah hŏng phung ƀun ƀin. Êngao anăn, ăt brei mâo bruă ngă klă klơ̆ng. Đăm ôh ha ƀăng êgei lač “khăp” ƀiădah ngă ngơi mang ti anăp klei dleh dlan ayŏng amai adei pô, amâo kah mbha ôh “mnơ̆ng ƀơ̆ng huă pô” kơ phung ƀun ƀin. Aê Diê mđĭ ai phung ƀuôn sang Aê Diê đru kơ phung ƀun ƀin kyua anăn jing ngă kơ Aê Diê: “Hlei pô brei pap kơ mnuih ƀun ƀin jing brei Yêhôwa čan, leh anăn Yêhôwa srăng lŏ bi wĭt kơ ñu tui si bruă jăk ñu ngă leh” (Klei Bi Hriêng 19:17). Aê Diê čan leh, klă sĭt Ñu srăng tla; Aê Diê hơêč hmưi leh kơ hlei pô kyua Aê Diê, ñu đru kơ phung ƀun ƀin.
Ama drei hlăm adiê amâo djŏ knŏng mđing kơ klei čiăng hlăm mngăt ôh ƀiădah lŏ mđing kơ klei čiăng hlăm asei mlei phung ƀuôn sang Ñu. Tơdah drei dôk lĕ hlăm klei ƀun ƀin knap mñai, brei jih ai tiê đăo knang kơ Aê Diê, gĭr hdĭp kpă ênô, gĭr kriăng mă bruă. Akâo kơ Khua Yang đru drei tlaih kơ klei ƀun ƀin. Bi tơdah Aê Diê brei drei jing mdrŏng, brei bi mni kơ Aê Diê, bi êdah ai tiê hdơr knga kơ Aê Diê mơ̆ng klei đru kơ phung ƀun ƀin, boh nik ayŏng amai adei hlăm klei đăo. Brei bi đru hlăm klei khăp msĕ si Khua Yang khăp leh kơ drei.
Si drei hdĭp hŏng phung ƀun ƀin čiăng bi êdah klei khăp leh anăn bi guh kơang Anăn Aê Diê?
Wah lač: Ơ Khua Yang, kâo bi mni kơ Ih kơ klei jăk Aê Diê brei leh kơ kâo djăp mnơ̆ng yua grăp hruê. Akâo kơ Khua Yang đru kâo thâo khăp, bi đru, kah mbha hŏng ayŏng amai adei ƀun ƀin jŭm dar kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôsuê 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
