II Xwmtxheej Vajntxwv 26:16-23
Nqe cim:
“Tus Tswv ntxub txhua tus uas khavtheeb, Nws yuav tsis pub lawv khiav dim txojkev txiav txim li.” (Pajlug 16:5)
Lus nug rau sawvdaws xav:
– Cov povthawj cheem Vajntxwv Uxiyas zoo li cas?
– Vajntxwv ua li cas? Nqi zog yog dabtsi?
– Peb cheemtsum muaj tus cwjpwm twg thaum luag hais yus qhov txhaum hauv lub neej?
Vajtswv tus uas muaj kev hlub niaj hnub ncua sijhawm rau cov neeg txhaum tig los lees txim thiab tso kev txhaum tseg. Nws pub sijhawm rau Vajntxwv Uxiyas kom tsis txhob ua txhaum los ntawm qhov txib tus povthawj Axaliyas nrog yim caum leej povthawj mus hais vajntxwv, cheem kom vajntxwv tsis txhob fij hmoov tshuaj tsw qab rau Vajtswv. Lawv hais kom vajntxwv tawm hauv lub Tuamtsev mus, tus Tswv yuav tsis foom koob hmoov rau vajntxwv thaum ua qhov no.
Twb tsimnyog mloog lawv cov lus ntuas no thiab tawm hauv Tuamtsev mus, los Vajntxwv Uxiyas ua zoo li tus neeg ruam, saib tsis taus kev txawj ntse thiab tej lus ntuas (Pajlug 1:7). Vajntxwv npautaws rau qhov lawv ua rau nws chim, txhais tes tabtom tuav rawv cov hmoov tshuaj tsw qab npaj fij, nws yeej yuav ua li nws xav. Thaum vajntxwv tabtom npau taws rau cov povthawj ces nws lub hauvpliaj cia li mob ruas tawg npleb nrees. Cov povthawj pom li ntawd, lawv maj nroos ntiab vajntxwv tawm mus. Lub sijhawm ntawd vajntxwv tsis tawv lawm, vajntxwv “txawm tawm ceev nrooj mus”, rau qhov vajntxwv paub tias nws raug tus Tswv rau txim. Muaj ib cov neeg ua txhaum rau tus Tswv, tsuas yog ib leeg pom raug txim xwb. Tiamsis ntawm no, txhua tus neeg puavleej pom vajntxwv raug Vajtswv rau txim, vim qhov nws khavtheeb no txhaum loj heev thiab ua qauv qhia rau lwm tus paub.
Vajntxwv mob ruas yuav raug cais tawm mus nyob rau ib lub tsev thiab yuav tsis tau cai mus rau hauv lub Tuamtsev mus txog thaum tuag (Levis Kevcai 13:46; II Vajntxwv 15:5). Txawm yog twb ua tau ntau yam zoo rau lub tebchaws (II Xwmtxheej Vajntxwv 26:4-15) los vajntxwv tsis tau faus hauv cov vajntxwv lub toj ntxas, tsuas coj mus faus ze ntawm cov vajntxwv lub toj ntxas xwb, rau qhov tau lub npe “mob ruas”. Ib tug neeg tau Vajtswv tsa ua tus loj muaj hwjchim, koob npe nrov ncha mus txhua qhov, los nimno vajntxwv ua neej txajmuag ntsuav, poob txhua yam, tsis tau kav, raug cais tawm, faus zoo li faus cov neeg mob ruas xwb.
Tseeb tiag, yog mloog cov povthawj cheem ces vajntxwv yuav tau tus Tswv zam txim thiab tsis muaj tej xwm no tshwm. Tiamsis lub siab khavtheeb ua rau vajntxwv ua txhua yam, hla Vajtswv txoj kevcai, saib tej lus ntuas tsis muaj qabhau, ua li ntawd yog ua saib tsis taus tus Tswv. Vajtswv ntxub txojkev khavtheeb, thiab tus neeg khavtheeb yeej khiav tsis dim txojkev rau txim li (Pajlug 16:5). Tus nqi them rau lub txim khavtheeb hnyav heev. Tsis txhob lam saib tsis taus!
Thov Vajtswv,
Tus Tswv, yog nyuam yaus hais tej lus, ua yam twg qhia hais tias nyuam yaus khavtheeb, thov Koj qhia, ntuas nyuam yaus. Thov pub kev txawj ntse kom nyuam yaus paub lees txim thiab tso tseg thaum tseem muaj sijhawm. Nyuam yaus tuav Tswv Yexus lub npe thov, Amees.
Tej lus hais, haujlwm ua twg peb ua qhia hais tias peb lub siab khavtheeb? Thov Vajtswv pab kom peb zeem paub thiab maj nroos lees txim.
Nyeem Vajluskub hauv peb lub xyoo: Yauhas 15
Kênh Youtube BHKTHN:
